മോസ്കോ: വെനസ്വേലയിലെ സൈനിക ഇടപെടലിന്റെ വിജയത്തില് ആഘോഷിക്കുന്ന ഡൊണാള്ഡ് ട്രംപിനും അമേരിക്കയ്ക്കും താക്കീത് നല്കി റഷ്യന് പ്രസിഡന്റ് വ്ളാഡിമിര് പുടിന്. വെനസ്വേലയില് കടന്നു കയറി അവിടുത്തെ പ്രസിഡന്റ് മഡുറോയെ പിടികൂടി കൊണ്ടുപോയതിന്റെ വിജയാഹ്ളാദം അമേരിക്കയുടെ നാളത്തെ ദുരന്തമായി മാറാമെന്ന മുന്നറിയിപ്പാണ് പുടിന് നല്കുന്നത്.
“യൂഗോസ്ലാവ്യയെയും സിറിയയേയും ഇറാഖിനെയും അമേരിക്ക ആക്രമിച്ചു. അമേരിക്കയ്ക്കെതിരെ യുഎന് സുരക്ഷാകൗണ്സിലിന്റെ എന്തെങ്കിലും ഉപരോധം ഉണ്ടായോ? ഇല്ല. അവര് തീരുമാനിക്കുന്നു. അവരത് ചെയ്യുന്നു. ഇപ്പോള് അവര് പറയുന്നു, ഇതാണ് അന്താരാഷ്ട്ര നിയമമെന്ന്.” – പുടിന് ആഞ്ഞടിച്ചു.
ഇറാഖ്, അഫ്ഗാനിസ്ഥാന്, സിറിയ എന്നിവിടങ്ങളില് യുഎസ് നടത്തിയ ഇടപെടലുകളോട് വെനസ്വേല സംഭവത്തെ റഷ്യന് സെനറ്ററായ അലക്സി പുഷ്കോവ് താരതമ്യം ചെയ്യുന്നത്. ഈ രാജ്യങ്ങളിലെ അമേരിക്കയുടെ വിജയം ഇപ്പോള് അവിടെ സുദീര്ഘമായ ഏറ്റുമുട്ടലുകള്ക്കും അസ്ഥിരതയ്ക്കും വഴിമാറിയിരിക്കുകയാണ്. – അലക്സി പുഷ്കോവ് പറയുന്നു.
വെനസ്വേലയിലെ ഇടപെടലിലൂടെ 19ാം നൂറ്റാണ്ടിലെ സാമ്രാജ്യത്വഅധിനിവേശം വീണ്ടും അമേരിക്ക പുനരാരംഭിച്ചിരിക്കുന്നു. ഇത് അന്താരാഷ്ട്ര യുഎന് നിയമങ്ങളുടെ ലംഘനമാണ്. എന്തായാലും വെനസ്വേലയിലെ അമേരിക്കയുടെയും ട്രംപിന്റെയും വിജയാഹ്ളാദം നാളത്തെ ദുരന്തത്തിന് കാരണമാവും – പുഷ്കോവ് താക്കീത് ചെയ്യുന്നു.
