ന്യൂദൽഹി: കേന്ദ്ര ആഭ്യന്തര മന്ത്രി അമിത് ഷാ വെള്ളിയാഴ്ച ന്യൂദൽഹിയിൽ ഭീകരവിരുദ്ധ സമ്മേളനം-2025 ഉദ്ഘാടനം ചെയ്തു. രാജ്യത്തുടനീളമുള്ള പോലീസുകാർക്കായി ഏകീകൃത തീവ്രവാദ വിരുദ്ധ സ്ക്വാഡിന്റെ (എടിഎസ്) ആവശ്യകതയെപ്പറ്റി സമ്മേളനത്തിൽ അദ്ദേഹം ഊന്നിപ്പറഞ്ഞു.
തീവ്രവാദത്തെ ചെറുക്കുന്നതിൽ എടിഎസിന്റെ പങ്ക് നിർണായകമാണെന്നും അദ്ദേഹം പ്രസ്താവിച്ചു. കൂടാതെ എത്രയും വേഗം ഇത് നടപ്പിലാക്കാൻ എല്ലാ സംസ്ഥാനങ്ങളിലെയും പോലീസ് ഡയറക്ടർ ജനറൽമാർക്ക് അദ്ദേഹം നിർദ്ദേശം നൽകി.
ഭീകരതയുടെ സ്വഭാവം മാറിയിരിക്കുന്നുവെന്ന് അമിത് ഷാ
സൈബർ, ഇൻഫർമേഷൻ യുദ്ധം, സാമ്പത്തിക ശൃംഖലകളുടെ ദുരുപയോഗം, ഹൈബ്രിഡ് ഭീകരത എന്നിവയുൾപ്പെടെ ഇന്ന് ഭീകരതയുടെ സ്വഭാവം മാറിയിട്ടുണ്ടെന്ന് അമിത് ഷാ പറഞ്ഞു. അത്തരം ഭീഷണികളെ നേരിടാൻ ജാഗ്രത പുലർത്തുന്നതും വേഗത്തിലുള്ളതും ഫലപ്രാപ്തിയുള്ളതുമായ നടപടി സ്വീകരിക്കാൻ കഴിയുന്ന ശക്തമായ ഒരു ദേശീയ ശൃഖംല വികസിപ്പിക്കേണ്ടത് അത്യാവശ്യമാണ്. അത്തരം സമ്മേളനങ്ങളിലൂടെ മാത്രമേ അത്തരമൊരു ദേശീയ തലത്തിലുള്ള സംവിധാനം ശക്തിപ്പെടുത്താൻ കഴിയൂ എന്നും അദ്ദേഹം ഊന്നിപ്പറഞ്ഞു.
