ന്യൂദല്ഹി: രാഹുല് ഗാന്ധിയുടെ സ്വഭാവത്തില് മാറ്റം വന്നിരിക്കുന്നുവെന്ന സൂചനകളുമായി ബിജെപി നേതാവ് സുധാംശു ത്രിവേദി. പണ്ട് രാഹുല് ഗാന്ധിയെ പപ്പുവെന്ന് വിളിച്ച സുധാംശു ത്രിവേദി ഇപ്പോഴത്തെ രാഹുല് ഗാന്ധിയെ വില്ലന് എന്ന് വിളിക്കാനാണ് ഇഷ്ടപ്പെടുന്നത്.
ഇതിന് പിന്നില് രാഹുല് ഗാന്ധി വിദേശരാജ്യങ്ങളില് നടത്തുന്ന യാത്രകളാണ്. അവിടങ്ങളില് വെച്ച് വിദേശശക്തികളുമായി ചേര്ന്നുള്ള ഗൂഢാലോചനയില് രാഹുല് ഗാന്ധി പങ്കെടുക്കുന്നുണ്ടെന്നും ലക്ഷ്യം രാജ്യത്തെ അസ്ഥിരപ്പെടുത്തലാണെന്നും സുധാംശു ത്രിവേദി പറയുന്നു.
രാഹുല് ഗാന്ധി രാജ്യത്തെ അസ്ഥിരപ്പെടുത്താന് അന്താരാഷ്ട്ര ഗൂഢാലോചനകളില് സജീവമായി ഏര്പ്പെടുകയാണെന്ന് അതുകൊണ്ട് പണ്ട് വിളിച്ചതുപോലെ ബുദ്ധിയുള്ള വിഡ്ഡി എന്ന് രാഹുല് ഗാന്ധിയെ വിളിക്കാന് സാധിക്കില്ലെന്നാണ് ഐഎഎന്എസ് സംഘടിപ്പിച്ച ചര്ച്ചയില് സംസാരിച്ച സുധാംശു ത്രിവേദി പറയുന്നത്.
2018ല് രാഹുല് ഗാന്ധിയെ പപ്പു എന്ന് വിളിച്ചവരുടെ കൂട്ടത്തില് സുധാംശു ത്രിവേദിയും ഉണ്ടായിരുന്നു. പണ്ട് ബ്രിട്ടനിലെ ജെയിംസ് രാജാവ് ബക്കിംഗ് ഹാമിലെ യുവാവായ പ്രഭുവിനെ വിശേഷിപ്പിച്ച വാചകം കടമെടുത്ത് രാഹുല് ഗാന്ധിയെ ബുദ്ധിയുള്ള വിഡ്ഡി എന്ന്വ വിളിക്കുന്നവരുടെ കൂട്ടത്തില് സുധാംശു ത്രിവേദിയും ഉണ്ടായിരുന്നു. പക്ഷെ പിന്നീട് രാഹുല് ഗാന്ധിയുടെ സ്വഭാവത്തില് പിന്നീടുള്ള വര്ഷങ്ങളില് മാറ്റം.വന്നു.
2023ല് അമേരിക്കയിലെ സ്റ്റാന്ഫോര്ഡ് സര്വ്വകലാശാലയില് നടത്തിയ പ്രസംഗത്തില് ഇന്ത്യയുടെ ജനാധിപത്യത്തെ പരിഹസിക്കുകയായിരുന്നു രാഹുല് ഗാന്ധി. ഇതെല്ലാം മോദി ഭരണത്തെ അട്ടിമറിക്കുമെന്ന് പ്രഖ്യാപനം നടത്തിയ യുഎസിലെ ശതകോടീശ്വരന് ജോര്ജ്ജ് സോറോസിന്റെ പിന്തുണയോടെയാണ് രാഹുല് ഗാന്ധി നടത്തിയതെന്ന് പറയപ്പെടുന്നു. ജോര്ജ്ജ് സോറോസിന്റെ പല എന്ജിഒ സംഘടനകളുടെയും ചുമതലയുള്ളവരുമായി പല രാജ്യങ്ങളിലും രാഹുല് കൂടിക്കാഴ്ച നടത്തുന്നുണ്ട്. ഈയിടെ ജര്മ്മനിയില് പോയപ്പോള് നിരവധി ജോര്ജ്ജ് സോറോസ് സംഘടനകളുടെ പ്രതിനിധികളുമായി രാഹുല് ഗാന്ധി കൂടിക്കാഴ്ച നടത്തിയിരുന്നു. നേരത്തെ ജോര്ജ്ജ് സോറോസിന്റെ പ്രധാന പ്രവര്ത്തകരില് ഒരാളായ ഇന്ത്യക്കാരിയായ സുനിത വിശ്വനാഥുമായി രാഹുല് ഗാന്ധി അമേരിക്കയില് കൂടിക്കാഴ്ച നടത്തിയിരുന്നു. ഹിന്ദുത്വ ചിന്താഗതികളേയും ആശയങ്ങളേയും തകര്ക്കുന്ന അജണ്ട ഏറ്റെടുത്ത വ്യക്തിയാണ് സുനിത വിശ്വനാഥ്.
ഇന്ത്യയില് നടത്തിയ ഭാരത് ജോഡോ യാത്രയിലും രാഹുല് ഗാന്ധിക്ക് ജോര്ജ്ജ് സോറോസിന്റെയും അമേരിക്കയിലെ സമാന്തര അധികാരവ്യവസ്ഥയായ ഡീപ് സ്റ്റേറ്റിന്റെയും പിന്തുണ ഉണ്ടായിരുന്നു. അടിക്കടിയുള്ള രാഹുല് ഗാന്ധിയുടെ വിദേശയാത്രകള് സംഘടിപ്പിക്കുന്നതും പ്രസംഗിക്കുന്ന അജണ്ട തയ്യാറാക്കുന്നതും ഈ വിദേശശക്തികളാണ്. ജെന്സീ തലമുറയെ കലാപത്തിലേക്ക് തള്ളിവിടാന് രാഹുല് ഗാന്ധി അടിക്കടി ശ്രമിക്കുന്നത് ഈ അജണ്ടയുടെ ഭാഗമാണ്. വോട്ട് ചോരി എന്ന ആരോപണവും രാജ്യത്തെ അസ്ഥിരപ്പെടുത്താനുള്ള നീക്കത്തിന്റെ ഭാഗമാണ്. കര്ഷക കലാപം, പൗരത്വ വിരുദ്ധ പ്രക്ഷോഭം തുടങ്ങിയ പ്രക്ഷോഭങ്ങള് ഇതിന്റെ തുടക്കമായിരുന്നു.
അപകടകാരിയായ രാഹുല് ഗാന്ധിയുടെ ഈ മുഖം ഇതുവരെ പരിചിതമായ മുഖമല്ല. അതിനാലാണ് രാഹുല് ഗാന്ധി അന്താരാഷ്ട്ര ശക്തികളുമായി ചേര്ന്ന് ഇന്ത്യയെ അട്ടിമറിക്കാന് ശ്രമിക്കുന്ന വില്ലനായ വ്യക്തിയാണെന്നും സുധാംശു ത്രിവേദി അഭിപ്രായപ്പെട്ടത്.
