ന്യൂദൽഹി : ജീവിതത്തിലെ തിരക്കുകൾ പരിഗണിച്ച് തിരഞ്ഞെടുപ്പ് രാഷ്ട്രീയത്തിലേക്കില്ലെന്ന് വ്യക്തമാക്കി സോഹോ കോർപറേഷൻ സ്ഥാപകൻ ശ്രീധർ വെമ്പു . സോഹോയും അറട്ടൈയുമായി ടെക് ലോകത്ത് ഇന്ത്യയുടെ വ്യക്തിമുദ്ര പതിപ്പിച്ച അദ്ദേഹം രാഷ്ട്രീയത്തിലേയ്ക്ക് ഇറങ്ങുന്നുവെന്ന ധാരണകളെ പൊളിച്ചാണ് അദ്ദേഹത്തിന്റെ സോഷ്യൽ മീഡിയ പോസ്റ്റ്.
‘‘ഇന്ത്യയെ സാങ്കേതികപരമായി ശക്തവും സ്വയംപര്യാപ്തവുമാക്കുകയാണ് എന്റെ ജീവിതത്തിലെ ഒരേയൊരു ലക്ഷ്യം. കഴിഞ്ഞ 1,000 വർഷത്തിനിടയിൽ നമ്മുടെ സംസ്ക്കാരത്തിന് ഒട്ടേറെ മുറിവുകളേറ്റു. കൊളോണിയൽ ചിന്താഗതിയാണ് ഇതിലൊന്ന്. ഒരു രാജ്യമെന്ന നിലയിൽ നമ്മുടെ അഭിമാനം പുനഃസ്ഥാപിക്കാൻ ലോകോത്തര നിലവാരത്തിലുള്ള സാങ്കേതിക വിദ്യ ആവശ്യമാണ്. ഗ്രാമീണ മേഖലയിലെ കഴിവുള്ള ആൾക്കാരെ ഉൾപ്പെടുത്തി അത് സാധ്യമാക്കിയാൽ സമ്പത്ത് സമൂഹത്തിന്റെ എല്ലാ തട്ടിലേക്കും എത്തും.
രാഷ്ട്രീയത്തെ പൊതുസേവനമായാണ് ഞാൻ പരിഗണിക്കുന്നത്. രാഷ്ട്രീയത്തിൽ ഇടപെടേണ്ടത് ഓരോ പൗരന്റെയും ജനാധിപത്യ കടമയാണെന്നും ഞാൻ വിശ്വസിക്കുന്നു. എന്നാൽ ജീവിത്തിലെ തിരക്കുകൾ പരിഗണിച്ച് തിരഞ്ഞെടുപ്പ് രാഷ്ട്രീയത്തിലേക്കില്ല. ഭാരത് മാതാ കീ ജയ്’’ – ഇങ്ങനെയാണ് വെമ്പുവിന്റെ പോസ്റ്റ്.
