തിരുവനന്തപുരം: വിഴിഞ്ഞം വാര്ഡിലെ തെന്നൂര്ക്കോണം ചിറയില്കോട് കുളത്തില് വിണ കുട്ടിയെ രക്ഷിച്ച് ബിജെപി സ്ഥാനാര്ത്ഥി. വിഴിഞ്ഞം വാര്ഡിലെ ബിജെപി സ്ഥാനാര്ത്ഥി സര്വ്വശക്തിപുരം ബിനുവും പ്രവര്ത്തകരും വോട്ടഭ്യര്ത്ഥിച്ച്കൊണ്ട് വീടുകള് കയറിയിറങ്ങുന്നതിനിടയിലാണ് ഒരുകുട്ടിയുടെ നിലവിളി കേള്ക്കുന്നത്. സൈക്കില് ചവിട്ടി കളിക്കുന്നതിനിടയില് നാലാം ക്ലാസുകാരനായ മുഹമ്മദ് അഫ്സാന് പന്ത്രണ്ടിയോളം താഴ്ചയുള്ള കുളത്തിലേക്ക് വീഴുകയായിരുന്നു. ഓടിയെത്തിയ ബിനു മറ്റൊന്നും നോക്കാതെ കുളത്തിലേക്ക് എടുത്ത് ചാടി കുട്ടിയെ പൊക്കി എടുത്ത് കരയ്ക്ക് നിന്ന പ്രവര്ത്തകരെ ഏല്പ്പിച്ചു.
ചതുപ്പു നിറഞ്ഞ അപകടകരമായ സ്ഥിതിയിലുള്ള കുളത്തില് വീണ കുട്ടിയുടെ നിലവിളി ബിനു കേട്ടതുകൊണ്ടാണ് രക്ഷപ്പെടുത്താന് സാധിച്ചതെന്ന് കുട്ടിയുടെ ബന്ധുക്കള് പറഞ്ഞു. കുളത്തിലേക്കുള്ള ചാട്ടത്തില് ബിനുവിന്റെ വലതു കാലിന്റെ ലിഗ്മെന്റിന് പരിക്കു പറ്റിയതിനാല് തെരഞ്ഞെടുപ്പ് പ്രവര്ത്തനത്തിന് ഇറങ്ങാന് കഴിയാതെ വീട്ടില് വിശ്രമിക്കുകയാണ് സര്വ്വശക്തിപുരം ബിനു. വിഴിഞ്ഞം മത്സ്യമാര്ക്കറ്റിലെ കച്ചവടക്കാരനായ നൗഷാദിന്റെ ഇളയമകനാണ് അഫ്സാന്.
ബിനുവിനെ മേയര് വി.വി രാജേഷ്, ബിജെപി സംസ്ഥാന ജനറല് സെക്രട്ടറി അഡ്വ.എസ്. സുരേഷ്, സൗത്ത് ജില്ല പ്രസിഡന്റ് മുക്കംപാലമൂട് ബിജു, ജനറല് സെക്രട്ടറി എം.എസ് ഷിബു, ജില്ല സെക്രട്ടറി സ്റ്റെഫിന് സ്റ്റീഫന്, സംസ്ഥാന കൗണ്സില് അംഗം മുക്കോല പ്രഭാകരന്, സംസ്ഥാന കമ്മറ്റി അംഗം ജി.പി ശ്രീകുമാര്, മണ്ഡലം ട്രഷറര് രാഗേഷ് തുടങ്ങിയവര് സന്ദര്ശിച്ചു.
തന്റെ ചെറുമകനെ രക്ഷിച്ചത് സര്വ്വശക്തനായ കാരുണ്യവാന്റെ കൃപയാണെന്ന് മുഹമ്മദ് അഫ്സാന്റെ ഉമ്മുമ്മ റംലാ ബീവി പറഞ്ഞു. അഫ്സാന്റെ ഉമ്മുമ്മ ഹജ്ജിന് പോയിരിക്കുകയായിരുന്നു. മക്കയില് വച്ചാണ് സംഭവമറിഞ്ഞത്. സര്വ്വ ശക്തനായ കാരുണ്യവാന് ബിനുവിന്റെ രൂപത്തില് അവിടെ എത്തിയില്ലായിരുന്നെങ്കില് അത് ഓര്ക്കാന് കൂടി സാധിക്കുന്നില്ലെന്ന് അഫ്സാന്റെ ഉമ്മയുടെ ഉമ്മയായ റംലബീവി പറഞ്ഞു.
