ധാക്ക: ബംഗ്ലാദേശിലെ ചിറ്റഗോങ്ങില് നിന്നും ഇന്ത്യയിലേക്ക് വിസ നല്കുന്ന നടപടികള് കേന്ദ്രസര്ക്കാര് നിര്ത്തിവെച്ചു, വിസ നടപടികള് അനിശ്ചിതകാലത്തേക്കാണ് നിര്ത്തി വച്ചിരിക്കുന്നത്. ഇനിയൊരു അറിയിപ്പ് ഉണ്ടാകുന്നത് വരെ നടപടികളുണ്ടാകില്ലെന്നാണ് അറിയിച്ചിരിക്കുന്നത്.
യുവനേതാവ് ഷരീഫ് ഉസ്മാന് ഖാദിയുടെ കൊലപാതകത്തെ തുടര്ന്ന് രാജ്യത്തുണ്ടായിരിക്കുന്ന അക്രമസംഭവങ്ങളുടെ പശ്ചാത്തലത്തിലാണ് നടപടി. സുരക്ഷാനടപടികളുടെ ഭാഗമായാണ് കേന്ദ്രസര്ക്കാരിന്റെ ഈ നടപടി. കാരണം ഷെയ്ഖ് ഹസീനയെ അധികാര ഭ്രഷ്ടയാക്കിയ കഴിഞ്ഞ വര്ഷത്തെ പ്രക്ഷോഭങ്ങളുടെ അമരക്കാരനായിരുന്ന ഹാദി കടുത്ത ഇന്ത്യാവിരുദ്ധനാണ്. ഹാദിയുടെ മരണത്തിന് ശേഷം ബംഗ്ലാദേശില് കലാപം നടക്കുകയാണ്. ഇന്ത്യാ വിരുദ്ധ വികാരവും വര്ധിച്ചുവരികയാണ്. അടുത്ത ഫെബ്രുവരി 12ന് രാജ്യത്ത് നടക്കാന് പോകുന്ന പൊതുതെരഞ്ഞെടുപ്പിലെ സ്ഥാനാര്ത്ഥിയായി അദ്ദേഹത്തെ ഉയര്ത്തിക്കാട്ടിയിരുന്നു.
സുരക്ഷാ സാഹചര്യങ്ങള് വിലയിരുത്തിയ ശേഷം വിസ കേന്ദ്രം തുറന്ന് പ്രവര്ത്തനം ആരംഭിച്ച ശേഷമേ നടപടി പുനരാരംഭിക്കുന്ന കാര്യം തീരുമാനിക്കൂ. കഴിഞ്ഞ ദിവസം ബംഗ്ലാദേശിലെ സില്ഹെത് നഗരത്തിലെ ഇന്ത്യന് അസിസ്റ്റന്റ് ഹൈ കമ്മീഷനിലെ സുരക്ഷ വര്ദ്ധിപ്പിച്ചിരുന്നു. മറ്റാരും സാഹചര്യങ്ങള് ദുരുപയോഗം ചെയ്യാതിരിക്കാനാണ് നടപടി. അതീവ സുരക്ഷയിലാണ് കഴിഞ്ഞ ദിവസം ധാക്ക സര്വകലാശാല പള്ളിയ്ക്ക് സമീപമുള്ള ദേശീയ കവി കാസി നസ്റുള് ഇസ്ലാമിന്റെ ശവകുടീരത്തിന് അടുത്ത് ഹാദി എന്ന മുപ്പത്തിരണ്ടുകാരന് അന്ത്യവിശ്രമം ഒരുക്കിയത്.
പതിനായിരങ്ങളാണ് അദ്ദേഹത്തിന്റെ സംസ്കാര ചടങ്ങുകളില് പങ്കെടുത്തത്. സംസ്കാര ചടങ്ങുകളിലുടനീളം ഇന്ത്യാവിരുദ്ധ മുദ്രാവാക്യങ്ങള് ഉയര്ന്നു. ഹാദിയുടെ ചോരയ്ക്ക് പകരം ചോദിക്കുമെന്നും മുദ്രാവാക്യം ഉയര്ന്നു.
ഈ മാസം പന്ത്രണ്ടിന് മുഖംമൂടി ധരിച്ചെത്തിയ ഒരു സംഘം ആളുകള് ആണ് ഹാദിയെ വെടിവയ്ക്കുകയായിരുന്നു. ധാക്കയിലെ ബിജോയ് നഗര് മേഖലയില് തെരഞ്ഞെടുപ്പ് പ്രചാരണ പരിപാടിയില് പങ്കെടുക്കവെ ആയിരുന്നു ഇത്. സിംഗപ്പൂരിലെ ആശുപത്രിയില് ചികിത്സയില് കഴിയുന്നതിനിടെ വ്യാഴാഴ്ചയാണ് മരിച്ചു. കടുത്ത ഇന്ത്യാ വിരോധി ആയതിനാല് ഹാദിയുടെ കൊലപാതകത്തിന് പിന്നില് ഇന്ത്യയാണെന്ന് ആരോപണം ഉയരുന്നുണ്ട്. ഇദ്ദേഹത്തിന്റെ മരണത്തോടെ ബംഗ്ലാദേശിലെമ്പാടും അക്രമങ്ങള് അരങ്ങേറുകയാണ്. ചിറ്റോഗ്രാമിലെ ഇന്ത്യന് അസിസ്റ്റന്റ് ഹൈകമ്മീഷണറുടെ വസതിക്ക് നേരെ കല്ലേറ് അടക്കമുള്ളവ അരങ്ങേറി.
ഇതോടെയാണ് ചിറ്റഗോങിലെ ഇന്ത്യന് വിസ നടപടി കേന്ദ്രത്തിലെ പ്രവര്ത്തനങ്ങള് അനിശ്ചിതമായി നിര്ത്തി വച്ചിരിക്കുന്നത്. ധാക്ക ട്രൈബ്യൂണ് എന്ന വര്ത്തമാനപത്രമാണ് ഇക്കാര്യം റിപ്പോര്ട്ട് ചെയ്തത്. ഇന്ന് മുതലാണ് ഇത് നിലവില് വന്നിരിക്കുന്നത്.
