സിഡ്‌നി: ആഷസ് പരമ്പര കൈവിട്ടതോടെ ഇംഗ്ലണ്ട് ക്രിക്കറ്റ് ടീം പരിശീലക സ്ഥാനത്ത് നിന്ന് പിന്‍മാറേണ്ടിവരുമെന്ന സമ്മര്‍ദ്ദത്തിലാണ് മുന്‍ ന്യൂസിലന്‍ഡ് താരം ബ്രെന്‍ഡന്‍ മക്കല്ലം. എന്നാല്‍ താരത്തിന് സമ്പൂര്‍ണ പിന്തുണയുമായാണ് ബെന്‍ സ്റ്റോക്സ് രംഗത്തെത്തിയിരിക്കുന്നത്. മക്കല്ലം പരിശീലക സ്ഥാനത്ത് നിര്‍ബന്ധമായും തുടരണമെന്നാണ് സ്റ്റോകസ് പറയുന്നത്.
2022ലാണ് ഇരുവരും ഇംഗ്ലണ്ട് ടീമിന്റെ നേതൃത്വത്തിലേക്കെത്തുന്നത്. ഈ കൂട്ടുകെട്ട് ആരംഭിച്ചത് 2022 മുതലാണ് നിരവധി കാര്യങ്ങള്‍ ചെയ്യാന്‍ സാധിച്ചു ആത്മവിശ്വാസത്തോടെ നയിക്കാന്‍ സാധിച്ചു. അതിന്റെയെല്ലാം അടിത്തറയായത് മക്കലത്തിന്റെ സാന്നിധ്യമാണെന്ന് സ്റ്റോക്സ് പറഞ്ഞു.
ഇംഗ്ലണ്ട് ക്രിക്കറ്റ് ബോര്‍ഡുമായുള്ള കരാര്‍ പ്രകാരം ക്യാപ്റ്റനായി സ്‌റ്റോക്‌സിന്റെയും കോച്ചായി മക്കല്ലത്തിന്റെയും കാലാവധി 2027 വരെയാണ്. തുടക്കത്തില്‍ ഇവരുടെ കൂട്ടുകെട്ടിന് കീഴില്‍ ആദ്യ 11 ടെസ്റ്റുകളില്‍ പത്തും ജയിക്കാന്‍ ഇംഗ്ലണ്ടിന് സാധിച്ചിരുന്നു. എന്നാല്‍ ഏറ്റവും ഒടുവിലത്തെ 34 ടെസ്റ്റുകളുടെ കണക്ക് നോക്കിയാല്‍ 16 വീതം ജയവും തോല്‍വിയുമാണ്. രണ്ടെണ്ണം സമനിലയില്‍ കലാശിച്ചു. ഈ കാലയളവില്‍ ടെസ്റ്റ് ക്രിക്കറ്റില്‍ വമ്പന്‍മാരായ ഓസ്‌ട്രേലിയ, ഇന്ത്യ ടീമുകള്‍ക്കെതിരെ ഇംഗ്ലണ്ടിന് പരമ്പര നേടാന്‍ സാധിച്ചിട്ടില്ല. ഇതിനൊപ്പം ആഷസ് ആദ്യ മൂന്ന് ടെസ്റ്റ് മത്സരങ്ങളില്‍ തുടര്‍തോല്‍വി വഴങ്ങിക്കൊണ്ട് പരമ്പര അടിയറ വച്ചിരിക്കുകയാണ്. ഇത് ക്യാപ്റ്റനെന്ന നിലയില്‍ സ്റ്റോക്‌സിന് വലിയ പ്രശ്‌നമുണ്ടാകില്ല. പക്ഷെ കോച്ച് മക്കല്ലത്തിനും ഇംഗ്ലണ്ട് ടീം ഡയറക്ടര്‍ റോബ് കീയ്‌ക്കും മേല്‍ വലിയ സമ്മര്‍ദ്ദമാണ് വരാന്‍ പോകുന്നത്. ഇത് മുന്നില്‍ കണ്ടുകൊണ്ടാണ് മക്കല്ലം കോച്ച് പദം ഒഴിയുന്നതിനെ കുറിച്ച് ആലോചിക്കുന്നത്.
