ന്യൂദല്ഹി: ദേശീയ ഗ്രാമീണ തൊഴിലുറപ്പ് പദ്ധതിയില് സമഗ്ര മാറ്റം ലക്ഷ്യമിട്ട് കേന്ദ്രം പുതിയ ബില് പാര്ലമെന്റില് അവതരിപ്പിക്കും. തൊഴില് ദിനങ്ങളുടെ എണ്ണത്തില് വര്ദ്ധനയുള്പ്പെടെ സമഗ്ര മാറ്റമാണ് ബില്ലിലുള്ളത്. വികസിത ഭാരത് ഗാരന്റി ഫോര് റോസ്ഗാര് ആന്ഡ് അജീവിക മിഷന് (ഗ്രാമീണ്) എന്ന ബില്ലാണ് കൊണ്ടുവരുന്നത്. വിബി ജി റാം ജി എന്ന ചുരുക്ക പേരിലും ബില് അറിയപ്പെടുന്നു. പ്രധാനമന്ത്രി നരേന്ദ്ര മോദി മുന്നോട്ടുവച്ച, 2047ല് വികസിത ഭാരതം എന്ന ദര്ശനം സാക്ഷാത്കരിക്കുന്നതിന്റെ ഭാഗമായാണ് പദ്ധതിയുടെ പേരുള്പ്പെടെ മാറ്റി പുനഃക്രമീകരിക്കുന്നത്.
ദേശീയ ഗ്രാമീണ തൊഴിലുറപ്പ് പദ്ധതി പ്രകാരം ഗ്രാമീണ മേഖലകളിലെ തൊഴിലാളികള്ക്ക് 100 ദിവസത്തെ തൊഴിലാണ് ഉറപ്പുനല്കുന്നത്. നൂറ് ദിവസത്തെ തൊഴില് എന്നത് 125 ദിവസമായുയര്ത്താന് പുതിയ ബില് നിര്ദേശിക്കുന്നു. തൊഴിലിനു ശേഷം വേതനം ഏഴ് ദിവസം അല്ലെങ്കില് പരമാവധി 15 ദിവസത്തിനകം നല്കും. അഥവാ, വേതനം ഈ കാലപരിധിക്കുള്ളില് നല്കാനായില്ലെങ്കില് പ്രത്യേകമായി തൊഴിലില്ലായ്മ വേതനം നല്കണം.
തൊഴിലുറപ്പ് പദ്ധതി പൂര്ണമായും കേന്ദ്രാവിഷ്കൃത പദ്ധതിയാണ്. ഇതില് നൈപുണ്യമില്ലാത്ത തൊഴിലാളികളുടെ വേതനത്തിന്റെ 100 ശതമാനവും കേന്ദ്രമാണ് വഹിച്ചത്. നൈപുണ്യമുള്ള തൊഴിലാളികളെ നിയമിക്കുന്നതിനും സാധനങ്ങള് ക്രമീകരിക്കുന്നതിനും വരുന്ന ചെലവിന്റെ ഒരു ഭാഗം മാത്രമാണ് സംസ്ഥാനങ്ങള് വഹിച്ചിരുന്നത്. എന്നാല് പുതിയ ബില് പ്രകാരം വേതനത്തിന്റെ 60 ശതമാനം കേന്ദ്രവും 40 ശതമാനം സംസ്ഥാനവുമാണ് വഹിക്കേണ്ടത്. കേന്ദ്ര ഭരണ പ്രദേശങ്ങളില് 100 ശതമാനവും കേന്ദ്രം വഹിക്കും. വടക്കുകിഴക്കന്, ഹിമാലയന് സംസ്ഥാനങ്ങളില് 90 ശതമാനം കേന്ദ്രവും 10 ശതമാനം സംസ്ഥാനവും വഹിക്കണമെന്നാണ് വ്യവസ്ഥ.
ഗ്രാമീണ അടിസ്ഥാന സൗകര്യങ്ങള്, ഉപജീവന അടിസ്ഥാന സൗകര്യങ്ങള്, ജലസുരക്ഷ, ദുരന്ത പ്രതിരോധം എന്നിങ്ങനെ നാല് വിഭാഗങ്ങളായി തിരിച്ചായിരിക്കും ജോലി നിശ്ചയിക്കുക. സുതാര്യത ഉറപ്പാക്കാന് ബയോമെട്രിക്സ്, ജിയോ ടാഗിങ് സംവിധാനങ്ങളും ഏര്പ്പെടുത്തും. വിവിധതലങ്ങളില് പരാതി പരിഹാരത്തിനും വ്യവസ്ഥയുണ്ട്. രാജസ്ഥാന്, മധ്യപ്രദേശ്, ഛത്തിസ്ഗഡ്, ആന്ധ്രപ്രദേശ് തുടങ്ങിയ സംസ്ഥാനങ്ങള് 100 ദിവസമെന്ന പരിധി ഉയര്ത്തണമെന്ന് ആവശ്യപ്പെട്ടിരുന്നു. നിലവില് സംസ്ഥാനങ്ങള്ക്ക് ഈ 100 ദിനത്തിന് മുകളില് തൊഴിലുറപ്പാക്കാന് വ്യവസ്ഥയുണ്ട്. എന്നാല്, അതിനുള്ള പണം സംസ്ഥാനങ്ങള് തന്നെ ഉറപ്പാക്കണമായിരുന്നു.
ജന്മഭൂമി ഓണ്ലൈന്