തിരുവനന്തപുരം:രാഹുല് മാങ്കൂട്ടത്തില് എം എല് എയ്ക്കെതിരെ ലൈംഗിക അതിക്രമത്തിന് പരാതി നല്കിയ യുവതിയെ അധിക്ഷേപിച്ചെന്ന കേസില് രാഹുല് ഈശ്വറിന് ജാമ്യം.തിരുവനന്തപുരം അഡീഷണല് സെഷന്സ് കോടതി ഉപാധികളോടെയാണ് ജാമ്യം അനുവദിച്ചത്.
അറസ്റ്റിലായി 16 ദിവസത്തിന് ശേഷമാണ് ജാമ്യം ലഭിച്ചത്. ജാമ്യാപേക്ഷ രണ്ടു തവണ തിരുവനന്തപുരം അഡീഷണല് ചീഫ് ജുഡീഷ്യല് മജിസ്ട്രേറ്റ് തള്ളിയിരുന്നു.
സാക്ഷികളെ സ്വാധീനിക്കരുത്, മറ്റു കേസുകളില് ഉള്പ്പെടരുത് തുടങ്ങിയ ഉപാധികളോടെയാണ് രാഹുലിന് ജാമ്യം അനുവദിച്ചത്.രാഹുല് അന്വേഷണവുമായി സഹകരിക്കാത്തിനാല് രണ്ടു ദിവസത്തെ കസ്റ്റഡി വേണമെന്ന് പ്രോസിക്യൂഷന് ജാമ്യ ഹര്ജിയെ എതിര്ത്തുകൊണ്ട് ആവശ്യപ്പെട്ടിരുന്നു. ഒരു തെറ്റും ചെയ്തിട്ടില്ലെന്ന് രാഹുല് ഈശ്വറിന്റെ അഭിഭാഷകന് വാദിച്ചു. ഇത്രയും ദിവസത്തിനു ശേഷം ഇനി എന്തിനാണ് വീണ്ടും കസ്റ്റഡിയെന്ന് കോടതി ചോദിച്ചു. ഈ കേസിലെ മറ്റൊരു പ്രതി സന്ദീപ് വാര്യയുടെ മുന്കൂര് ജാമ്യാപേക്ഷ നാളെ പരിഗണിക്കും.
