ന്യൂദല്ഹി: കോണ്ഗ്രസ് നേതാക്കളും മുന് അധ്യക്ഷരുമായ സോണിയ, മകന് രാഹുല്, കോണ്. നേതാക്കളായ സാംപിത്രോദ, സുമന് ദുബെ മോട്ടിലാല് വോറ, ഓസ്കാര് ഫെര്ണാണ്ടസ് എന്നിവരുള്പ്പെട്ട നാഷണല് ഹെറാള്ഡ് കേസില് എന്ഫോഴ്സ്മെന്റ് ഡയറക്ടറേറ്റിന് അന്വേഷണം തുടരാം.
വിഷയത്തില് ദല്ഹി പോലീസ് കേസ് എടുത്തിട്ടുണ്ട്. ഇ ഡി അന്വേഷണം നടത്തുന്നുമുണ്ട്. ഈ സാഹചര്യത്തില് ഇ ഡിക്ക് കൂടുതല് കാര്യങ്ങള് കോടതിയില് സമര്പ്പിക്കുകയും ചെയ്യാം. ദല്ഹി റോസ് ഹൗസ് കോടതി ജഡ്ജി വിശാല് ഗോഗ്നെ വ്യക്തമാക്കി.
എന്നാല് ഇക്കാര്യത്തില് ഇ ഡി നല്കിയ പരാതി കോടതി തള്ളി. ബിജെപി നേതാവ് ഡോ. സുബ്രഹ്മണ്യന് സ്വാമി നല്കിയ സ്വകാര്യ പരാതിയുടെ അടിസ്ഥാനത്തിലാണ്, ഇ ഡി പരാതി നല്കിയതെന്നും ഏതെങ്കിലും ഒരു എഫ്ഐആറിന്റെ (കേസിന്റെ) അടിസ്ഥാനത്തിലല്ലെന്നും അതിനാലാണ് ഇ ഡിയുടെ പരാതി തള്ളുന്നതെന്നും കോടതി വ്യക്തമാക്കി.
കള്ളപ്പണം വെളുപ്പിക്കല് നിരോധന നിയമപ്രകാരം ഇ ഡി കേസ് എടുത്തു വേണം നീങ്ങാന്, കോടതി ചൂണ്ടിക്കാട്ടി. പരാതി തള്ളിയ വിചാരണക്കോടതി നടപടിക്കെതിരെ അപ്പീല് നല്കുമെന്ന് ഇ ഡി വ്യക്തമാക്കി.
സോണിയയും രാഹുലും അടക്കമുള്ളവര് ചേര്ന്ന് ഉണ്ടാക്കിയ യങ് ഇന്ത്യന് എന്ന കമ്പനി, ചുളുവിലയ്ക്ക്, കോണ്ഗ്രസിന്റെ മുഖപത്രമായിരുന്ന നാഷണല് ഹെറാള്ഡിന്റെ വിവിധ സ്ഥലങ്ങളിലുള്ള 2000 കോടിയിലേറെ വിലമതിക്കുന്ന സ്വത്ത് തട്ടിയെടുത്തുവെന്നാണ് കേസ്. കമ്പനിയില് സോണിയയ്ക്കും രാഹുലിനും കൂടി 75 ശതമാനത്തോളം ഓഹരികളാണ് ഉള്ളത്.
