ചെന്നൈ: മധുരൈയില് മുരുകഭക്തനായ യുവാവ് തീകൊളുത്തി ആത്മഹത്യ ചെയ്തതായി റിപ്പോര്ട്ട്. മുരുകന്റെ ആറ് പടൈവീടുകളില് ഒന്നായ തിരുപ്രംകുണ്ഡത്തില് കാര്ത്തികദീപം കൊളുത്താന് അനുവദിക്കാത്ത ഡിഎംകെ സര്ക്കാരിന്റെ നടപടിയില് മനംനൊന്താണ് മുരുകഭക്തന് തീകൊളുത്തി മരിച്ചതെന്നാണ് പുറത്തുവരുന്ന റിപ്പോര്ട്ടുകള്.
മധുരൈയില് നരിമേട് സ്വദേശി പൂര്ണ്ണചന്ദ്രന് ആണ് സ്വയം തീകൊളുത്തി മരിച്ചത്. ഒരു പെരിയോര് പ്രതിമയുടെ അരികില് വെച്ചാണ് ശരീരത്തില് തീകൊളുത്തി ആത്മഹത്യ ചെയ്തത്. ഒരു വാഹനത്തില് മധുരൈയിലെ കോര്പറേഷന് ഓഫീസിന് സമീപമുള്ള പെരിയോര് പ്രതിമയ്ക്ക് അടുത്തുള്ള പൊലീസ് ബൂത്തില് എത്തിയ പൂര്ണ്ണചന്ദ്രന് അതില് കയറിയ ശേഷം ഉള്ളില് നിന്നും ലോക്ക് ചെയ്ത് ശരീരത്തില് തീകൊളുത്തി ആത്മഹത്യ ചെയ്യുകയായിരുന്നു. യുവാവിന്റെ കരച്ചില് കേള്ക്കുകയും അവിടെ തീ ഉയരുന്നതും കണ്ട വാഹനയാത്രക്കാരില് ചിലരാണ് ഫയര് ഫോഴ്സിനെ വിവരം അറിയിച്ചത്. ഫയര് ഫോഴ്സെത്തി പൂര്ണ്ണചന്ദ്രനെ രക്ഷിച്ചെങ്കിലും ഗുരുതരമായി പൊള്ളലേറ്റിരുന്നു. വൈകാതെ മരിച്ചു. തല്ലക്കുളം പൊലീസ് അധികൃതര് പൂര്ണ്ണചന്ദ്രന്റെ മൃതദേഹം പോസ്റ്റ് മോര്ട്ടത്തിനായി ജില്ലാ ആശുപത്രിയിലേക്ക് അയച്ചിരിക്കുകയാണ്.
ഇപ്പോള് പൂര്ണ്ണചന്ദ്രന് സുഹൃത്തിനയച്ച ശബ്ദസന്ദേശത്തിലാണ് താന് ആത്മഹത്യ ചെയ്തത് മുരുകന്റെ തിരുപ്രംകുണ്ഡ്രം മലയുടെ ഉച്ചിയില് ഉള്ള ദീപത്തൂണില് കാര്ത്തിക ദീപം തെളിയിക്കുന്നതിന് ഡിഎംകെ സര്ക്കാര് തടസ്സം നിന്നതിനാലാണ് എന്ന് വ്യക്തമായി പറയുന്നത്. നാല്പത് വയസ്സാണ് പൂര്ണ്ണചന്ദ്രന്റെ പ്രായം. മുരുകക്ഷേത്രമായ തിരുപ്പുറംകുണ്ഡ്രത്തിലെ ദീപത്തൂണില് ദീപം തെളിയിക്കാന് കഴിഞ്ഞാല് അത് മധുരൈയ്ക്ക് കൂടുതല് പെരുമ കൊണ്ടുവരുമെന്നും പൂര്ണ്ണചന്ദ്രന് ഈ ശബ്ദസന്ദേശത്തില് പറയുന്നു.
തിരുപ്രംകുണ്ഡ്രത്തിലെ മുരുകക്ഷേത്രത്തിലെ ദീപത്തൂണില് കാര്ത്തികദീപം കൊളുത്താന് അനുമതി തേടി ഒരു ഭക്തന് തമിഴ്നാട് ഹൈക്കോടതിയെ സമീപിച്ചിരുന്നു. കോടതി ഇതിന് അനുമതി നല്കി. എന്നാല് തൊട്ടുതാഴെ ഒരു മുസ്ലിം ദര്ഗയുണ്ടെന്ന കാരണം പറഞ്ഞ് സ്റ്റാലിന് സര്ക്കാര് ദീപം തെളിയിക്കാനുള്ള അനുമതി നല്കിയില്ല.
ഇത് ഹിന്ദുഭക്തരില് വലിയ മനപ്രയാസം ഉളവാക്കിയിരുന്നു. ഇതില് മനം നൊന്താണ് പൂര്ണ്ണചന്ദ്രന് ആത്മഹത്യ ചെയ്തതെന്ന് കരുതുന്നു. ഇതോടെ തമിഴ്നാട്ടില് ക്രമസമാധാനപ്രശ്നം ഉണ്ടായേക്കുമെന്ന് കരുതുന്നു.
