ന്യൂദല്ഹി: ശത്രുവിന്റെ കരണം പുകയ്ക്കുന്ന യുദ്ധോപകരണങ്ങളാണ് ഇന്ത്യ ഓപ്പറേഷന് സിന്ദൂറില് ഉപയോഗിച്ചത്. ഇത് കണ്ട് ലോകം ഞെട്ടി. പക്ഷെ അതിന് പിന്നില് മോദിയുടെ ആസൂത്രിതമായ കാഴ്ചപ്പാടായിരുന്നു എന്ന് പലര്ക്കും അറിയില്ല. മോദിയുടെ വിദേശയാത്രകളെ കുറ്റം പറഞ്ഞ കോണ്ഗ്രസ് മോദി എന്തൊക്കെയാണ് ഈ യാത്രയില് നിന്നും ഗ്രഹിച്ചതെന്ന് മനസ്സിലാക്കിയില്ല. ഇസ്രയേല് എന്ന രാജ്യത്തിന്റെ പ്രതിരോധരംഗത്തെ വളര്ച്ച മോദി സസൂക്ഷ്മം പഠിച്ചു. അങ്ങിനെയാണ് അതിന് തത്തുല്ല്യമായ ഒരു അന്തരീക്ഷം എന്തുകൊണ്ട് ഭാരതത്തിനായിക്കൂട എന്ന് ചിന്തിച്ചത്.
1500 കോടി രൂപ ചെലവഴിച്ച് മോദി സര്ക്കാര് 2018ല് തുടങ്ങിവെച്ച ഐഡെക്സ് എന്ന പദ്ധതി കഴിഞ്ഞ ഏഴ് വര്ഷമായി ഇന്ത്യയില് ഒരു നിശ്ശബ്ദ വിപ്ലവം തീര്ക്കുകയായിരുന്നു. ഐ ഡെക്സ് (iDEX- Innovation for Defence Excellence)എന്നതിന്റെ മുഴുവന് പേര് ഇന്നവേഷന് ഫോര് ഡിഫന്സ് എക്സലന്സ് എന്നാണ്. പ്രതിരോധ, എയ്റോസ്പേസ് രംഗത്ത് ഇന്നവേഷനും ടെക്നോളജി വികസനവും ലക്ഷ്യമാക്കിയുള്ള കേന്ദ്ര പ്രതിരോധവകുപ്പിന്റെ പദ്ധതിയായിരുന്നു ഐഡെക്സ്. ഇതിന്റെ ലക്ഷ്യം ഇന്ത്യയ്ക്കാവശ്യമുള്ള ആയുധങ്ങള് ഇന്ത്യയില് തന്നെ നിര്മ്മിക്കുക. കാലത്തിന്റെ കുതിപ്പനനുസരിച്ച് ലോകരാഷ്ട്രങ്ങളോട് മുട്ടാന് പാകത്തിലുള്ള ആധുനികമായ ആയുധങ്ങള് വികസിപ്പിക്കുക. ഇടനിലക്കാരന് ഭീമന് കൈക്കൂലി കൊടുത്ത് ആയുധങ്ങള് വിദേശരാജ്യങ്ങളില് നിന്നും വെറുതെവാങ്ങിക്കൂട്ടാന് പറ്റില്ല. പൂര്ണ്ണമായും സാങ്കേതിക വിദ്യ ഇന്ത്യയ്ക്ക് കൈമാറാന് തയ്യാറുള്ള രാജ്യങ്ങളുടെ ആയുധങ്ങള് മാത്രം വാങ്ങുക. ഏതൊരായുധവും വാങ്ങുന്നതിന് മുന്പ് അതിനെക്കുറിച്ച് ഗഹനമായി പഠിക്കുക, താരതമ്യപഠനം നടത്തുക. സ്വകാര്യമേഖലയെക്കൂടി ആയുധനിര്മ്മാണത്തില് പങ്കാളികളാക്കുക. ഇതൊക്കെ ഐഡെക്സിന്റെ ഭാഗമായിരുന്നു.
ഇതിനായി കേന്ദ്രസര്ക്കാര് ചെലവിട്ടത് 1500 കോടിയാണ്. സ്റ്റാര്ട്ടപ്പുകളെയും വ്യവസായങ്ങളേയും വ്യക്തികളേയും റിസര്ച്ച് ആന്റ് ഡവലപ്മെന്റ് സ്ഥാപനങ്ങളെയും ഐഐടി, എന്ഐടി പോലുള്ള അക്കാദമിക് സ്ഥാപനങ്ങളേയും ഉള്ക്കൊള്ളിച്ചുകൊണ്ടുള്ള ഒരു സംവിധാനത്തിലൂടെ ഇന്ത്യയ്ക്കാവശ്യമായ പുത്തന് ആയുധങ്ങളും പ്രതിരോധസംവിധാനങ്ങളും തദ്ദേശീയമായ വികസിപ്പിച്ചു. ഇന്ത്യയ്ക്ക് ആവശ്യമായ ആയുധങ്ങള് ഇന്ത്യയില് വികസിപ്പിക്കുക എന്ന അര്ത്ഥത്തില് 2014 മുതലേ മെയ്ക്ക് ഇന് ഇന്ത്യ പദ്ധതി പ്രതിരോധ രംഗത്ത് ഇന്ത്യ നടപ്പാക്കിത്തുടങ്ങിയിരുന്നു.
കഴിഞ്ഞ എട്ട് വര്ഷമായി മോദി സര്ക്കാരിന്റെ കീഴില് നടന്നുവരികയായിരുന്നു ഐഡെക്സ് എന്ന നിശ്ശബ്ദ വിപ്ലവത്തിന്റെ ഫലമാണ് ഓപ്പറേഷന് സിന്ദൂറിലൂടെ ലോകം കണ്ടത്. ഒപ്പം പത്ത് വര്ഷമായി നടന്നുവരുന്ന മെയ്ക്ക് ഇന് ഇന്ത്യയും പ്രതിരോധരംഗത്ത് ഇന്ത്യയുടെ മുഖച്ഛായ മാറ്റി.ഇന്ത്യയുടെ കിറുകൃത്യതയോടെയുള്ള പ്രെസിഷന് മിസൈല് സ്ട്രൈക്ക് കണ്ട് പാകിസ്ഥാനേക്കാള് കൂടുതല് ഞെട്ടിയത് ചൈനയാണ്. കാരണം അവരുടെ വ്യോമപ്രതിരോധമൊന്നും ഇന്ത്യയുടെ മിസൈല് ആക്രമണത്തിന് മുന്പില് ഫലിച്ചില്ല. അങ്ങിനെ ഓപ്പറേഷന് സിന്ദൂര് എന്ന പ്രതികാരം ഇന്ത്യയുടെ ടെക്നോളജി ഡിക്ലറേഷന് കൂടിയായി മാറി.
ഇന്ത്യ ആയുധങ്ങള് വിദേശത്ത് വാങ്ങുന്ന ഒരു ബയര് മാത്രമല്ല, ഇന്ന് ആഭ്യന്തരമായി എണ്ണം പറഞ്ഞ നെക്സ്റ്റ് ജനറേഷന് (വരും തലമുറ) യുദ്ധോപകരണങ്ങള് ഉണ്ടാക്കാനും അത് അസ്സലായി ഉപയോഗിക്കാനും അറിയാവുന്ന ആയുധ ഉല്പാദക രാജ്യമായി നരേന്ദ്രമോദിയുടെ പത്ത് വര്ഷത്തില് ഇന്ത്യ മാറിയിരിക്കുന്നു എന്ന് ലോകം അറിഞ്ഞു.
ജന്മഭൂമി ഓണ്ലൈന്