ആലപ്പുഴ: കുട്ടനാടന് താറാവിന് ഇന്ത്യന് കാര്ഷിക ഗവേഷണ കേന്ദ്രത്തിന്റെ നാഷഇല് ബ്യൂറോ ഓഫ് അനിമല് ജനറ്റിക് റിസോഴ്സസിന്റെ (എന്ബിഎജിആര് ) അംഗീകാരം. ഈ സാഹചര്യത്തില് കുട്ടനാടന് താറാവുകള്ക്ക് പ്രിയമേറും എന്ന പ്രതീക്ഷയില് കര്ഷകര്. കേരളത്തില് നിന്നുള്ള ചാര, ചെമ്പല്ലി എന്നീ ഇനങ്ങളില്പെട്ട താറാവുകള് നേരത്തെ തന്നെ മികച്ചയിനം എന്ന അംഗീകാരം ലഭിച്ചിരുന്നതാണ്.
അംഗീകൃത ജനുസാകുന്നത്തോടെ സര്ക്കാര് പദ്ധതികളിലെ അര്ഹത, ഗവേഷണ ധനസഹായം, ശാസ്ത്രീയമായ രീതിയില് എണ്ണം രേഖപ്പെടുത്തല് എന്നിവ സാധ്യമാകും. കോട്ടയം, ആലപ്പുഴ, പത്തനംതിട്ട ജില്ലകളിലായി 18 ലക്ഷം കുട്ടനാടന് താറാവുകളുള്ളതായാണു കണക്ക്. തവിട്ടു നിറത്തില് കറുപ്പ് നിറം കൂടുതലുള്ളവയെ ചാരയെന്നും ഇളം തവിട്ടു നിറത്തിലുള്ളവയെ ചെമ്പല്ലിയെന്നും രണ്ട് ഇനങ്ങളായാണ് കുട്ടനാടന് താറാവുകള് അറിയപ്പെടുന്നത്. ശരാശരി ഒന്നരക്കിലോ മുതല് രണ്ടു കിലോ വരെ തൂക്കം വരുന്ന ഈ ഇനം രാജ്യത്ത് ഏറ്റവും കൂടുതല് ഉത്പാദന ക്ഷമതയുള്ള നാടന് താറാവിനമാണ്.
മറ്റു സംസ്ഥാനങ്ങളിലെ താറാവുകളെക്കാള് പോഷക മൂല്യമുള്ള താറാവുകളാണ് ചാരയും ചെമ്പല്ലിയും എന്നു നേരത്തെതന്നെ കണ്ടെത്തിയിരുന്നു. ഇതു കണക്കിലെടുത്തു കുട്ടനാടന് താറാവുകള് മൂല്യാധിഷ്ഠിത ഉല്പന്നമായി ജനങ്ങളുടെ കൈകളില് എത്തിക്കുന്ന പദ്ധതിക്ക് മുന്പ് മൃഗസംരക്ഷണ വകുപ്പ് രൂപം കൊടുത്തിരുന്നതാണ്.
എന്നാല് പദ്ധതി മുന്നോട്ടു പോയില്ല. ദേശീയ അംഗീകാരം ലഭിച്ചതോടെ ഈ പദ്ധതി പുനരാരംഭിക്കണമെന്നാണു കര്ഷകരുടെ ആവശ്യം.
കൂടാതെ തുടര്ച്ചയായി ഉണ്ടാകുന്ന പക്ഷിപ്പനിയെ ചെറുക്കാന് കാര്യക്ഷമമായ പദ്ധതികള് വേണമെന്നാണ് ആവശ്യം ഉയരുന്നത്. തുടര്ച്ചയായ വര്ഷങ്ങളില് നവംബര്, ഡിസംബര് മാസങ്ങളിലാണ് രോഗം പകരുന്നത്. പതിനായിര കണക്കിന് താറാവുകള് അടക്കമുള്ള പക്ഷികളെയാണ് കൊന്നൊടുക്കുന്നത്.
