മെഗാസ്റ്റാർ മമ്മൂട്ടിയെ നേരിൽ കാണാനായതിന്റെ സന്തോഷം പങ്കുവച്ച് നന്ദഗോവിന്ദം ഭജന്സിലെ മുഖ്യഗായകന് നവീന് മോഹന്. മമ്മൂട്ടിയോടൊപ്പമുള്ള ചിത്രങ്ങൾ നവീൻ സമൂഹമാധ്യമങ്ങളിൽ പങ്കുവച്ചു. ‘സ്വപ്ന സാക്ഷാത്കാരം’ എന്ന അടിക്കുറിപ്പോടെ നവീൻ പങ്കുവച്ച ചിത്രങ്ങൾ സമൂഹമാധ്യമങ്ങളിൽ വൈറലാണ്
സ്റ്റൈലിഷ് ലുക്കിലാണ് മമ്മൂട്ടിയെ ചിത്രങ്ങളിൽ കാണാനാകുന്നത്. സെലിബ്രിറ്റികളടക്കം നിരവധിപ്പേരാണ് നവീൻ പങ്കുവച്ച ചിത്രങ്ങൾ ലൈക്ക് ചെയ്തിരിക്കുന്നത്.ആരാധകരും ഈ ചിത്രങ്ങൾ ഏറ്റെടുത്തിരിക്കുകയാണ്. ഇരുവരും ഞങ്ങൾക്ക് പ്രിയപ്പെട്ടവരാണെന്ന് നന്ദഗോവിന്ദം ഭജൻസ് ആരാധകരും മമ്മൂട്ടി ആരാധകരും കമന്റായി കുറിക്കുന്നു.
നന്ദഗോവിന്ദം ഭജൻസിന്റെ മുഖ്യ ഗായകനും സഹസ്ഥാപകനുമാണ് കോട്ടയം നട്ടാശ്ശേരി സ്വദേശി നവീൻ മോഹൻ. സിനിമാഗാനങ്ങളും സോപാന സംഗീതവും വരെ ഉള്പ്പെടുത്തി ഭജൻസിനെ ജനകീയമാക്കുകയാണ് നന്ദഗോവിന്ദം ഭജൻസ്. ‘മനോഹരീ രാധേ രാധേ’ എന്ന സൂപ്പർഹിറ്റ് സിനിമാഗാനത്തിലൂടെയാണ് നന്ദഗോവിന്ദം ഭജന്സ് ജനപ്രിയമായത്. 2000-ല് കോട്ടയം നട്ടാശേരി വേമ്പിന്കുളങ്ങര മഹാവിഷ്ണു ക്ഷേത്രത്തിൽ രൂപംകൊണ്ട കർക്കടക ഭജന സംഘമാണ് പിന്നീട് നന്ദഗോവിന്ദം ഭജൻസ് ആയി വളർന്നത്.
