കല്പ്പറ്റ: ബിരുദം നേടിയതിനു ശേഷം ജോലി ചെയ്യുക എന്നത് മാത്രമാകരുത് യുവജനങ്ങളുടെ ലക്ഷ്യമെന്നും മറ്റുള്ളവര്ക്ക് ജോലി നല്കാനുതകുന്ന രീതിയില് നൂതനസംരംഭകരാകാന് ശ്രമിക്കുകയാണ് വേണ്ടതെന്നും ഗവര്ണര് രാജേന്ദ്ര വിശ്വനാഥ് ആര്ലേക്കര്.
കേരള വെറ്ററിനറി ആന്ഡ് ആനിമല് സയന്സസ് സര്വകലാശാലയുടെ അഞ്ചാമത് ബിരുദദാന സമ്മേളനം പൂക്കോട് ഉദ്ഘാടനം ചെയ്യുകയായിരുന്നു സര്വകലാശാല ചാന്സലര് കൂടിയായ ഗവര്ണര്. സര്വകലാശാല വിദ്യാര്ത്ഥികള് ഒപ്പിട്ട് സമര്പ്പിച്ച സ്ത്രീധനത്തിനെതിരെയുള്ള നിവേദനം സംസ്ഥാനത്തിനാകെ മാതൃകയാണെന്നും അദ്ദേഹം പറഞ്ഞു.
ഉന്നത വിജയം നേടിയ വിദ്യാര്ത്ഥികള്ക്കുള്ള സ്വര്ണ മെഡലുകളും, വെറ്ററിനറി യൂണിവേഴ്സിറ്റി നടത്തി വരുന്ന കോഴ്സുകളായ ബിവിഎസ്സി ആന്ഡ് എഎച്ച്, എംവിഎസ്സി, പിഎച്ച്ഡി, ബി.ടെക് (ഡെയറി സയന്സ്), എം.ടെക്, പിഎച്ച്ഡി, ബിഎസ്സി. (പിപിബിഎം.), എന്നീ വിവിധ ഡിപ്ലോമ കോഴ്സുകളുടെ സര്ട്ടിഫിക്കറ്റുകളും വിതരണം ചെയ്തു. വെറ്ററിനറി സര്വകലാശാല രജിസ്ട്രാര് പ്രൊഫ. ഡോ. പി. സുധീര്ബാബു അധ്യക്ഷനായിരുന്നു. വൈസ് ചാന്സലര് പ്രൊഫ. ഡോ. കെ.എസ്. അനില് സ്വാഗതം ആശംസിച്ചു. പ്രൊ-ചാന്സലറും മന്ത്രിയുമായ ജെ. ചിഞ്ചുറാണി വിദ്യാര്ത്ഥികള്ക്കുള്ള സന്ദേശം നല്കി.
