ഇസ്ലാമബാദ്: പാക് അധീന കശ്മീരിലെ മിര്പൂരില് ചെറിയ കുട്ടികളെ ലക്ഷ്യമിട്ട് ഭീകര ക്യാമ്പുകള് നടത്താനൊരുങ്ങി ജെയ്ഷെ മുഹമ്മദ്. ജനുവരി ഒന്ന് മുതല് ഏഴ് വരെ ‘തര്ബിയ’ അഥവാ പരിശീലന ക്യാമ്പ് സംഘടിപ്പിക്കുന്നുവെന്നാണ് രഹസ്യാന്വേഷണ ഏജന്സികളുടെ റിപ്പോര്ട്ട്.
മറ്റ് സംഘടനകളുടെ മറവില് സംഘടിപ്പിക്കുന്ന ക്യാമ്പിന് ലഷ്കര് നേതാവ് അബ്ദുള് റൗഫ്, റിസ്വാന് ഹനീഫ്, അബു മൂസ എന്നിവരാണ് നേതൃത്വം നല്കുന്നത്. ഇതിന്റെ ഭാഗമായി ഗര് ഹി ഹബീബുള്ളയിലും ബാലാക്കോട്ടിലും പരസ്യ റാലികളും സംഘടിപ്പിച്ചു.
ഈ റാലികളിലും ക്യാമ്പുകളിലും പങ്കെടുക്കുന്ന കുട്ടികളെയാണ് പിന്നീട് ഭീകര സംഘടനയിലേക്ക് റിക്രൂട്ട് ചെയ്യുന്നത്. കൂടാതെ, ലഷ്കര് ഇ തൊയ്ബ പിഒകെയില് വനിതാ വിഭാഗത്തെ സജീവമാക്കുകയും ആളുകളെ റിക്രൂട്ട് ചെയ്യുന്നതിനായി ക്യാമ്പുകള് സംഘടിപ്പിക്കുകയും ചെയ്യുന്നുണ്ടെന്നാണ് റിപ്പോര്ട്ട്. ഖൈബര് പഖ്തുണ്ഖ്വ പ്രവിശ്യയിലെ ലോവര് ദിര് ജില്ലയില് ‘ജിഹാദ്-ഇ-അഖ്സ’ എന്ന ഭീകര ക്യാമ്പ് ഇതേ സമയം നടക്കുമെന്നും റിപ്പോര്ട്ടുകളുണ്ട്.
പഹല്ഗാം ഭീകരാക്രമണത്തിന് മറുപടിയായി ഭാരതം നടത്തിയ ഓപ്പറേഷന് സിന്ദൂറില് തകര്ന്ന പാകിസ്ഥാനിലെയും പാക് അധീന കശ്മീരിലെയും ക്യാമ്പുകള് ഭീകര സംഘം പുനര്നിര്മിക്കുന്നുണ്ടെന്നും റിപ്പോര്ട്ടുണ്ട്.
ഭാരതത്തെ ലക്ഷ്യംവെക്കാനുള്ള ജെയ്ഷെയുടെയും ലഷ്കറിന്റെയും ശ്രമം തടയുന്നതിനായി പാകിസ്ഥാനിലും പിഒകെയിലും അവരുടെ എല്ലാ പ്രവര്ത്തനങ്ങളും നിരന്തരം നിരീക്ഷിച്ചുകൊണ്ടിരിക്കുന്ന സുരക്ഷാ സേനകള്ക്ക് ഇതിനോടകം ജാഗ്രതാ നിര്ദേശം നല്കിയിട്ടുണ്ട്.
