പൂനെ: ഓപ്പറേഷന് സിന്ദൂറിന്റെ ഫലമായി ഭരണഘടനയിലും സൈന്യത്തിലും മാറ്റങ്ങള് വരുത്താന് പാകിസ്ഥാന് നിര്ബന്ധിതരായതായി ഭാരത സംയുക്ത സേനാ മേധാവി ജനറല് അനില് ചൗഹാന്. ഓപ്പറേഷന് സിന്ദൂരില് പാകിസ്ഥാന് നേരിട്ട പരാജയങ്ങളെ പ്രതിഫലിപ്പിക്കുന്നതാണ് പുതിയ ഭരണഘടനാ ഭേദഗതികളെന്നും അദ്ദേഹം ചൂണ്ടിക്കാട്ടി. ഗോഖലെ ഇന്സ്റ്റിറ്റ്യൂട്ട് ഓഫ് പൊളിറ്റിക്സ് ആന്ഡ് ഇക്കണോമിക്സില് നടന്ന ‘പൂനെ പബ്ലിക് പോളിസി ഫെസ്റ്റിവല് 2026’ നെ അഭിസംബോധന ചെയ്യുകയായിരുന്നു അദ്ദേഹം.
‘പാകിസ്ഥാനില് കൊണ്ടുവന്ന മാറ്റങ്ങള്, തിടുക്കത്തില് നടത്തിയ ഭരണഘടനാ ഭേദഗതി ഉള്പ്പെടെ, ഈ ഓപ്പറേഷനിലെ അവരുടെ പരാജയത്തിന്റെ അംഗീകാരമാണ്. അവര് ധാരാളം പോരായ്മകളും കണ്ടെത്തി’, സംയുക്ത സേനാ മേധാവി പറഞ്ഞു.
പാകിസ്ഥാന് ഭരണഘടനയുടെ ആര്ട്ടിക്കിള് 243ലെ ഭേദഗതി രാജ്യത്തിന്റെ ഉന്നത പ്രതിരോധ സംഘടനയില് കാര്യമായ മാറ്റങ്ങള് വരുത്തി. മൂന്ന് സേനകളുടെയും സംയുക്ത പ്രവര്ത്തനം കൈകാര്യം ചെയ്തിരുന്ന ജോയിന്റ് ചീഫ്സ് ഓഫ് സ്റ്റാഫ് കമ്മിറ്റി ചെയര്മാന് സ്ഥാനം നിര്ത്തലാക്കുകയും പകരം, പാകിസ്ഥാന് ചീഫ് ഓഫ് ഡിഫന്സ് ഫോഴ്സ് (സിഡിഎഫ്) എന്ന പദവി സൃഷ്ടിക്കുകയും ചെയ്തു. നാഷണല് സ്ട്രാറ്റജി കമാന്ഡ്, ആര്മി റോക്കറ്റ് ഫോഴ്സ് കമാന്ഡ് എന്നീ പദവികളും കൊണ്ടുവന്നിട്ടുണ്ടെന്ന് അദ്ദേഹം വിശദീകരിച്ചു. ഇതെല്ലാം ഓപ്പറേഷന് സിന്ദൂറിലെ പരാജയത്തിലൂടെയാണ് പാകിസ്ഥാന് മനസിലാക്കിയതെന്ന് അനില് ചൗഹാന് കൂട്ടിച്ചേര്ത്തു.
