താടി വളർത്തുന്നത് ഇഷ്ടപ്പെടുന്നവരും താടി വളർത്തുന്നവരെ ഇഷ്ടപ്പെടുന്നവരുമുണ്ട്. താടി വളർത്തുന്നതിൽ മാത്രം ശ്രദ്ധിച്ചാൽ പോര, അത് വൃത്തിയായും ഭംഗിയായും കാത്തു സൂക്ഷിക്കുന്നതിലും കാര്യമുണ്ട്. ഇന്നിപ്പോ താടിയുടെ ആരോഗ്യത്തിനും സ്റ്റൈലിങ്ങിനുമൊക്കെയായി പലതരം ബിയേർഡ് ഓയിലുകൾ വിപണിയിലുണ്ട്. പലരും ഇത് വാങ്ങി ഉപയോഗിക്കാറുമുണ്ട്.
താടി മിനുക്കാൻ ആദ്യപടിയായി ഒരു ക്ലെൻസറോ മറ്റോ കൊണ്ട് മുഖം നന്നായി കഴുകാം. എന്നിട്ട് വൃത്തിയുള്ള ടവൽ കൊണ്ട് ഒപ്പി വെള്ളം കളയുക. അൽപം ഈർപം നിലനിർത്താം. ബിയേർഡ് ഓയിൽ ചർമത്തിൽ തൊടുന്ന രീതിയിൽ തന്നെ നന്നായി തേച്ചു കൊടുക്കാം. താടി രോമങ്ങളിൽ മാത്രം തേച്ചാൽ വേണ്ടത്ര ഫലം കിട്ടില്ല. ചർമത്തിൽ പുരട്ടി മസാജ് െചയ്യുമ്പോൾ രക്തചംക്രമണം കൂടുകയും അതു വഴി താടിരോമം നന്നായി വളരുകയും ചെയ്യും.
താടി വളർത്താനാഗ്രഹിക്കുന്നവർ ഇടയ്ക്കിടെ ട്രിം ചെയ്യുന്നതിനു പകരം 4–6 ആഴ്ച്ചയിൽ ഒരിക്കൽ മാത്രം ചെയ്യുക. അതേപോലെ ഇട്ക്കിടയ്ക്ക് താടി മസാജ് ചെയ്യുന്നതും നെല്ലിക്ക കഴിക്കുന്നതും അതിന്റെ അംശമുള്ള എണ്ണകൾ ഉപയോഗിക്കുന്നതും ഗുണം ചെയ്യും.
താടിയുടെ വളർച്ചയ്ക്ക് സഹായിക്കുന്ന എന്നാൽ പലരും മറന്നു പോകുന്ന ഒന്നാണ് ചർമത്തിലെ മൃതകോശങ്ങൾ കളയാത്തത്. ആഴ്ച്ചയിൽ ഒരിക്കലെങ്കിലും അധികം വീര്യമില്ലാത്ത സ്ക്രബ് ഉപയോഗിച്ച് ചർമം എക്സ്ഫോളിയേറ്റ് ചെയ്യുക.സ്ക്രബ് ചെയ്ത് കഴിഞ്ഞാൽ മോയ്സ്ചുറൈസർ ഉപയോഗിക്കാനും മറക്കരുത്. ഇതുവഴി മൃദുലവും തിളക്കമാർന്നതുമായ താടി സ്വന്തമാക്കാം
വരണ്ട ചർമക്കാർ ഓയിൽ തിരഞ്ഞെടുക്കുമ്പോൾ ആർഗൺ അല്ലെങ്കിൽ സ്വീറ്റ് ആമണ്ട് പോലുള്ള എണ്ണകൾ ഉള്ളത് തിരഞ്ഞെടുക്കുന്നതാണ് നല്ലത്. എണ്ണമയമുള്ള ചർമക്കാർ ജോജോബ, ഗ്രേയ്പ് സീഡ് പോലുള്ള ഓയിലുകൾ അടങ്ങിയവ ഉപയോഗിക്കാം.ബിയേഡ് ഓയിൽ ദിവസവും ഉപയോഗിക്കാൻ പ്രത്യേകം ശ്രദ്ധിക്കുക
