തിരുവനന്തപുരം: കാലിക്കറ്റ് യൂണിവേഴ്സിറ്റിയുടെ വിസി യെ കണ്ടെത്തുന്നതിനുള്ള സര്ച്ച് കമ്മിറ്റിചാന്സലര് കൂടിയായ ഗവര്ണര് രാജേന്ദ്ര വിശ്വനാഥ് ആര്ലേക്കര് പുനഃസംഘടിപ്പിച്ചു. യൂണിവേഴ്സിറ്റിയുടെ പ്രതിനിധിയെ പിന്വലിച്ചതിനെ തുടര്ന്ന് പുതുതായി തിരഞ്ഞെടുക്കപ്പെട്ട പ്രതിനിധിയെ കൂടി ഉള്പ്പെടുത്തിയാണ് കമ്മിറ്റി പുനഃസംഘടിപ്പിച്ചത്.
യൂണിവേഴ്സിറ്റി പ്രതിനിധിയായി മുംബൈ ടാറ്റ ഇന്സ്റ്റിറ്റ്യൂട്ടിലെ സോഷ്യല് സയന്സ് പ്രൊഫസര് ആര്. റാംകുമാറും, ചാന്സലറുടെ പ്രതിനിധിയായി ബംഗളുരു ജവഹര്ലാല് നെഹ്റു സെന്റര് ഫോര് അഡ്വാന്സ് റിസര്ച്ചിലെ പ്രൊഫ. ജി. യു. കുല്ക്കര്ണിയും യുജിസിയുടെ നോമിനിയായി മുംബൈ യൂണിവേഴ്സിറ്റി വിസി പ്രൊഫ. രവീന്ദ്ര ഡി. കുല്ക്കര്ണിയുമാണ് കമ്മിറ്റി അംഗങ്ങള്.
ചാന്സലറുടെ പ്രതിനിധിയാണ് കമ്മിറ്റി കണ്വീനര്. കമ്മിറ്റി മൂന്നുമാസത്തിനുള്ളില് നിയമനത്തിന് മൂന്നു മുതല് അഞ്ചു വരെയുള്ളവരുടെ ഒരു പാനല്നല്കണമെന്ന് ലോകഭവന് വിജ്ഞാപനത്തില് പറയുന്നു. കാലിക്കറ്റ് വിസിയുടെ നിയമനം പൂര്ത്തിയാകുമ്പോള് സംസ്ഥാനത്തെ നാല് സര്വകലാശാലകളില് സ്ഥിരം വിസിമാര് ഉണ്ടാകും. നേരത്തെ പത്രങ്ങള്ക്ക് നല്കിയ വിജ്ഞാപനം അനുസരിച്ച് അപേക്ഷകള് സമര്പ്പിക്കേണ്ട അവസാന തീയതി ഡിസം. 5 ആയിരുന്നു. നാല്പതോളം അപേക്ഷകള് ലോക്ഭവനില് ലഭിച്ചിട്ടുണ്ടെന്നാണ് സൂചന.
