തിരുവനന്തപുരം: ശബരിമലയിലെ തിരുവാഭരണങ്ങളും സ്വര്ണപ്പാളികളും കവര്ന്ന കേസില് ദേവസ്വം ബോര്ഡ് അംഗങ്ങളായിരുന്ന കെ.പി. ശങ്കര് ദാസ്, എന്. വിജയകുമാര് എന്നിവരെ എന്തുകൊണ്ട് അന്വേഷണത്തില് നിന്ന് ഒഴിവാക്കിയെന്ന ഹൈക്കോടതിയുടെ ചോദ്യം വളരെ ഗൗരവകരമെന്ന് കുമ്മനം രാജശേഖരന്.അറസ്റ്റിലായ മുന് ദേവസ്വം ബോര്ഡ് പ്രസിഡന്റ് എ. പത്മകുമാറിനൊപ്പം മറ്റ് ബോര്ഡ് അംഗങ്ങള്ക്കും ക്രിമിനല് ഉത്തരവാദിത്വമുണ്ടെന്നാണ് കോടതി നിരീക്ഷണം.2019-ലെ വിവാദപരമായ ദേവസ്വം ബോര്ഡ് തീരുമാനത്തില് ഇവരും ഒപ്പിട്ടിട്ടുള്ളതാണെന്ന് കോടതി ചൂണ്ടിക്കാട്ടിയത് സമൂഹമാധ്യമത്തിലെ കുറിപ്പില് കുമ്മനം ഉയര്ത്തിക്കാട്ടി.
സ്വര്ണക്കൊളളയില് പ്രത്യേക അന്വേഷണ സംഘത്തിന്റെ വീഴ്ചകളെ ഹൈക്കോടതി കടുത്ത ഭാഷയില് വിമര്ശിച്ചിരുന്നു. സ്വര്ണം പൊതിഞ്ഞ ദ്വാരപാലക ശില്പങ്ങള് വെറും ചെമ്പ് പാളികളാണെന്ന് രേഖപ്പെടുത്തിയത് സ്വര്ണം തട്ടിയെടുക്കാനുള്ള ബോധപൂര്വമായ ശ്രമമാണ്. ബോര്ഡ് അംഗങ്ങളുടെ അറിവോടെയാണ് ഈ തിരിമറി നടന്നതെന്ന് കോടതി വിലയിരുത്തിയതും കുമ്മനം ഉയര്ത്തിക്കാട്ടുന്നു.
ഒന്നാം പ്രതിയായ ഉണ്ണികൃഷ്ണന് പോറ്റിക്ക് പിന്നില് പ്രവര്ത്തിച്ച ‘വമ്പന് സ്രാവുകളെ’ കണ്ടെത്തണം. തട്ടിപ്പില് പങ്കാളികളായ എല്ലാവരെയും നിയമത്തിന് മുന്നില് കൊണ്ടുവരണമെന്നും അന്വേഷണം വെറും പ്രഹസനമാകരുതെന്നും ഹൈക്കോടതി പറഞ്ഞു.ഒരു ഔദ്യോഗിക പദവിയും ഇല്ലാതിരുന്നിട്ടും ഉണ്ണികൃഷ്ണന് പോറ്റിക്ക് ശബരിമലയില് അമിത സ്വാതന്ത്ര്യം ലഭിച്ചത് ഉന്നതരുടെ സഹായമില്ലാതെ സാധ്യമല്ലെന്ന് കോടതി നിരീക്ഷിച്ചു. മുന് ദേവസ്വം ബോര്ഡ് പ്രസിഡന്റ് എന് വാസു, മുന് അഡ്മിനിസ്ട്രേറ്റിവ് ഓഫീസര് മുരാരി ബാബു, മുന് ദേവസ്വം കമ്മീഷണര് കെ എസ് ബൈജു എന്നിവരുടെ ജാമ്യാപേക്ഷ പരിഗണിക്കവെയാണ് പ്രത്യേക അന്വേഷണ സംഘത്തിന്റെ വീഴ്ചകളെ കുറിച്ച് ഹൈക്കോടതി പറഞ്ഞത്.
ഭഗവാന്റെയും ഭക്തരുടെയും സ്വത്തുക്കള് സംരക്ഷിക്കാന് ബാധ്യസ്ഥരായവര് തന്നെ അത് മോഷ്ടിക്കാന് കൂട്ടുനില്ക്കുന്നത് അത്യന്തം ഗൗരവകരമാണെന്നും അഴിമതിക്കാരെ സംരക്ഷിക്കുന്ന നിലപാട് അന്വേഷണ സംഘത്തിന്റെ ഭാഗത്തുനിന്ന് ഉണ്ടാകരുതെന്നും നീതിപൂര്വമായ അന്വേഷണം ഉറപ്പാക്കണമെന്നും കോടതി ഓര്മ്മിപ്പിച്ചു.
ഉന്നതതലത്തിലുള്ള ഗൂഢാലോചനയെക്കുറിച്ച് നിലവിലുള്ള രേഖകളില് നിന്ന് വ്യക്തമായ അന്വേഷണം നടന്നിട്ടില്ലെന്നത് ഹൈക്കോടതിയെ ആശങ്കപ്പെടുത്തുന്നുണ്ടെന്ന് കുമ്മനം ചൂണ്ടിക്കാട്ടി. അന്വേഷണ ഉദ്യോഗസ്ഥന് ഇക്കാര്യത്തില് കൂടുതല് ശ്രദ്ധ കേന്ദ്രീകരിക്കണമെന്നും കോടതി പറഞ്ഞിട്ടുണ്ട്.
അഴിമതിക്കെതിരെ വിട്ടുവീഴ്ചയില്ലാത്ത സമീപനം സ്വീകരിക്കണമെന്നും, അന്വേഷണം വെറും പ്രഹസനമാകരുതെന്നും കോടതി ഓര്മ്മിപ്പിച്ചു. സര്ക്കാരിന്റെയോ മറ്റ് ഉന്നതരുടെയോ ഇടപെടലുകള് അന്വേഷണത്തെ ബാധിക്കരുതെന്ന പരോക്ഷമായ സൂചനയും കോടതിയുടെ നിരീക്ഷണങ്ങളിലുണ്ടെന്ന് കുമ്മനം പറഞ്ഞു.
