ബെര്ലിന്: റഷ്യയുമായുള്ള യുദ്ധം അവസാനിപ്പിച്ചാല് ഉക്രൈന് യുഎസ് സംരക്ഷണം നല്കിയേക്കുമെന്ന് പ്രസിഡന്റ് വ്ളാദിമീര് സെലന്സ്കി. ബെര്ലിനില് നടക്കുന്ന സമാധാന ചര്ച്ചകള്ക്കിടെ മാധ്യമങ്ങളോട് സംസാരിക്കുകയായിരുന്നു സെലന്സ്കി. ചര്ച്ചകളില് ഉക്രൈന്റെ പ്രധാനലക്ഷ്യം നാറ്റോ അംഗത്വം ലഭിക്കുകയാണ്. എന്നാല് ഇക്കാര്യത്തില് വ്യക്തത വന്നിട്ടില്ല. നാല് വര്ഷമായി തുടരുന്ന യുദ്ധം അവസാനിപ്പിക്കാനായി യുഎസിന്റേയും യൂറോപ്യന് രാജ്യങ്ങളുടേയും നേതൃത്വത്തിലാണ് ശ്രമങ്ങള് നടത്തുന്നത്.
നാറ്റോ അംഗമാകണമെന്ന ഉക്രൈന്റെ ആവശ്യത്തിനു ബദലായി നാറ്റോയുടെ ആര്ട്ടിക്കിള് അഞ്ച് പ്രകാരമുള്ള ഒരു സുരക്ഷാ നല്കുമെന്നാണ് യുഎസ് അറിയിച്ചത്. ഇതുസംബന്ധിച്ച കരാറില് ഇരു രാജ്യങ്ങളും ഒപ്പുവച്ചേക്കുമെന്നാണ് സൂചന. ഈ സുരക്ഷാ കരാറില് യുഎസിന് പുറമെ യുറോപ്യന് രാജ്യങ്ങളും കാനഡ, ജപ്പാന് എന്നീ രാജ്യങ്ങളും പങ്കുചേരും. ഔദ്യോഗികമായി നാറ്റോയുടെ ഭാഗമാകില്ലെങ്കിലും ഭാവിയിലെ റഷ്യന് ഭീഷണിയില് നിന്ന് സംരക്ഷണം നല്കുന്ന കരാറാകുമിത്. എന്നാല് അംഗരാജ്യങ്ങള് ആക്രമിക്കപ്പെട്ടാല് എല്ലാവര്ക്കുമെതിരായ ആക്രമണമായി കണക്കാക്കുന്ന നാറ്റോയുടെ രീതി ഇതില് ഉണ്ടായേക്കില്ല.
ജനങ്ങളുടെ സുരക്ഷ ഉറപ്പുവരുത്തിയാല് മാത്രമേ സമാധാനം കൊണ്ടുവരാനാകൂ. ഉക്രൈനിന്റെ ഭാവി സംബന്ധിച്ച സമാധാന കരാറിനായുള്ള രൂപരേഖ എല്ലാവര്ക്കും ഇഷ്ടപ്പെടുന്ന ഒന്നായിരിക്കില്ലെന്ന് റഷ്യയെ പരോക്ഷമായി പ്രതിപാദിച്ചുകൊണ്ട് സെലന്സ്കി പ്രതികരിച്ചു. സമാധാന പദ്ധതി ഉക്രൈന് വേണ്ടിയാകണം. റഷ്യയാണ് യുദ്ധത്തിന് തുടക്കമിട്ടത്. സമാധാന കരാറില് ഒപ്പ് വെച്ചതിന് ശേഷം റഷ്യക്ക് മറ്റൊരു യുദ്ധം ആരംഭിക്കാന് അവസരം ലഭിക്കില്ലെന്ന് വ്യവസ്ഥ ചെയ്യണം, സെലന്സ്കി കൂട്ടിച്ചേര്ത്തു.
