റായ്പൂര് ( ഛത്തിസ്ഗഡ് ) : സമരസഭാവം പ്രശ്നങ്ങളില്ലാത്ത സമൂഹത്തെ സൃഷ്ടിക്കുമെന്ന് സര്സംഘചാലക് ഡോ. മോഹന് ഭാഗവത് . ഭിന്നതകളില്ലാതാവുക മാത്രമല്ല സമൂഹത്തില് സമൃദ്ധവും ശാന്തവുമായ അന്തരീക്ഷം ഉണ്ടാവുകയും ചെയ്യുക എന്നത് അതിന്റെ ഫലമാണെന്ന് അദ്ദേഹം പറഞ്ഞു. സംഘ ശതാബ്ദിയുടെ ഭാഗമായി റായ്പൂര് ശ്രീരാമക്ഷേത്രത്തില് സംഘടിപ്പിച്ച സദ്ഭാവനാ യോഗത്തില് സംസാരിക്കുകയായിരുന്നു സര്സംഘചാലക് .
ഭാരതത്തില് ജനങ്ങള് സ്വന്തം വിശ്വാസങ്ങളും ആചാരങ്ങളും പാലിച്ചുകൊണ്ടുതന്നെ ഒരുമയോടെയാണ് ജീവിക്കുന്നത്. നമ്മളെല്ലാം ഒരേ കുടുംബത്തിലെ അംഗങ്ങളാണെന്ന ഭാവമാണ് ഈ ഒരുമയ്ക്ക് പിന്നിലുള്ളത്.ഈ ഒരുമയുടെ കരുത്തിലാണ് ബ്രിട്ടീഷുകാര് ഭാരതം വീട്ടു പോയത്, അദ്ദേഹം പറഞ്ഞു.
ഐക്യത്തിന്റെയും അഖണ്ഡതയുടെയും ചില കണ്ണികള് മറവിയിലാണ്ടുപോയതുമൂലമാണ് സമൂഹത്തില് വ്യത്യാസങ്ങള് ഉടലെടുത്തത്. ഐക്യം തകര്ക്കാനും ഭിന്നതകള് നിലനില്ക്കുന്നുവെന്ന് ഉറപ്പാക്കാനുമാണ് ബ്രിട്ടീഷുകാര് ശ്രമിച്ചത്.ആ ശ്രമങ്ങളെ നമ്മള് വീണ്ടും വീണ്ടും പരാജയപ്പെടുത്തി. നമ്മുടെ തനിമയില് മുന്നോട്ട് പോകാന് ഇന്ന് നമുക്ക് പൂര്ണ സ്വാതന്ത്ര്യമുണ്ട്. ഭിന്നതയുടെ ശക്തികള് പരാജയപ്പെടുന്നുണ്ടെന്ന് ഉറപ്പാക്കാന് നാം പരിശ്രമിച്ചു കൊണ്ടിരിക്കണം. ഓരോ സമൂഹവും വെല്ലുവിളികള് നേരിടുന്നുണ്ട്. ഓരോ സമൂഹത്തിനും പ്രതീക്ഷകളുമുണ്ട്. വൈവിധ്യം നിലനിര്ത്തിക്കൊണ്ടു തന്നെ തനിമയെ സംരക്ഷിക്കാന് നമുക്ക് കഴിയണം. നമ്മള് ഒരു സമൂഹമാണ് , ഒരു രാഷ്ട്രമാണ്, സര്സംഘചാലക് പറഞ്ഞു.
വിവിധ വിഭാഗങ്ങളില് നിന്ന് അഞ്ഞൂറോളം പേര് സമ്മേളനത്തില് പങ്കെടുത്തു. മധ്യ ക്ഷേത്ര സംഘചാലക് ഡോ. പൂര്ണേന്ദു സക്സേന, പ്രാന്ത സംഘചാലക് ടോപ്ലാല് എന്നിവരും പങ്കെടുത്തു
