ആലപ്പുഴ: ജമാഅത്തെ ഇസ്ലാമിയുടെ മതതീവ്രവാദത്തിനും പൊയ്മുഖത്തിനും എതിരെ പരസ്യ നിലപാട് സ്വീകരിക്കുന്ന സിപിഎമ്മിന്റെ ഇരട്ടത്താപ്പ് ചര്ച്ചയാകുന്നു. ജമാഅത്തെ ഇസ്ലാമി പല പേരുകളില് സംഘടിപ്പിക്കുന്ന പരിപാടികളില് സിപിഎം എംഎല്എമാര് പങ്കെടുക്കുന്നതാണ് വിവാദമായത്. ആലപ്പുഴ ജില്ലയില് അരൂര് എംഎല്എയും, ആലപ്പുഴ എംഎല്എയുമാണ് കഴിഞ്ഞ ദിവസങ്ങളില് ജമാഅത്തെ ഇസ്ലാമിയുടെ പരിപാടികളില് പങ്കെടുത്തത്.
ചാരിറ്റിക്ക് വേണ്ടിയെന്ന്
ജമാഅത്തെ ഇസ്ലാമിയുടെ നിയന്ത്രണത്തിലുള്ള ചാരിറ്റി സംഘടനയുടെ പരിപാടിയിലാണ് അരൂര് എംഎല്എ പങ്കെടുത്ത് പാട്ട് പാടിയത്. ഈ മാസം 11 ന് ജമാഅത്തെ ഇസ്ലാമി അമീര് പി. മുജീബ് റഹ്മാന് ഉള്പ്പടെയുള്ളവര് പങ്കെടുത്ത പരിപാടിയിലാണ് ദലീമ ജോജോ പങ്കെടുത്തത്. അരൂക്കുറ്റി കേന്ദ്രീകരിച്ച് പ്രവര്ത്തിക്കുന്ന കനിവ് എന്ന പാലിയേറ്റീവ് സംഘടനയുടെ ആംബുലന്സിന്റെ ഫ്ലാഗ് ഓഫ് ചടങ്ങായതിനാലാണ് താന് പങ്കെടുത്തതെന്ന് ന്യായീകരിക്കുകയാണ് എംഎല്എ. ചാരിറ്റിക്ക് വേണ്ടി ആരു വിളിച്ചാലും പോകുമെന്നും ദലീമ വ്യക്തമാക്കി.
ആലപ്പുഴയില് ജമാഅത്തെ ഇസ്ലാമിയുടെ മുഖപത്രം സംഘടിപ്പിച്ച കുട്ടികളുടെ ചിത്രരചനാ മത്സരത്തിന്റെ സമാപന സമ്മേളനം ഉദ്ഘാടനം ചെയ്തത് പി.പി. ചിത്തരഞ്ജന് എംഎല്എ ആയിരുന്നു. കുട്ടികളുടെ സര്ഗവാസന പ്രോത്സാഹിപ്പിക്കുന്നതിനായി വേദികള് ഒരുക്കുന്നതില് ‘മാധ്യമം’ നല്കുന്ന പ്രത്യേക ശ്രദ്ധ മാതൃകാപരമാണെന്നും അദ്ദേഹം പറഞ്ഞു. ജമാഅത്തെ ഇസ്ലാമിയുടെ ചാനലും പത്രവും സമൂഹത്തില് മതവൈരം സൃഷ്ടിക്കുന്നതായി സിപിഎം സംസ്ഥാന, കേന്ദ്രനേതാക്കള് വാര്ത്താ സമ്മേളനങ്ങളില് ഉള്പ്പെടെ പ്രതികരിക്കുമ്പോഴാണ് ഇവിടെ എംഎല്എ, ജമാഅത്തെ ഇസ്ലാമിയുടെ മുഖപത്രത്തിന്റെ പരിപാടിയില് ഉദ്ഘാടകനായി പങ്കെടുത്തത്.
ബൈത്തു സക്കാത്ത് ക്യാമ്പയിനില് മന്ത്രിയും
കഴിഞ്ഞ ദിവസം മലപ്പുറത്തെ ജമാഅത്തെ ഇസ്ലാമി പരിപാടിയില് മന്ത്രി വി. അബ്ദുറഹിമാനും പങ്കെടുത്തിരുന്നു. ബൈത്തു സക്കാത്ത് ക്യാമ്പയിന് പരിപാടിയുടെ ഉദ്ഘാടകനായിരുന്നു മന്ത്രി. സിപിഎമ്മിന്റെ ഇരട്ടത്താപ്പിനെതിരെ വിമര്ശനം ഉയരുമ്പോള് തങ്ങള് ജമാഅത്തെ ഇസ്ലാമി സംഘടിപ്പിച്ച പരിപാടികളിലല്ല, ചാരിറ്റി ചടങ്ങുകളിലും, പത്രത്തിന്റെ ചടങ്ങുകളിലുമാണ് പങ്കെടുക്കുന്നതെന്ന ന്യായീകരണമാണ് സിപിഎം ജനപ്രതിനിധികള് നടത്തുന്നത്. എന്നാല് പിഎഫ്ഐയും, ജമാഅത്തെ ഇസ്ലാമിയും പൊതുജനങ്ങളെ തെറ്റിദ്ധരിപ്പിക്കാന് ഇത്തരത്തില്, പ്രത്യക്ഷത്തില് നിഷ്പക്ഷമെന്ന് തോന്നിപ്പിക്കുന്ന സംഘടനകളുടെ പേരിലാണ് പല പ്രവര്ത്തനങ്ങളും നടത്തുന്നത്.
ഇക്കാര്യം അറിയാതെയല്ല സിപിഎം ജനപ്രതിനിധികള് ഇത്തരം പരിപാടികളില് പങ്കെടുക്കുന്നത് എന്നതാണ് വസ്തുത. സിപിഎം എക്കാലവും പ്രയോഗിക്കുന്ന അടവുനയമാണ് ജമാഅത്തെ ഇസ്ലാമിയുടെ കാര്യത്തിലും പുലര്ത്തുന്നത്. തങ്ങളാണ് മതവര്ഗീയതക്കെതിരായ ചാമ്പ്യന്മാരെന്ന് കൊട്ടിഘോഷിക്കുകയും, മറുഭാഗത്ത് പ്രീണന രാഷ്ട്രീയം പയറ്റുകയുമാണ് സിപിഎം എന്നാണ് വിമര്ശനം. ജമാഅത്തെ ഇസ്ലാമിയുമായല്ല, വെല്ഫെയര് പാര്ട്ടിയുമായാണ് തങ്ങള്ക്ക് സഖ്യമെന്ന കോണ്ഗ്രസിന്റെ കാപട്യ സമീപനത്തിന്റെ മറുപുറമാണ് സിപിഎം നിലപാടും.
