തിരുവനന്തപുരം: എ കെ ബാലന്റെ ജമാഅത്തെ ഇസ്ലാമി പരാമര്ശത്തില് സി പി എമ്മില് ഭിന്നത. മുഖ്യമന്ത്രി പിണറായി വിജയന് ബാലനെ വാര്ത്താസമ്മേളനത്തില് ന്യായീകരിച്ചപ്പോള് സി പി എം സംസ്ഥാന സെക്രട്ടറി എം വി ഗോവിന്ദന് ബാലനെ തളളി.
എകെ ബാലന്റെ പരാമര്ശം നിരുത്തരവാദപരമെന്ന് എംവി ഗോവിന്ദന് പറഞ്ഞു. തിരുവനന്തപുരം ജില്ലാ കമ്മിറ്റി യോഗത്തില് സംസാരിക്കുമ്പോഴാണ് എംവി ഗോവിന്ദന് എകെ ബാലനെ തള്ളിപ്പറഞ്ഞത്.ബാലനെതിരെ തിരുവനന്തപുരം ജില്ലാ കമ്മിറ്റി യോഗത്തില് വിമര്ശനം ഉയര്ന്നപ്പോഴാണ് എം വി ഗോവിന്ദനും അതിനോട് യോജിച്ച് കൊണ്ട് ബാലനെ തളളിപ്പഞ്ഞത്.
ബാലന് സാങ്കല്പിക ചോദ്യത്തിന് സാങ്കല്പിക ഉത്തരം നല്കുകയായിരുന്നുവെന്നും പാര്ട്ടി സംസ്ഥാന സെക്രട്ടറി പറഞ്ഞു. പാര്ട്ടി അതിനെ തള്ളിക്കളയുന്നു.അതുകൊണ്ടാണ് മാധ്യമങ്ങള് ചോദിച്ചപ്പോള് താന് മറുപടി നല്കാതിരുന്നതെന്നും എം വി ഗോവിന്ദന് പറഞ്ഞു.
എ കെ ബാലനെ തള്ളാതെയുള്ള നിലപാടാണ് മുഖ്യമന്ത്രി നേരത്തേ സ്വീകരിച്ചത്. ജമാ അത്തെ ഇസ്ലാമിക്കെതിരെ എന്തെങ്കിലും പറഞ്ഞാല് അത് ന്യൂനപക്ഷങ്ങള്ക്കെതിരെയല്ലെന്നാണ് മുഖ്യമന്ത്രി പിണറായി വിജയന്റെ പ്രതികരണം.
യു ഡി എഫ് അധികാരത്തില് എത്തിയാല് ആഭ്യന്തരം ഭരിക്കുക ജമാ അത്തെ ഇസ്ലാമി ആയിരിക്കുമെന്നാണ് ബാലന് കഴിഞ്ഞ ദിവസം പറഞ്ഞത്. അവര് ഭരിച്ചാല് മാറാട് കലാപങ്ങള് ആവര്ത്തിക്കുമെന്നും പറഞ്ഞു.ഇതിനെ ശക്തമായി വിമര്ശിച്ച് കോണ്ഗ്രസും ലീഗും രംഗത്ത് വന്നിരുന്നു.
