തിരുനാവായ: മലപ്പുറത്തെ തിരുനാവായക്ഷേത്രത്തിന് മുന്പിലെ ഭാരതപ്പുഴയുടെ തീരത്ത് നടക്കുന്ന മഹാകുംഭമേളയ്ക്ക് തമിഴ്നാട്ടില് നിന്നും എത്തേണ്ട രഥയാത്ര തടഞ്ഞ് തമിഴ്നാട് പൊലീസ്. തമിഴ്നാട്ടിലെ തിരുമൂര്ത്തി കുന്നുകളില് നിന്നാണ് രഥയാത്ര ആരംഭിയ്ക്കേണ്ടിയിരുന്നത്. ഇതാണ് സ്റ്റാലിന് സര്ക്കാര് തടഞ്ഞിരിക്കുന്നത്.
രഥയാത്രയ്ക്കുള്ള മഹാമേരു അഴിച്ചുമാറ്റാനും തമിഴ്നാട് പൊലീസ് രഥയാത്രയുടെ സംഘാടകരോട് പറഞ്ഞിരിക്കുകയാണ്.
എന്തിന് തിരുമൂര്ത്തി മലയില് നിന്നും രഥഘോഷയാത്ര?
കേരളദേശത്തിന്റെ രക്ഷയ്ക്കായി പരശുരാമന് സ്ഥാപിച്ച നാല് അംബികാക്ഷേത്രങ്ങളില്നിന്നും ദീപശിഖകള് മാഘമഹോത്സവവേദിയിലെത്തിയ്ക്കും. ദക്ഷിണഗംഗ എന്ന് അറിയപ്പെടുന്ന ഭാരതപ്പുഴ ആരംഭിയ്ക്കുന്നത് തമിഴ്നാട്ടിലെ ഉഡുമല്പേട്ടിനടുത്തുള്ള തിരുമൂര്ത്തിമലയില്നിന്നാണ്. ഈ തിരുമൂര്ത്തിമലയില്നിന്നും ജനുവരി 19 ന് രാവിലെയാണ് രഥയാത്ര ഉദ്ദേശിച്ചിരുന്നത്. ഉഡുമല്പേട്ട്, പെള്ളാച്ചി, എട്ടിമട, കോയമ്പത്തൂര് തുടങ്ങി നിരവധി സ്ഥലങ്ങളിലെ സ്വീകരണങ്ങള്ക്കുശേഷം കേരളത്തില് പ്രവേശിച്ച് പാലക്കാട്, തൃശ്ശൂര്, ഷൊര്ണൂര്, ഒറ്റപ്പാലം ഭാഗങ്ങളിലെ സ്വീകരണങ്ങളും ഏറ്റുവാങ്ങി തിരുനാവായയില് എത്തുന്ന രീതിയിലാണ് പരിപാടി ക്രമീകരിച്ചിരുന്നത്.
പക്ഷെ ഈ രഥയാത്രയാണ് തമിഴ്നാട് പൊലീസ് സ്റ്റാലിന്റെ പ്രത്യേകനിര്ദേശപ്രകാരം തടഞ്ഞത്. സനാതനമായ എല്ലാം തടയുക എന്നതാണ് സ്റ്റാലിന്റെ നിലപാട്.
രഥഘോഷയാത്രയുടെ ആരംഭം വാളയാറില് നിന്നാക്കി
തമിഴ്നാട് സര്ക്കാര് രഥഘോഷയാത്ര നിരോധിച്ചതോടെ കേരളത്തിലെ വാളയാറില് നിന്നും രഥഘോഷയാത്ര ആരംഭിച്ചാല് മതിയെന്ന് സംഘാടകര് തീരുമാനിച്ചു. ജനവരി 19ന് രാവിലെ തിരുനാവായില് രഥഘോഷയാത്രയുടെ ഭാഗമായി നദീപൂജയും ഗോപൂജയും മഹാമേരു പൂജയും നടത്തിയിരുന്നു. പക്ഷെ മഹാമേരു രഥയാത്ര തമിഴ്നാട്ടില് പൊലീസ് തടയുകയായിരുന്നു. നേരത്തെ തമിഴ്നാട് സര്ക്കാര് ഇതിന് അനുമതി നല്കിയിരുന്നതാണ്. അതാണ് പൊടുന്നനെ തടഞ്ഞത്. കേരളത്തില് നിന്നുള്ള ചിലര് തമിഴ്നാട് സര്ക്കാരില് ഇതിനായി സമ്മര്ദ്ദം ചെലുത്തിയതായും അറിയുന്നു.
തമിഴ്നാട് എല്ലാ ഓഫീസുകളിലും കയറിയിറങ്ങി അനുമതി വാങ്ങിയിട്ടും രക്ഷയില്ല
തമിഴ്നാട്ടിലെ സര്ക്കാര് ഓഫീസുകളില് മഹാകുംഭമേളയുടെ സംഘാടകര് ഒരുമാസമായി കയറിയിറങ്ങി അനുമതി വാങ്ങിയിരുന്നു. ഇതിന്റെ അടിസ്ഥാനത്തില് തിരുമൂര്ത്തി മലയില് നിന്നും ജനുവരി 19 തിങ്കളാഴ്ച രാവിലെ രഥയാത്ര ആരംഭിക്കുന്നതോടെ അതിന് തമിഴ്നാട്ടില് 30 ഇടങ്ങളില് സ്വീകരണം ഒരുക്കിയിരുന്നു. ഈ സ്വീകരണസ്ഥലങ്ങളില് എല്ലാ ഒരുക്കങ്ങും നടത്തി കാത്തിരുന്നവര് നിരാശരായി. തമിഴ്നാട് പൊലീസ് തിങ്കളാഴ്ച രാവിലെതന്നെ എത്തി രഥത്തില് നിന്നും മേരു അഴിച്ചുമാറ്റുകയായിരുന്നു. ഇതോടെ തമിഴ്നാട്ടിലെ രഥഘോഷയാത്ര റദ്ദാക്കി. ഈ മഹാമേരും തമിഴ്നാട് പൊലീസ് തന്നെ ഒരു വാഹനത്തില് വാളയാറില് എത്തിച്ചുതരാമെന്ന് ഉറപ്പുനല്കിയിട്ടുണ്ട്. അത് പ്രകാരം വാളയാറില് നിന്നും വീണ്ടും രഥഘോഷയാത്ര ആരംഭിക്കാനാണ് പദ്ധതി. 22ാം തീയതി വൈകീട്ട് വാളയാറില് നിന്നുള്ള രഥയാത്ര തിരുനാവായില് എത്തിച്ചേരും. കേരളത്തിലെ രഥഘോഷയാത്ര മുടങ്ങാതെ നേരത്തെ നിശ്ചയിച്ചതുപോലെ നടക്കുമെന്ന് സംഘാടകര് അറിയിച്ചു.
