പത്തനംതിട്ട: ശബരിമല സ്വര്‍ണക്കൊള്ള കേസില്‍ പ്രധാനപ്രതി എ. പത്മകുമാറിനെ തഴയാതെ സിപിഎം പത്തനംതിട്ട ജില്ലാ സെക്രട്ടറിയേറ്റ്. സംസ്ഥാന ഘടകത്തിന്റെ നിലപാട് അറിഞ്ഞശേഷം മതി നടപടിയെന്ന് ഇന്നലെ ചേര്‍ന്ന ജില്ലാ സെക്രട്ടറിയേറ്റ് തീരുമാനിച്ചു. സ്വര്‍ണ്ണക്കൊള്ളയിലെ പ്രമുഖരുടെയെല്ലാം പേര് വെളിപ്പെടുത്തുമെന്ന പത്മകുമാറിന്റെ ഭീഷണിയില്‍ ഭയന്നാണ് നടപടി വേണ്ടെന്ന നിലപാടിലേക്കു പാര്‍ട്ടി എത്തിയത്. സംസ്ഥാന നേതൃത്വത്തിന്റെ സമ്മര്‍ദ്ദത്തെ തുടര്‍ന്നാണ് ജില്ലാ ഘടകം ഉടനെ നടപടി വേണ്ടെന്ന തീരുമാനത്തിലേക്കെത്തിയത്. സ്വര്‍ണക്കൊള്ളക്കേസില്‍ പത്മകുമാര്‍ കൂടുതല്‍ പേരുടെ പങ്ക് പുറത്ത് വിട്ടാല്‍ മന്ത്രിസഭയിലുള്ളവരടക്കം സംസ്ഥാന നേതാക്കള്‍ കുടുങ്ങുമെന്ന് ഭയന്നാണ് നടപടിയില്‍ നിന്ന് പാര്‍ട്ടി പിന്നോട്ട് പോയത്.
പത്മകുമാറിന് ജാമ്യം കിട്ടുന്ന മുറയ്‌ക്ക് വിഷയത്തില്‍ അനുനയ നീക്കം നടത്താമെന്നാണ് സംസ്ഥാന നേതാക്കള്‍ പറയുന്നത്. സംസ്ഥാന ഘടകം വിഷയം പരിഗണിക്കുമ്പോഴേക്കും പത്മകുമാറിന് സ്വാഭാവിക ജാമ്യം കിട്ടുമെന്നാണ് കണക്കുകൂട്ടല്‍. ഇപ്പോഴത്തെ സാഹചര്യത്തില്‍ പത്മകുമാറിനെ അധികം ചൊടിപ്പിക്കുന്നത് നന്നല്ലെന്നാണ് പാര്‍ട്ടിയിലെ പൊതു വിലയിരുത്തല്‍.
