നാഗ്പൂര്‍: ശതാബ്ദികാലം ആഘോഷിക്കാനല്ല, ആത്മപരിശോധനയ്‌ക്കുള്ള അവസരമായാണ് ആര്‍എസ്എസ് കാണുന്നതെന്ന് പ്രജ്ഞാപ്രവാഹ് ദേശീയ സംയോജകന്‍ ജെ. നന്ദകുമാര്‍. പരമവൈഭവരാഷ്‌ട്രത്തിലൂടെ വിശ്വമംഗളമെന്ന ലക്ഷ്യത്തിലേക്ക് ഇനിയും ദൂരമുണ്ട്. അതിന് തുടര്‍ച്ചയായ പ്രവര്‍ത്തനം ആവശ്യമാണെന്ന് അദ്ദേഹം പറഞ്ഞു. ആര്‍എസ്എസ് ശതാബ്ദിയുടെ ഭാഗമായി സോമല്‍വാഡയില്‍ പൗരപ്രമുഖരുടെ സമ്മേളനത്തില്‍ സംസാരിക്കുകയായിരുന്നു നന്ദകുമാര്‍.
മഹാകവി അക്കിത്തം രാഷ്‌ട്രീയ സ്വയംസേവക സംഘത്തെ വിശേഷിപ്പിച്ചത് രാഷ്‌ട്രത്തിന്റെ സ്വരസം എന്നാണെന്ന് അദ്ദേഹം ചൂണ്ടിക്കാട്ടി. രാഷ്‌ട്രത്തിന്റെ ആത്മാവാണ് സംഘമെന്ന് മഹാകവി നിരീക്ഷിച്ചു ജസ്റ്റിസ് കെ.ടി. തോമസ് പറഞ്ഞത് ജനാധിപത്യം, ഭരണഘടന, സൈന്യം, സംഘം എന്നീ നാല് പ്രധാനതൂണുകളാണ് ഭാരതത്തിനുള്ളതെന്നാണ്. ഭാരതം പുരാതനകാലം മുതല്‍ നിലനില്‍ക്കുന്നതും പുരോഗതി പ്രാപിച്ചുകൊണ്ടിരിക്കുന്നതുമായ സാംസ്‌കാരിക രാഷ്‌ട്രമാണ്. മറ്റ് രാഷ്‌ട്രങ്ങള്‍ അധികാരാധിഷ്ഠിതമോ ഭാഷാധിഷ്ഠിതമോ ആയ സങ്കല്പങ്ങളില്‍ രൂപപ്പെടുമ്പോള്‍ നമ്മുടേത് സംസ്‌കാരത്തില്‍ അധിഷ്ഠിതമാണ്.
ഗ്രീക്കുകാര്‍, ഹൂണന്മാര്‍, ഷാക്കുകള്‍ തുടങ്ങിയ അധിനിവേശക്കാരായ ഗ്രീക്കുകാരും ഹൂണന്മാരും ശകന്മാരുമൊക്കെ ഒടുവില്‍ ഈ സംസ്‌കാരത്തില്‍ ലയിച്ചുചേര്‍ന്നവരാണ്. എന്നാല്‍ മുസ്ലീം, ബ്രിട്ടീഷ് അധിനിവേശങ്ങളില്‍ സൈനികമായി മാത്രമല്ല, സാംസ്‌കാരികവും ആശയപരവുമായ പോരാട്ടങ്ങളും വേണ്ടിവന്നു. ദുഷ്‌കരമായ ആ കാലഘട്ടത്തില്‍, ശ്രീരാമകൃഷ്ണ പരമഹംസര്‍, സ്വാമി വിവേകാനന്ദന്‍, യോഗി അരവിന്ദന്‍, സ്വാമി ദയാനന്ദ സരസ്വതി, രവീന്ദ്രനാഥ ടാഗോര്‍ തുടങ്ങിയ മഹാന്മാര്‍ സമൂഹത്തെ ഉണര്‍ത്താന്‍ പ്രവര്‍ത്തിച്ചു. ജാതി, മത, വിഭാഗങ്ങള്‍ക്കെല്ലാമതീതമായി മുഴുവന്‍ ഹിന്ദു സമൂഹത്തെയും ഒന്നിപ്പിക്കുക എന്ന ലക്ഷ്യമാണ് ഡോ. കേശവ് ബലിറാം ഹെഡ്‌ഗേവാറിനെ നയിച്ചത്. സമൂഹം അതിന്റെ പാരമ്പര്യങ്ങള്‍, കൃഷി, ജീവിതശൈലി എന്നിവയാല്‍ നയിക്കപ്പെടുമ്പോള്‍ മാത്രമേ യഥാര്‍ത്ഥ സ്വാതന്ത്ര്യം നേടാനാകൂ എന്ന് നന്ദകുമാര്‍ പറഞ്ഞു.
ഭാഗ് സംഘചാലക് ശ്രീകാന്ത് ചിതലെ, പരിപാടിയുടെ സംയോജകന്‍ വെങ്കിടേഷ് സോമാല്‍വാര്‍ എന്നിവരും പങ്കെടുത്തു.
