കൊല്ലം: ശബരിമല സ്വര്ണക്കൊള്ളക്കേസിലെ നിര്ണായകമായ ശാസ്ത്രീയ പരിശോധനാ റിപ്പോര്ട്ട് എസ്ഐടി വിജിലന്സ് കോടതിയില് സമര്പ്പിച്ചു. വിക്രം സാരാഭായ് സ്പേസ് സെന്ററിലെ (വിഎസ്എസ്സി) വിദഗ്ധ പരിശോധനാ റിപ്പോര്ട്ടാണ് മുദ്രവച്ച കവറില് സമര്പ്പിച്ചത്. ദ്വാരപാലക ശില്പം, കട്ടിളപ്പാളി തുടങ്ങി 15 സാംപിളുകളുടെ പരിശോധനാ ഫലമാണ് ഇവ.
ശബരിമലയിലെ പഴയ പാളികള് കവര്ന്നോ, പുതിയ പാളികളിലാണോ സ്വര്ണം പൂശിയത് എന്നതടക്കം റിപ്പോര്ട്ടിലുണ്ട്. പഴയ ചെമ്പുപാളികള് തന്നെയാണോ ശബരിമലയില് ഇപ്പോഴുമുള്ളത്, ആ പാളികളില് തന്നെയാണോ സ്വര്ണം പൂശലടക്കമുള്ള വ നടത്തിയത് തുടങ്ങിയ ചോദ്യങ്ങള്ക്കുള്ള ഉത്തരങ്ങളും റിപ്പോര്ട്ടിലൂടെ വെളിച്ചത്താകും. ശബരിമലയിലെ സ്വര്ണപ്പാളികളുടെ പഴക്കമടക്കം നിര്ണയിക്കാനാണ് വിഎസ്എസ്സിയില് വിദഗ്ധ പരിശോധനയ്ക്കയച്ചത്.
പുതുതായി സ്വര്ണം പൂശിയതെന്നു പറയപ്പെടുന്നവയും, ഇതുവരെ കൊണ്ടുപോകാത്ത പാളികളില് നിന്നു താരതമ്യം ചെയ്യുന്നതിനായി സാംപിളുകളെടുത്തിരുന്നു. കൂടാതെ സ്വര്ണത്തിന്റെ പഴക്കവും ഗുണമേന്മയും നിര്ണയിക്കാനും വിഎസ്എസ്സിയോട് നിര്ദേശിച്ചിരുന്നു. റിപ്പോര്ട്ടിലെ വിവരങ്ങള് വരും ദിവസങ്ങളില് കോടതി പരിശോധിക്കും. സ്വര്ണപ്പാളികള് ഇളക്കി മാറ്റാതെ തന്നെ അവയുടെ ഘടനയും ഭാരവും പരിശോധിക്കാവുന്ന സാങ്കേതികവിദ്യയാണ് വിഎസ്എസ്സിയില് ഉപയോഗിച്ചത്.
അതിനിടെ, ശബരിമല സ്വര്ണക്കൊള്ളയില് യുഡിഎഫ് ഭരണകാലത്തെ ദേവസ്വം ബോര്ഡും കുരുക്കിലായി. തന്ത്രിക്കു വാജി വാഹനം നല്കിയത് ദേവസ്വം കമ്മിഷണറുടെ ഉത്തരവു ലംഘിച്ചാണെന്നു വ്യക്തമായി. വാജി വാഹനം തന്ത്രിക്ക് അവകാശപ്പെട്ടതല്ല. പുതിയതു സ്ഥാപിക്കുമ്പോള് പഴയവ പൊതുസ്വത്തായി സംരക്ഷിക്കണമെന്നാണ് 2012ലെ ഉത്തരവിലുള്ളത്.
ഈ ഉത്തരവു നിലനില്ക്കേയാണ് പ്രയാര് ഗോപാലകൃഷ്ണന്റെ നേതൃത്വത്തിലുള്ള ദേവസ്വം ബോര്ഡ്, വാജി വാഹനം 2017ല് തന്ത്രിക്കു നല്കിയത്. പൂജാ ഭാഗമായി ഏതെങ്കിലും സാധനങ്ങള് മാറ്റേണ്ട സാഹചര്യം വരികയാണെങ്കില് അത് ദേവസ്വത്തിന്റെ സ്വത്തുതന്നെയാണെന്നും അതാര്ക്കും കൊണ്ടുപോകാന് അവകാശമില്ലെന്നുമാണ് ഉത്തരവില്. ഇതിന്റെ സര്ക്കുലര് തിരുവിതാംകൂര് ദേവസ്വം ബോര്ഡിനു കീഴിലെ എല്ലാ ദേവസ്വം ഓഫീസുകളിലേക്കും നല്കിയിട്ടുണ്ട്.
ഈ ഉത്തരവു പ്രകാരം പ്രയാര് ഗോപാലകൃഷ്ണന്റെ നേതൃത്വത്തിലുള്ള ബോര്ഡ് അന്വേഷണ പരിധിയില് വരും. അതിനിടെ, സ്വര്ണക്കൊള്ളക്കേസില് അറസ്റ്റിലായ ദേവസ്വം ബോര്ഡ് മുന് അംഗവും സിപിഎം പ്രതിനിധിയുമായ എന്. വിജയകുമാറിനെ വിജിലന്സ് കോടതി ഒരു ദിവസത്തെ പോലീസ് കസ്റ്റഡിയില് വിട്ടു. പ്രത്യേക അന്വേഷണ സംഘം സമര്പ്പിച്ച കസ്റ്റഡി അപേക്ഷയിലാണ് നടപടി.
