കോഴിക്കോട്: കെ-ടെറ്റ് വിഷയത്തില് വിദ്യാഭ്യാസ വകുപ്പ് പുറത്തിറക്കിയ സര്ക്കുലറിലെ കാര്യങ്ങളെല്ലാം കാറ്റില് പറത്തി നേരത്തെയെടുത്ത യോഗതീരുമാനങ്ങള്ക്ക് കടകവിരുദ്ധമായി ഉത്തരവിറക്കിയ വിദ്യാഭ്യാസ മന്ത്രി ശിവന്കുട്ടി കേരളത്തിലെ അദ്ധ്യാപകരെ വഞ്ചിച്ചു എന്ന് എന്ടിയു സംസ്ഥാന ജനറല് സെക്രട്ടറി ടി. അനൂപ് കുമാര്. കെ-ടെറ്റിന്റെ പേരില് അദ്ധ്യാപകരുടെ പ്രമോഷന് തടയില്ലെന്നാവര്ത്തിച്ച മന്ത്രിയാണ് ഈ വഞ്ചനാ നിലപാട് സ്വീകരിച്ചതെന്നും അദ്ദേഹം പറഞ്ഞു.
വിദ്യാഭ്യാസ അവകാശനിയമം ഹൈസ്കൂളില് ബാധകമല്ലെന്നതില് തികഞ്ഞ വ്യക്തയുണ്ടായിട്ടും ഹൈസ്കൂള് സ്ഥാനക്കയറ്റത്തില് കെ-ടെറ്റില്ലാത്തവരെ പരിഗണിക്കേണ്ടതില്ല എന്ന ഉത്തരവിറക്കിയ വിദ്യാഭ്യാസ വകുപ്പ് ഉദ്യോഗസ്ഥര് രാജാവിനേക്കാള് രാജഭക്തി കാണിക്കുകയാണ്. കേന്ദ്രസര്ക്കാര് 2010 ല് നടപ്പാക്കിയ വിദ്യാഭ്യാസ അവകാശനിയമം കേരളത്തില് സമയബന്ധിതമായി നടപ്പാക്കാതെ സംസ്ഥാനത്ത് വിദ്യാഭ്യാസ അവകാശ നിയമത്തില് ഭേദഗതി വരുത്തിയതും 2012 വരെ നടപ്പിലാക്കാതിരുന്നതും ഇതേ ഉദ്യോഗസ്ഥര് തന്നെയാണ്. ഇതിന്റെ തുടര്ച്ചയായി എംഎഡ്, പിഎച്ച്ഡി, സെറ്റ്, നെറ്റ് തുടങ്ങിയ ഉന്നത യോഗ്യതകള് ടെറ്റിന് പകരമായി ഉത്തരവാക്കിയതും ഇവര് തന്നെയാണ്. നിലവില് വന്ന സുപ്രീം കോടതി ഉത്തരവ് തത്വത്തില് നടപ്പാക്കാന് തിടുക്കം കൂട്ടുന്ന കേരള സര്ക്കാര് സുപ്രീംകോടതി പുതിയതായി ഇറക്കിയ ഉത്തരവിനെതിരെ റിവ്യൂ പെറ്റീഷന് നല്കാന് പോലും തയാറായിട്ടില്ലെന്നത് വകുപ്പിന്റെ ഇരട്ടത്താപ്പ് വ്യക്തമാക്കുന്നതാണ് എന്നും അനൂപ്കുമാര് കൂട്ടിച്ചേര്ത്തു.
