തിരുവനന്തപുരം: ഡിജിറ്റല്, സാങ്കേതിക സര്വകലാശാലകളിലെ വി സി നിയമനത്തില് മുഖ്യമന്ത്രി പിണറായി വിജയന് പിന്തുണയുമായി സിപിഎം സംസ്ഥാന സെക്രട്ടേറിയറ്റ് പ്രസ്താവന പുറത്തിറക്കി. വി സി നിയമനവുമായി ബന്ധപ്പെട്ട് സെക്രട്ടേറിയറ്റില് ഭിന്നത ഉണ്ടായെന്ന മാധ്യമ വാര്ത്തകള് തളളിയാണ് പ്രസ്താവന.
വി സി നിയമനത്തില് സമവായത്തിനു മുന്കൈ എടുത്തത് ഗവര്ണറാണെന്നും പ്രസ്താവനയില് പറയുന്നു.മുഖ്യമന്ത്രിക്കെതിരെ യോഗത്തില് വിമര്ശനം ഉയര്ന്നെന്ന വാര്ത്ത പുറത്തു വന്ന സാഹചര്യത്തിലാണ് നിഷേധക്കുറിപ്പുമായി പാര്ട്ടി രംഗത്തെത്തിയത്.
മുഖ്യമന്ത്രിക്കെതിരെ വിമര്ശനമുയര്ന്നെന്ന വാര്ത്ത നല്കിയ മാധ്യമങ്ങളെ പഴിച്ചുകൊണ്ടാണ് സി പി എം സംസ്ഥാന സെക്രട്ടേറിയറ്റിന്റെ പ്രസ്താവന. ഗവര്ണറുമായി സമവായത്തിലെത്തിയത് ഗുണം ചെയ്യില്ലെന്ന് നേതാക്കള് സിപിഎം സംസ്ഥാന സെക്രട്ടേറിയറ്റില് വിമര്ശനം ഉന്നയിച്ചിരുന്നു.
