മുംബൈ: ലോക ഫുട്ബോളിലെ ഇതിഹാസം അര്ജന്റീനയുടെ ലയണല് മെസി മുംബൈയില് പ്രശസ്തമായ വാംഖഡെ സ്റ്റേഡിയത്തില് അവതരിച്ചു. മെസിയെ സ്വീകരിക്കാനെത്തിയതാകട്ടെ ഭാരതത്തിന്റെ ക്രിക്കറ്റ് ദൈവം സച്ചിന് ടെന്ഡുല്ക്കര്. ഇരുവരും വാംഖഡെയുടെ തിരുമുറ്റത്ത് എത്തിയത് ഈ നൂറ്റാണ്ട് കണ്ട ഏറ്റവും മഹത്തായ കായികക്കാഴ്ചയായി.
ഒപ്പം ഇന്ത്യന് ഫുട്ബോളിലെ ഇതിഹാസ താരം സുനില് ഛേത്രി കൂടി ഇരുവര്ക്കുമൊപ്പം ചേര്ന്നതോടെ അക്ഷരാര്ഥത്തില് മുംബൈ കോരിത്തരിച്ചു. ലയണല് മെസിയുടെ ഇന്ത്യന് സന്ദര്ശനത്തിന്റെ രണ്ടാം ദിനത്തിലായിരുന്നു അനുപമ ചടങ്ങ് മുംബൈയില് അരങ്ങേറിയത്. കൊല്ക്കത്തയിലെ നാണംകെട്ട സംഘാടനമായിരുന്നുവെങ്കില് മുംബൈ അതിനൊപ്പം പകരംവീട്ടി ഏറ്റവും ഹൃദ്യമായ സ്വീകരണം തന്നെ മെസിക്കൊരുക്കി. മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്നാവിസ് അടക്കമുള്ള പ്രമുഖര് ചടങ്ങിനെത്തി.
അതേസമയം, സുരക്ഷാ പ്രശ്നങ്ങള് ചൂണ്ടിക്കാട്ടി കൂടുതല് വിവിഐപികളെ മൈതാനത്തേക്കിറക്കിയില്ല. ബോളിവുഡ് താരം ഷാരൂഖ് ഖാന്, ക്രിക്കറ്റ് വിസ്മയം വിരാട് കോഹ്ലി, ഭാര്യ അനുഷ്ക, ബോളിവുഡ് താരങ്ങളായ സെയ്ഫ് അലിഖാന്, ഭാര്യ കരീന കപൂര്, ജോണ് ഏബ്രഹാം തുടങ്ങിയ പ്രമുഖര് മെസിയെ കാണാനെത്തി. മെസിക്കൊപ്പം റോഡ്രിഗോ ഡി പോള്, ലൂയിസ് സ്വാരസ് എന്നിവരുമുണ്ടായിരുന്നു.
ഇന്നലെ വൈകിട്ട് ആറോടെ മൈതാനത്തെത്തിയ മെസി കുട്ടികള്ക്കൊപ്പം ഫുട്ബോള് കളിച്ചു. പ്രദര്ശന മത്സരത്തിലും പങ്കെടുത്തു. തുടര്ന്ന് രാത്രിയില് ബോളിവുഡ് താരങ്ങളടക്കമുള്ളവരുടെ സെലിബ്രിറ്റി ഫാഷന് ഷോയിലും മെസി പങ്കെടുത്തു. മെസി ഇന്ന് പ്രധാനമന്ത്രി നരേന്ദ്രമോദിയെ സന്ദര്ശിക്കും. ഡല്ഹി അരുണ് ജയ്റ്റ്ലി സ്റ്റേഡിയത്തിലും മെസി എത്തുന്നുണ്ട്. മെസി ഇന്ന് ഇന്ത്യയില്നിന്നു നാട്ടിലേക്ക് പോകും.
