മെല്ബണ്: ആഷസ് പരമ്പരയിലെ നാലാം മത്സരം രണ്ട് ദിവസംകൊണ്ട് അവസാനിച്ചതിന്റെ പേരില് അന്താരാഷ്ട്ര ക്രിക്കറ്റ് കൗണ്സില് പിച്ചിന് മോശം റേറ്റിങ് നല്കി. ഇംഗ്ലണ്ട് നാല് വിക്കറ്റിന് ജയിച്ച മത്സരം നടന്ന മെല്ബണ് ക്രിക്കറ്റ് ഗ്രൗണ്ടി(എംസിജി)ലെ പിച്ചില് വലിയ അസംതൃപ്തിയുണ്ടെന്നാണ് ഐസിസി പിച്ചിനെ കുറിച്ചുള്ള റേറ്റിങ് റിപ്പോര്ട്ടില് രേഖപ്പെടുത്തിയത്. മാച്ച് റഫറി ജെഫ് ക്രോവിന്റെ നിര്ദേശപ്രകാരമാണ് ഐസിസി നടപടി.
ഐസിസിയുടെ ഔദ്യോഗിക വിലയിരുത്തല് വന്നതോടെ എംസിജി പിച്ചിന് ഡിമെറിറ്റ് പോയിന്റ് ലഭിച്ചിരിക്കുകയാണ്. ഒരു പിച്ചിന് അഞ്ച് വര്ഷത്തിനിടെ ആറ് തവണ ഡിമെറിറ്റ് പോയിന്റ് ലഭിച്ചാല് നടപടി നേരിടേണ്ടിവരും. അത്തരം പിച്ചില് പിന്നെ ഒരു വര്ഷത്തേക്ക് അന്താരാഷ്ട്ര മത്സരങ്ങളൊന്നും സംഘടിപ്പിക്കാനാകില്ല.
വര്ഷം തോറും മെല്ബണില് ബോക്സിങ് ഡേ ടെസ്റ്റ് അരങ്ങേറുന്നത് പതിവാണ്. ക്രിസ്തുമസ് ദിനത്തിന്റെ പിറ്റേന്ന് നടക്കുന്ന മത്സരത്തില് ഒരു ടീം ആതിഥേയരായ ഓസ്ട്രേലിയ ആയിരിക്കും. ഇത്തവണ ആഷസ് പരമ്പരയുടെ അവസരമായതിനാല് ഇംഗ്ലണ്ട് ആയിരുന്നു എതിരാളികള്. കഴിഞ്ഞ വെള്ളിയാഴ്ച തുടങ്ങിയ മത്സരം ശനിയാഴ്ച്ച ഉച്ച കഴിയുമ്പോഴേക്കും അവസാനിച്ചു. ആദ്യ ദിനം 20 വിക്കറ്റും രണ്ടാം ദിനം 16 വിക്കറ്റും വീണു. മത്സരത്തില് ഇംഗ്ലണ്ട് നാല് വിക്കറ്റ് വിജയം നേടി. അഞ്ച് മത്സരങ്ങളില് ആദ്യത്തെ മൂന്നും ജയിച്ച് ഓസ്ട്രേലിയ പരമ്പര സ്വന്തമാക്കിയ ശേഷം നടന്ന മത്സരമായിരുന്നു ഇത്. വെറും 142 ഓവര് കൊണ്ട് മത്സരം പൂര്ത്തിയായി.
പൂര്ണമായും ബൗളിങ്ങിന് അനുകൂലമായ പിച്ചായി പോയി മെല്ബണിലേതെന്ന് മത്സരം നിയന്ത്രിച്ച മാച്ച് റഫറി ജെഫ് ക്രോവ് അറിയിച്ചു. ന്യൂസിലന്ഡില് നിന്നുള്ള മുന് ക്രിക്കറ്റര് ആണ് ജെഫ്. ബൗളിങ്ങിനെ ഇത്രയും പിന്തുണയ്ക്കുന്ന പിച്ചില് ഒരു ബാറ്റര്ക്ക് പോലും വ്യക്തിഗത സ്കോര് 50 തികയ്ക്കാന് സാധിച്ചില്ല. ഇത്തരത്തില് പിച്ച് ഒരുക്കിയത് വലിയ അപാകതയാണെന്ന് ജെഫ് ചൂണ്ടിക്കാട്ടി.
മെല്ബണിലെ കനത്ത ചൂട് പ്രതിരോധിക്കാന് പത്ത് മില്ലിമീറ്റര് ഉയരത്തില് പുല്ല് നിലനിര്ത്തിയാണ് മെല്ബണില് ആഷസ് മത്സരത്തിനായി വിക്കറ്റ് ഒരുക്കിയതെന്ന് എംസിജി പ്രധാന ക്യൂറേറ്റര് മാറ്റ് പേജ് പറഞ്ഞു. പക്ഷെ അത് ഇത്ര തിരിച്ചടിയാകുമെന്ന് വിചാരിച്ചില്ല. മത്സര ഫലത്തില് വലിയ ഞെട്ടലാണുണ്ടായതെന്ന് അദ്ദേഹം പറഞ്ഞു.
കഴിഞ്ഞ വര്ഷം ബോക്സി ഡേ ടെസ്റ്റില് ഓസ്ട്രേലിയക്കെതിരെ കളിച്ചത് ഭാരതം ആണ്. അന്ന് ശരാശരി റേറ്റിങ് ആണ് പിച്ചിന് ലഭിച്ചത്. പിച്ചുകള്ക്ക് റേറ്റിങ് നല്കുന്ന ഐസിസി സംവിധാനം തുടങ്ങിയ ശേഷം ആദ്യമായാണ് മെല്ബണിന് ഇത്ര വലിയ തിരിച്ചടി ഉണ്ടാകുന്നത്. ഭാരതത്തിന്റേതടക്കം മുമ്പ് രണ്ട് മത്സരങ്ങളിലും മോശമല്ലാത്ത റേറ്റിങ് എംസിജിക്ക് കിട്ടിയിരുന്നു.
അതേസമയം ഓസ്ട്രേലിയന് പരിശീലകന് ആന്ഡ്രൂ മക് ഡൊണാള്ഡ് പിച്ച് ക്യൂറേറ്റര് പേജിന് പിന്തുണയുമായെത്തി. ഞങ്ങള് മത്സരത്തില് തോറ്റ ടീം ആണ്, എങ്കിലും പേസ് ബൗളിങ്ങിന് അനുകൂലമായ ഇത്തരമൊരു പിച്ചാണ് ഇവിടെ ആവശ്യമെന്ന് അദ്ദേഹം പ്രതികരിച്ചു. എന്നാല് ലോകത്തെ പ്രധാന ക്രിക്കറ്റ് പണ്ഡിറ്റുകളെല്ലാം പിച്ചിന്റെ ഗതിയില് വിമര്ശിക്കുകയും അസംതൃപ്തി പ്രകടിപ്പിക്കുകയും ചെയ്തു.
