തിരുവനന്തപുരം: ഗവര്ണറുമായി ഏറ്റുമുട്ടാനില്ലെന്ന് ഉന്നതവിദ്യാഭ്യാസമന്ത്രി ആര് ബിന്ദു. വിസി നിയമനത്തില് ഗവര്ണറുമായി സര്ക്കാര് സമവായത്തിലെത്തിയതിന് പിന്നാലെയാണ് മന്ത്രിയുടെ പ്രതികരണം.
ഭരണപക്ഷ പ്രതിനിധികള് സഹകരിച്ചതോടെ സാങ്കേതിക സര്വകലാശാലയില് ചൊവ്വാഴ്ച ബജറ്റ് പാസാക്കി. കേരള സര്വകലാശാല രജിസ്ട്രാറായിരുന്ന ഡോ കെ എസ് അനില്കുമാറിനെ മാറ്റിയത് ഒത്തുതീര്പ്പിന്റെ ഭാഗമല്ലെന്നാണ് മന്ത്രി പറയുന്നത്. ഡോ കെ എസ് അനില്കുമാറിന്റെ അപേക്ഷയിലാണ് മാറ്റം. 14 മാസങ്ങള്ക്ക് ശേഷമാണ് സാങ്കേതിക സര്വകലാശാലയില് സമാധാന അന്തരീക്ഷത്തില് ബോര്ഡ് ഓഫ് ഗവര്ണേഴ്സ് യോഗം ചേര്ന്നത്.
കഴിഞ്ഞ തവണ ഗവര്ണര് യോഗത്തിനെത്തിയെങ്കിലും എംഎല്എമാരും ഉന്നത സര്ക്കാര് ഉദ്യോഗസ്ഥരും വിട്ടുനിന്നതോടെ ക്വാറം തികയാതെ യോഗം പിരിയുകയായിരുന്നു.ചൊവ്വാഴ്ച ഗവര്ണറെ സ്വീകരിക്കാന് വി സി സിസ തോമസിനൊപ്പം സിപിഎം എംഎല്എ ഐബി സതീഷും എത്തുകയുണ്ടായി.
മാര്ച്ചില് പാസാക്കേണ്ടിയിരുന്ന 373.52 കോടി രൂപയുടെ ബജറ്റ് അംഗീകരിച്ചു.അതിനിടെ, കാലിക്കറ്റില് വിസി നിര്ണയത്തിനുള്ള നടപടികള് ലോക് ഭവന് തുടങ്ങിയിട്ടുണ്ട്.
