തിരുവനന്തപുരം: തദ്ദേശ തെരഞ്ഞെടുപ്പില് സി പി എമ്മിനേറ്റ കനത്ത പ്രഹരത്തിന് കാരണമായ വിഷയങ്ങളില് ഒരു പങ്ക് വഹിച്ച പോറ്റിയെ കയറ്റിയെ പാരഡി പാട്ടില് കേസെടുത്ത് സൈബര് പൊലീസ്.
കേസില് ഗാനരചയിതാവ് ഉള്പ്പെടെ നാല് പേരെ പ്രതി ചേര്ത്തു. കുഞ്ഞബ്ദുള്ള, ഡാനിഷ് മലപ്പുറം, സിഎംഎസ് മീഡിയ, സുബൈര് പന്തല്ലൂര് എന്നിവരാണ് പ്രതികള്. മതവികാരം വൃണപ്പെടുത്തിയതിനും ഇരുവിഭാഗങ്ങള് തമ്മില് സ്പര്ധയുണ്ടാക്കിയതിനുമാണ് കേസ്. ഗാനരചയിതാവിന്റെ പേര് ജി പി കുഞ്ഞബ്ദുള്ള എന്നാണെങ്കിലും എഫ്ഐആറില് പേര് കുഞ്ഞുപിള്ള എന്നാണ് എഴുതിയിരിക്കുന്നത്.
അയ്യപ്പന്റെ പേര് ഉപയോഗിച്ചത് മതവികാരം വ്രണപ്പെടുത്തിയെന്ന പരാതിയിന്മേല് തിരുവനന്തപുരം സൈബര് പൊലീസ് ആണ് കേസെടുത്തത്. നിയമോപദേശം തേടിയ ശേഷമാണ് നടപടി.തിരുവാഭരണപാത സംരക്ഷണ സമിതിയുടെ പേരില് പ്രസാദ് കുഴിക്കാലയാണ് ഡി ജി പിക്ക് പരാതി നല്കിയത്.
അയ്യപ്പഭക്തി ഗാനത്തെ അവഹേളിക്കുന്നതാണ് പാരഡി ഗാനമെന്നും അത് ഭക്തര്ക്ക് വേദന ഉണ്ടാക്കിയെന്നുമാണ് പരാതിയില് പറയുന്നത്.അതേസമയം,2010ല് രൂപീകരിച്ച തിരുവാഭരണപാത സംരക്ഷണ സമിതിയില് നിന്ന് അഭിപ്രായ ഭിന്നതയെ തുടര്ന്ന് നേരത്തേ തന്നെ പുറത്തുപോയിരുന്നുവെന്ന് സംഘടനയുടെ ചെയര്മാന് പറഞ്ഞു.
പാട്ടെഴുതിയ നാദാപുരം സ്വദേശി കുഞ്ഞബ്ദുള്ള 46 വര്ഷമായി ഖത്തറിലാണ്. മൂന്നാം ക്ലാസ് വരെ മാത്രമാണ് വിദ്യാഭ്യാസം. അദ്ദേഹം എഴുതിയ പാട്ട് കൊളളണ്ടിടത്ത് കൊണ്ടു എന്നതാണ് കേസെടുത്തതിലൂടെ വ്യക്തമാകുന്നത്.
