കൊച്ചി: ദിലീപ് നായകനായ ‘ഭഭബ’ 50 കോടി ക്ലബ്ബില് കയറിയെന്ന വാര്ത്ത കഴിഞ്ഞ ദിവസം പുറത്തുവന്നതുമുതല് കേരളത്തിലെ ഇസ്ലാമിക അടിത്തറയുള്ള വാര്ത്താവെബ്സൈറ്റുകളില് കടുത്ത സൈബര് ആക്രമണം. 40 കോടി കടക്കാത്ത ഭഭബ 50 കോടി കടന്നുവെന്ന് പറഞ്ഞ തള്ളുന്നു എന്ന് തുടങ്ങി നിരവധി വിമര്ശനങ്ങളാണ് ഉയര്ന്നത്.
ഇത്തരം വിമര്ശനങ്ങളുടെ അടിസ്ഥാനത്തില് കേരളത്തിലെ തിയറ്ററുകളില് നേരിട്ട് ഒരു അന്വേഷണം നടത്തി നോക്കി. അപ്പോള് മനസ്സിലായത് ഭഭബ ഓടുന്ന തിയറ്ററുകളില് സാമാന്യം ഭേദപ്പെട്ട രീതിയില് പ്രേക്ഷകര് ഇപ്പോഴും എത്തുന്നു എന്നു തന്നെയാണ്. മാത്രമല്ല, യുവാക്കള്ക്കും ചിത്രം മോശമല്ല എന്ന അഭിപ്രായമുണ്ടെന്നും മനസ്സിലാക്കാന് കഴിഞ്ഞു. ഡിസംബര് 18നായിരുന്നു ഭഭബയുടെ തിയറ്റര് റിലീസ്. ഇപ്പോള് 11 ദിവസം പിന്നിട്ടിട്ടും ഭഭബ തിയറ്ററുകളില് ഓടുന്നു. എന്തായാലും 30 കോടി ചെലവില് നിര്മ്മിച്ച ഈ സിനിമ 50 കോടി ക്ലബ്ബില് കടന്നു എന്നതിനര്ത്ഥം 20 കോടി ഇപ്പോഴേ നേടി എന്നത് തന്നെയാണ്. നെഗറ്റീവ് റിവ്യൂകളാല് മുറിവേറ്റ സിനിമ പക്ഷെ ദിലീപ്, മോഹന്ലാല്, ധ്യാന് ശ്രീനിവാസന്, വിനീത് ശ്രീനിവാസന് എന്ന സ്റ്റാര്പവറില് വിജയത്തിലേക്ക് കടക്കുകയായിരുന്നു.
ദിലീപ് വിരുദ്ധ ചേരികളുടെ നെഗറ്റീവ് റിവ്യൂ ആയിരുന്നു ഈ സിനിമയെ അല്പമെങ്കിലും തളര്ത്തിയത്. കിട്ടുന്ന ഓരോ അവസരവും നെഗറ്റീവ് കമന്റുകള്ക്കും ദിലീപിന്റെ ശത്രുക്കള് ഉപയോഗിച്ചു. മോഹന് ലാല് അതിഥി താരമായി എത്തിയതിന് എന്തിന് ദിലീപിനൊപ്പം അഭിനയിച്ചു എന്ന വിമര്ശനമുണ്ടായി. ഡബ്ബിങ്ങ് ആര്ടിസ്റ്റായ ഭാഗ്യലക്ഷ്മിയായിരുന്നു ദിലീപിനൊപ്പം ഭഭബ പോസ്റ്ററില് നിന്നതിന് മോഹന്ലാലിനെ വിമര്ശിച്ചത്. ഈ സിനിമയില് തട്ടിക്കൊണ്ടുപോകലിനെക്കുറിച്ച് ഒരു തമാശ പൊട്ടിക്കുന്നുണ്ട്. ഇത് പുരുഷാധിപത്യമാണെന്ന് വിമര്ശനമുണ്ടായി. ദിലീപിന്റെ കോമഡികള് ചത്തു എന്നത് പിന്നെ ഏത് ദിലീപ് കോമഡി സിനിമയ്ക്കെതിരെയും ഉയരുന്ന സ്ഥിരം പല്ലവിയാണ്. പ്രത്യേകിച്ചും നടിയ്ക്കെതിരായ സ്ത്രീപീഡനവുമായി ബന്ധപ്പെട്ട കേസില് കോടതി വിധി വരികയും ദിലീപ് കുറ്റവിമുക്തനാവുകയും ചെയ്തതോടെയാണ് സിനിമയെ തകര്ക്കാനുള്ള സൈബര് ആക്രമണം ശക്തമായത്.
ഭേദപ്പെട്ട പ്രകടനമാണ് ദിലീപ് ഈ കോമഡി ഴോണറിലുള്ള സിനിമയില് കാഴ്ചവെയ്ക്കുന്നത്. നല്ല കഥയുമാണ്. അത് മികച്ച രീതിയില് ധനഞ്ജയ് ശങ്കര് സംവിധാനം ചെയ്തിരിക്കുന്നു. മോഹന്ലാലിന്റെ ഗസ്റ്റ് റോളും കയ്യടി നേടുന്നുണ്ട്. ഗോപിസുന്ദര് ഒരു ഇടവേളയ്ക്ക് ശേഷം മികച്ച ഗാനങ്ങള് ഒരുക്കിയിരിക്കുന്നു. ദമ്പതികളായ ഫാഹിം സഫറും നൂറിന് ഷെറീഫുമാണ് തിരക്കഥ എഴുതിയിരിക്കുന്നത്. എന്നിട്ടും ഈ സിനിമയെ തകര്ക്കാന് ഒരു വിഭാഗം ശ്രമിക്കുമ്പോഴും അതിന് പിടികൊടുക്കാതെ സിനിമ മുന്നേറുക തന്നെയാണ്.
