ന്യൂഡൽഹി : മഹാരാഷ്ട്ര മുൻസിപ്പൽ കോർപറേഷൻ തിരഞ്ഞെടുപ്പിൽ മഹായുതി വൻവിജയത്തിലേക്ക് നീങ്ങുന്നതിനിടെ കോൺഗ്രസ് നേതാവ് രാഹുൽ ഗാന്ധിയെ പരിഹസിച്ച് ബിജെപി. ‘മമ്മീ മേം ഫിർസേ ഇലക്ഷൻ ഹാർ ഗയാ’ (മമ്മീ, ഞാൻ വീണ്ടും തിരഞ്ഞെടുപ്പ് തോറ്റു) എന്ന കുറിപ്പോടെ രാഹുൽ ഗാന്ധിയുടെ മുഖമുള്ള എഡിറ്റഡ് വീഡിയോയാണ് ബിജെപി പങ്കുവെച്ചത്.
ബോളിവുഡ് നടൻ വരുൺ ധവാന്റെ ഏറെ വൈറലായൊരു സിനിമാദൃശ്യത്തിലാണ് രാഹുലിന്റെ തലചേർത്ത് ബിജെപി ഈ വീഡിയോ സൃഷ്ടിച്ചിരിക്കുന്നത്. വീഡിയോയ്ക്ക് ഒപ്പം നൽകിയിരിക്കുന്ന കുറിപ്പിൽ പാരമ്പര്യം, അഭിമാനം, അച്ചടക്കം എന്നിങ്ങനെയാണുള്ളത്.
കോൺഗ്രസിന്റെ തിരഞ്ഞെടുപ്പ് തുടർതോൽവികളെ പരോക്ഷമായി പരിഹസിച്ച് കൊണ്ടാണിത്.മഹാരാഷ്ട്രയിലെ 29 മുൻസിപ്പൽ കോർപറേഷനുകളിലേക്ക് നടന്ന തിരഞ്ഞെടുപ്പിൽ ബിജെപി നേതൃത്വം നൽകുന്ന മഹായുതി വലിയ വിജയമാണ് നേടിയിരിക്കുന്നത്
