അരൂര്: ദേശീയപാത നവീകരണ പ്രവര്ത്തനങ്ങളുടെ ഭാഗമായി അരൂര് തുറവൂര് ഉയരപ്പാത നിര്മാണം അവസാന ഘട്ടത്തില്. 85 ശതമാനത്തോളം പണികള് പൂര്ത്തിയായി. നാലിടത്തായി 40 ഗര്ഡറുകള് മാത്രമാണ് സ്ഥാപിക്കാനുള്ളത്. 2605 ഗര്ഡറുകള് ഇതിനകം സ്ഥാപിച്ചു. 374 ഒറ്റത്തൂണുകളിലാണ് 12 കിലോമീറ്റര് ആറുവരിപ്പാത കടന്നുപോകുന്നത്. അരൂര്, എഴുപുന്ന, കോടംതുരുത്ത്, കുത്തിയതോട്, തുറവൂര് എന്നീ ഗ്രാമ പഞ്ചായത്തുകളിലൂടെയാണ് പാത കടന്നു പോകുന്നത്.
രാജ്യത്തെ ഏറ്റവും വലിയ ഉയരപ്പാതയാണിത്. ഇനി അരൂര് പള്ളി ജങ്ഷനില് 10 ഗര്ഡറുകള് ഉയര്ത്താനുണ്ട്. ഇവിടെ ജോലികള് പുരോഗമിക്കുകയാണ്.
പാത നിര്മ്മാണത്തിനിടെ അശാസ്ത്രീയമായ ഗതാഗതക്രമീകരണങ്ങള് കാരണം വര്ഷത്തിലേറെയായി യാത്രക്കാരും പ്രദേശവാസികളും ഏറെ വലയുകയാണ്. മണിക്കൂറുകള് നീണ്ട ഗതാഗതകുരുക്കാണ് അനുഭവപ്പെടുന്നത്. നിരവധി അപകടങ്ങളും സംഭവിച്ചു കഴിഞ്ഞു. നൂറു കണക്കിന് ആളുകള്ക്ക് പരിക്കേറ്റു. നിരവധി ജീവനുകള് നഷ്ടമായി. നിര്മ്മാണ കമ്പനിയുടെ അനാസ്ഥയിലും നിരവധി ജീവനുകളും പൊലിഞ്ഞു. കടുത്ത പ്രതിഷേധത്തിനിടെയാണ് നിര്മ്മാണം പുരോഗമിക്കുന്നത്.
ഉയരപ്പാതയ്ക്കു മുകളിലൂടെ കടന്നുപോകുന്ന 110 കെവി വൈദ്യുത ലൈന് ഉയര്ത്തുന്ന പ്രവര്ത്തനങ്ങളും പുരോഗമിക്കുകയാണ്. അരൂര് ഗ്രാമീണ് സര്വീസ് സഹകരണ സംഘത്തിന്റെ ഭൂമിയോട് ചേര്ന്നാണ് ഈ പണികള് നടക്കുന്നത്. പളളി ജംക്ഷനില് വൈദ്യുത ലൈന് ഉയര്ത്തുന്ന പണികള് പൂര്ത്തിയാക്കിയാല് മാത്രമേ എആര് റസിഡന്സി ഹോട്ടലിനു സമീപമുള്ള ഇഎച്ച്ടി ലൈനുകള് ഉയര്ത്താനുള്ള നടപടികള് സ്വീകരിക്കൂ. ഇതാണ് ഈ ഭാഗത്ത് 23, 24, 25 പില്ലറുകള് ഗര്ഡറുകള് സ്ഥാപിക്കാന് കഴിയാതെ നാളുകളായി നോക്കുകുത്തിയായി നിലകൊള്ളുന്നത്. എആര് ഹോട്ടലിനു സമീപം മൂന്ന് തൂണുകളില് 21 ഗര്ഡറുകളാണ് ഇനി സ്ഥാപിക്കേണ്ടത്. ഇവിടെയും റോഡിന്റെ ഇരു ഭാഗങ്ങളിലും താല്ക്കാലികമായി ടവര്ലൈന് സ്ഥാപിച്ച് വൈദ്യുതി തടസ്സമില്ലാതെ കേബിള് വലിക്കണം.
കുത്തിയതോട് പാലത്തിലും ഗര്ഡറുകള് ഉയര്ത്താനുണ്ട്. ഇവിടങ്ങളില് ലോഞ്ചിങ് ഗ്യാന്ട്രിയുടെ സഹായമില്ലാതെയാണ് ഒന്നിലേറെ വലിയ ക്രെയിന് ഉപയോഗിച്ച് ഗര്ഡറുകള് സ്ഥാപിക്കേണ്ടത്. റോഡു നിര്മാണത്തോടൊപ്പം ഇരു ഭാഗത്തും കാനയുടെ നിര്മാണവും നടക്കുന്നുണ്ട്.
