തൃശൂര്: കലോത്സവത്തിന്റെ ഒന്നാം വേദിയായ സൂര്യകാന്തിയില് ലാസ്യ വിരുന്നൊരുക്കി മോഹിനികള്. ഉദ്ഘാടനത്തിനുശേഷം അല്പം വൈകിയാണ് കലാപരിപാടികള് ആരംഭിച്ചതെങ്കിലും അതിന്റെ വൈഷമ്യം ഒട്ടും മുഖത്ത് വിരിയാതെ ശരീരത്തില് ലാസ്യവും മുഖത്ത് നവരസങ്ങളും വിരിയിച്ച് തരുണീമണികള് നിറഞ്ഞാടി.
വിരഹിണിയായ രാധ, ക്രോധാഗ്നിയില് ചാമുണ്ഡേശ്വരി, ദക്ഷന്റെ സദസ്സില് നിന്ന് നിന്ദിച്ച് ഇറക്കിവിട്ട സതി, വൈകുണ്ഠ പുരവാസന്, കൈലാസേശ്വരന്, ഗംഗാനദി, ശൂര്പ്പണഘ, എന്നിങ്ങനെ അനവധി കഥാപാത്രങ്ങള് വേദിയില് ചിലങ്ക കെട്ടിയാടി. പെണ്മക്കള് പൊന്മക്കള് എന്ന ചിന്താഗതിയോടെ മാതാപിതാക്കള് മെയ്യും മനവും വേദിയില് അര്പ്പിച്ച് മകളുടെ ചുവടുകള്ക്കായി കാതോര്ത്തിരുന്നു.
