ന്യൂദല്ഹി: പാക് അധീന കശ്മീരില് ആരാധനാലയങ്ങളുടെ മറവില് ലഷ്കര് ഇ തൊയ്ബ ഭീകരപ്രവര്ത്തനങ്ങള്ക്കായുള്ള നിര്മാണ പ്രവര്ത്തനങ്ങള് നടത്തുന്നു. ഇതിന്റെ ഉപഗ്രഹ ചിത്രങ്ങളും ഫോട്ടോകളും പുറത്ത്. നീലം താഴ്വരയോട് ചേര്ന്ന പ്രദേശത്താണ് ഭീകരപ്രവര്ത്തനങ്ങള്ക്കെന്ന് സംശയിക്കാവുന്ന നിര്മാണ പ്രവര്ത്തനങ്ങള് നടക്കുന്നതെന്നാണ് ഇന്റലിജന്സ് റിപ്പോര്ട്ട്.
ഷാര്ദ പ്രദേശത്ത് നിര്മിക്കുന്ന ലഷ്കര് ഇ തൊയ്ബയുടെ പുതിയ കേന്ദ്രത്തിന്റെ നിര്മാണ പ്രവര്ത്തനം നവംബറിലാണ് ആരംഭിച്ചത്. ഈ കേന്ദ്രം മതപരമായ ആരാധനാലയമായും ഭീകരവാദ പ്രവര്ത്തനങ്ങള്ക്കുള്ള കമാന്ഡ് ആന്ഡ് കണ്ട്രോള് സെന്ററായും ഒരുമിച്ച് പ്രവര്ത്തിക്കാന് രൂപകല്പന ചെയ്തതാണെന്നാണ് സൂചന. ഇത്തരത്തില് നാല് കേന്ദ്രങ്ങളുടെ നിര്മാണ പ്രവര്ത്തനങ്ങള് പാക് അധീന കശ്മീരില് നടക്കുന്നുണ്ടെന്നാണ് റിപ്പോര്ട്ടുകള്. ലഷ്കര് ഇ തൊയ്ബ പാക് അധീന കശ്മീര് യൂണിറ്റിന്റെ ഡെപ്യൂട്ടി ആയ റിസ്വാന് ഹനീഫ് നീലം താഴ്വര സന്ദര്ശിക്കുകയും നിര്മാണ പ്രവര്ത്തനങ്ങള് വിലയിരുത്തുകയും ചെയ്തുവെന്നും ഇന്റലിജന്സ് വൃത്തങ്ങള് അറിയിച്ചു.
ലഷ്കര് ഇ തൊയ്ബ പാക് അധീന കശ്മീര് വക്താവ് ആമിര് സിയ അടുത്തിടെ പുറത്തിറക്കിയ വീഡിയോയില് നിര്മാണത്തിലിരിക്കുന്ന കെട്ടിടത്തെ മസ്ജിദ് എന്ന് പരിചയപ്പെടുത്തുകയും അബദ്ധത്തില് മര്ക്കസ് (കേന്ദ്രം) എന്ന് സംബോധനയും ചെയ്തിരുന്നു. ഇതിനേത്തുടര്ന്നാണ് ആരാധനാലയങ്ങളുടെ മറവില് ലഷ്കര് ഇ തൊയ്ബ ഭീകരപ്രവര്ത്തനങ്ങള്ക്കായുള്ള നിര്മാണ പ്രവര്ത്തനങ്ങള് നടത്തുന്നുവെന്ന് വിവരം ലഭിച്ചത്.
