കൊച്ചി : നടന് ദിലീപിനെ കണ്ട് പ്രിന്സിപ്പല് ജില്ലാ സെഷന്സ് ജഡ്ജി കോടതിയില് എഴുന്നേറ്റു നിന്നെന്ന് ചാനല് കാമറയ്ക്കു മുന്നില് പറഞ്ഞ മത്സ്യത്തൊഴിലാളി സംഘടനാ നേതാവിനെതിരെ കോടതിയലക്ഷ്യ നടപടി. ചാള്സ് ജോര്ജ് എന്നയാള്ക്കെതിരെയാണ് കേസെടുത്തത്. നടിയെ ആക്രമിച്ച കേസില് നടന് ദിലീപിനെ കുറ്റവിമുക്തനാക്കിയ വിധിയുമായി ബന്ധപ്പെട്ടാണ് എറണാകുളം പ്രിന്സിപ്പല് ജില്ലാ സെഷന്സ് കോടതി ജഡ്ജി ഹണി എം. വര്ഗീസിനെതിരെ ചാള്സ് ജോര്ജ് വിവാദ പരാമര്ശം നടത്തിയത്. ജഡ്ജിയെ പരസ്യമായി അപകീര്ത്തിപ്പെടുത്തുകയും ജുഡീഷ്യറിയെ അവഹേളിക്കുകയും ചെയ്തവര്ക്കെതിരെ നടപടിയെടുക്കണമെന്ന് ആവശ്യപ്പെട്ട് കേരള ജുഡീഷ്യല് ഓഫീസേഴ്സ് അസോസിയേഷന് ഹൈക്കോടതിയില് ഹര്ജി നല്കിയിരുന്നു.
ചാള്സ് ജോര്ജിന്റെ പ്രസ്താവന ജുഡീഷ്യല് ഓഫീസറുടെ സത്യസന്ധതയ്ക്കും നിഷ്പക്ഷതയ്ക്കും നേരെയുള്ള ആക്രമണമാണെന്ന് കണ്ടെത്തിയതിനെ തുടര്ന്നാണ് നടപടി.
