മുംബൈ: വനിതാ പ്രീമിയര് ലീഗ് നാലാം സീസണിന് ഇന്ന് തുടക്കം. ഉദ്ഘാടന മത്സരത്തില് നിലവിലെ ജേതാക്കളായ മുംബൈ ഇന്ത്യന്സ് മുന് ജേതാക്കളായ റോയല് ചലഞ്ചേഴ്സ് ബെംഗളൂരുവിനെ നേരിടും. ആദ്യ മത്സരം മുംബൈയിലെ ഡിവൈ പാട്ടീല് സ്റ്റേഡിയത്തിലാണ്. രാത്രി ഏഴരയ്ക്കാണ് മത്സരങ്ങളെല്ലാം.
പതിവ് പോലെ ഇത്തവണയും അഞ്ച് ടീമുകളാണ് മാറ്റുരയ്ക്കുന്നത്. എല്ലാ ടീമുകളും പരസ്പരം റണ്ട് തവണ വീതം ഏറ്റുമുട്ടുന്ന ലീഗ് റൗണ്ട്. അതില് നിന്നും പോയിന്റ് അടിസ്ഥാനത്തില് മുന്നിലെത്തുന്ന മൂന്ന് ടീമുകള് പ്ലേഓഫ് മത്സരം കളിക്കും. പട്ടികയില് മുന്നിലെത്തുന്നവര് നേരിട്ട് ഫൈനലില് എത്തും. രണ്ടും മൂന്നൂം സ്ഥാനക്കാര് പരസ്പരം ഏറ്റുമുട്ടുന്ന എലിമിനേറ്റര് റൗണ്ടില് ജയിക്കുന്നവര് ഫൈനലിന് യോഗ്യത നേടും. ഫെബ്രുവരി അഞ്ചിന് ഫൈനലോടെ ഭാരത വനിതാ ക്രിക്കറ്റ് പൂരം 2026ന് കൊടിയിറങ്ങും.
നാളെ രണ്ട് മത്സരങ്ങളുണ്ടാകും. 17 വരെ എല്ലാ ദിവസവും മത്സരങ്ങളുണ്ടാകും. അതിന് ശേഷം ഇടയ്ക്കിടെ ഇടവേളയും. അടുത്ത മാസം ഒന്നിന് ദല്ഹി ക്യാപിറ്റല്സ്-യുപി വാരിയേഴ്സ് പോരാട്ടത്തോടെ ലീഗ് മത്സരങ്ങള് അവസാനിക്കും. ആകെ 20 മത്സരങ്ങളാണ് ലീഗ് ഘട്ടത്തിലുള്ളത്. ഫൈനല് ഉള്പ്പെടെ 22 മത്സരങ്ങളാണ് ഷെഡ്യൂള് ചെയ്തിട്ടുള്ളത്.
കഴിഞ്ഞ സീസണില് മുംബൈ ഇന്ത്യന്സ് ആണ് ജേതാക്കളായത്. കഴിഞ്ഞ മാര്ച്ച് 25ന് നടന്ന ഫൈനലില് ദല്ഹി ക്യാപിറ്റല്സിനെ എട്ട് റണ്സിന് തോല്പ്പിച്ചാണ് മുംബൈ രണ്ടാം വട്ടവും പ്രീമിയര് കിരീടം ചൂടിയത്. പ്രഥമ ഐപിഎല് സീസണില് മുംബൈ ആണ് ജേതാക്കളായത്. അന്നും ഫൈനലിലെ എതിരാളികള് ദല്ഹി ക്യാപിറ്റല്സ് ആയിരുന്നു. 2024 ഐപിഎല്ലിലും ദല്ഹി ക്യാപിറ്റല്സ് ഫൈനലിലെത്തിയതാണ്. പക്ഷെ ജേതാക്കളായത് റോയല് ചലഞ്ചേഴ്സ് ബെംഗളൂരു ആണ്. ഭാരത ക്രിക്കറ്റ് ടീം നായിക ഹര്മന്പ്രീത് കൗര് ആണ് മുംബൈ നായിക. റോയല് ചലഞ്ചേഴ്സിനെ നയിക്കുന്നത് ഭാരത വൈസ് ക്യാപ്റ്റന് സ്മൃതി മന്ദനയും. 2024ല് സ്മൃതിക്ക് കീഴിലാണ് ആര്സിബി കിരീടം നേടിയത്.
ഡൈ വൈ പാട്ടീല് സ്റ്റേഡിയത്തിന് പുറമെ ബറോഡ ക്രിക്കറ്റ് സ്റ്റേഡിയം ആണ് ഇത്തവണത്തെ വേദികളില് ഒന്ന്. എലിമിനേറ്റര് മത്സരവും ഫൈനലും നടക്കുന്നത് ബറോഡയിലായിരിക്കും.
