ന്യൂദല്ഹി: ചുളുവിലയ്ക്കു കോണ്ഗ്രസ് മുഖപത്രം നാഷണല് ഹെറാള്ഡിന്റെ കോടികള് വിലയുള്ള സ്വത്തുക്കള് തട്ടിയെടുത്തെന്ന കേസില് കോണ്ഗ്രസ് മുന് അധ്യക്ഷ സോണിയ, മകനും കോണ്ഗ്രസ് മുന് അധ്യക്ഷനുമായ രാഹുല് എന്നിവരടക്കമുള്ള പ്രതികള്ക്കു ദല്ഹി ഹൈക്കോടതി നോട്ടീസ് അയച്ചു.
ഇവര്ക്കെതിരായ ഇ ഡി പരാതി തള്ളിയ ദല്ഹി റോസ്ഹൗസ് കോടതിയുടെ വിധിക്കെതിരേയുള്ള അപ്പീലിലാണ് വീണ്ടും നോട്ടീസ്. കള്ളപ്പണം വെളുപ്പിക്കല് കേസില് എഫ്ഐആര് രജിസ്റ്റര് ചെയ്യാതെ, സ്വകാര്യ വ്യക്തിയുടെ പരാതിയെ മാത്രം അടിസ്ഥാനമാക്കിയാണ് നടപടിയെന്നു പറഞ്ഞാണ്, ഇ ഡി പരാതി റോസ്ഹൗസ് കോടതി തള്ളിയത്. ഇതു ചോദ്യം ചെയ്താണ് ഇ ഡി ഹൈക്കോടതിയെ സമീപിച്ചത്. അപ്പീല് മാര്ച്ച് 12നു ജസ്റ്റിസ് രവീന്ദ്ര ദുദേജ പരിഗണിക്കും.
അന്പത് ലക്ഷം മുടക്കി, നാഷണല് ഹെറാള്ഡിന്റെ 2000 കോടിയുടെ സ്വത്തുക്കള് സോണിയയ്ക്കും രാഹുലിനും 70 ശതമാനം ഓഹരിയുള്ള യങ് ഇന്ത്യയെന്ന കമ്പനി തട്ടിയെടുത്തെന്നാണ് കേസ്. ഡോ. സുബ്രഹ്മണ്യന് സ്വാമിയുടെ പരാതിയെ തുടര്ന്നായിരുന്നു ഇ ഡി അന്വേഷണം. ഇ ഡിക്കായി സോളിസിറ്റര് ജനറല് തുഷാര് മേത്ത കേസിന്റെ വിശദാംശങ്ങള് കോടതിയെ ധരിപ്പിച്ചു.
