തിരുവനന്തപുരം: ബിജെപി 1987ല് അഹമ്മദാബാദ് മുനിസിപ്പല് കോര്പറേഷന് പിടിച്ചാണ് ഗുജറാത്തില് അവരുടെ പടയോട്ടം തുടങ്ങിയതെന്ന് പ്രധാനമന്ത്രി മോദി. നിങ്ങള് തിരുവനന്തപുരം കോര്പറേഷന് പിടിച്ചതും അതുപോലെയാണെന്നും മോദി പറഞ്ഞുവത്രെ.
കേരളത്തിലെ തദ്ദേശസ്വയംഭരണസ്ഥാപനങ്ങളിലെ തെരഞ്ഞെടുപ്പ് ഫലം പുറത്തുവന്ന ശേഷം തിരുവനന്തപുരം കോര്പറേഷന് ബിജെപി പിടിച്ചതിനെക്കുറിച്ച് ബിജെപി സംസ്ഥാന പ്രസിഡന്റ് രാജീവ് ചന്ദ്രശേഖറിനോട് ഫോണില് വിളിച്ച് സംസാരിക്കവേയാണ് മോദി ഇക്കാര്യം പറഞ്ഞത്. ജന്മഭൂമി ഓണ്ലൈന് എഡിറ്റര് കാവാലം നടത്തിയ അഭിമുഖത്തില് ബിജെപി സംസ്ഥാന ജനറല് സെക്രട്ടറി അഡ്വ. സുരേഷാണ് ഇക്കാര്യം വെളിപ്പെടുത്തിയത്.
1980കളില് കോണ്ഗ്രസ് മാത്രമായിരുന്നു ഗുജറാത്തിലെ പ്രധാന രാഷ്ട്രീയ ശക്തി. പക്ഷെ 1987ല് ഗുജറാത്തില് അഹമ്മദാബാദ് മുനിസിപ്പല് കോര്പ്പറേഷനിലെ ബിജെപിയുടെ വിജയം ഒരു വഴിത്തിരിവായി മാറുകയായിരുന്നു. അത് പിന്നീട് ഗുജറാത്തിന്റെ രാഷ്ട്രീയ വിധിയില് വലിയ മാറ്റം വരുത്തി. യുവാവായ നരേന്ദ്രമോദിയുടെ സംഘടനാപാടവവും മാര്ഗ്ഗനിര്ദേശവും വഴി ബിജെപി ഈ അടിത്തറയില് നിന്നും ഗുജറാത്തില് കെട്ടിപ്പടുക്കപ്പെടുകയായിരുന്നു.
ഇപ്പോള് കേരളത്തിലും ബിജെപി തിരുവനന്തപുരം കോര്പറേഷന് പിടിച്ച് പടയോട്ടം ആരംഭിച്ചിരിക്കുകയാണ്. അതുവരെ തദ്ദേശസ്വയംഭരണ സ്ഥാപനങ്ങള് യുഡിഎഫ്-എല്ഡിഎഫ് എന്ന നേര്ക്കുനേര് പോരാട്ടം എന്ന നിലയായിരുന്നു. അത് ഈ തദ്ദേശസ്വയം ഭരണ തെരഞ്ഞെടുപ്പോടെ പാടെ മാറി. ബിജെപി അവരുടെ വോട്ട് പങ്കാളിത്തം വര്ധിപ്പിച്ചു. പ്രത്യേകിച്ചും നഗരങ്ങളിലും തദ്ദേശസ്ഥാപനങ്ങളിലും. ഈ വളര്ച്ച പൊടുന്നനെ ഉണ്ടായതോ, വൈകാരിമായതോ അല്ലായിരുന്നു. അത് സംഘടനാതലത്തിലും ബൂത്ത് തലത്തിലും കെട്ടിപ്പടുക്കപ്പെട്ടതാണ്.
ചരിത്രം ഒരു പോലെ ആവര്ത്തിക്കണമെന്നില്ലെങ്കിലും ഗുജറാത്തിലെ അതേ വിജയത്തിന്റെ ഘടന ആവര്ത്തിക്കപ്പെട്ടേക്കാം. കേരളത്തിലെ രാഷ്ട്രീയ ചരിത്രത്തില് പുതിയൊരു അധ്യായം എഴുതിച്ചേര്ക്കപ്പെട്ടിരിക്കുന്നു എന്നതില് സംശയമില്ല. അത് വരാനിരിക്കുന്ന വര്ഷങ്ങളില് സംസ്ഥാനരാഷ്ട്രീയം മാറ്റിവരയ്ക്കും.
