ആലപ്പുഴ: പലസ്തീന് ഐക്യദാര്ഢ്യ കാമ്പയിന് ഏറ്റവും ശക്തമായി മുന്നോട്ട് കൊണ്ടുപോയിട്ടും ന്യൂനപക്ഷങ്ങള് സിപിഎമ്മിനോട് അകലുന്നതായി വിലപിച്ച് കേന്ദ്ര കമ്മിറ്റിയംഗവും മുന് മന്ത്രിയുമായ തോമസ് ഐസക്ക്. തദ്ദേശ തെരഞ്ഞെടുപ്പിലെ തോല്വിയെ തുടര്ന്നുള്ള സമൂഹമാധ്യമ കുറിപ്പിലാണ് ഐസക്കിന്റെ പരാമര്ശം.
തദ്ദേശഭരണ തെരഞ്ഞെടുപ്പില് ഇതുപോലൊരു തിരിച്ചടി ഉണ്ടാകുമെന്ന് കരുതിയില്ല. 2021 ആവര്ത്തിക്കുമെന്ന് പ്രതീക്ഷിച്ചിട്ടില്ല. കാരണം, അത് അത്രയ്ക്ക് ഉയര്ന്നതായിരുന്നു. പക്ഷേ, ഏതാണ്ട് 2010ലെ സ്ഥിതിയിലേക്ക് വീഴുമെന്ന് പ്രതീക്ഷിച്ചില്ല. സിപിഐ(എം)ന്റെ ഇന്നത്തെ രാഷ്ട്രീയകാഴ്ചപ്പാടില് ഒരു സുപ്രധാന കേന്ദ്രഘടകം ന്യൂനപക്ഷ സംരക്ഷണമാണ്. പക്ഷേ, കഴിഞ്ഞ ലോക്സഭാ തെരഞ്ഞെടുപ്പിലെന്ന പോലെ ന്യൂനപക്ഷങ്ങളില് ഒരു വിഭാഗം ഇടതുപക്ഷത്തു നിന്നും അകലുന്ന അനുഭവമാണ് ഇപ്പോഴും ഉണ്ടായിട്ടുള്ളത്. പലസ്തീന് ഐക്യദാര്ഢ്യ കാമ്പയിന് ഏറ്റവും ശക്തമായി മുന്നോട്ട് കൊണ്ടുപോകുന്ന കാലയളവിലാണ് ഇത് ഉണ്ടായിട്ടുള്ളത്. ‘ഇടത് ഹിന്ദുത്വ’യെക്കുറിച്ചുള്ള ആഖ്യാനങ്ങള്ക്ക് എന്തുകൊണ്ടാണ് ഒരു വിഭാഗം ജനങ്ങളെ വഴിതെറ്റിക്കാന് കഴിയുന്നത്? അതിനു നമ്മുടെ എന്തെങ്കിലും വീഴ്ചകള് നിമിത്തങ്ങളായിട്ടുണ്ടോ?
കഴിഞ്ഞ ലോക്സഭാ തെരഞ്ഞെടുപ്പിലെ പരാജയത്തിനുശേഷവും 24-ാം പാര്ട്ടി കോണ്ഗ്രസിന്റെ ഭാഗമായും സംഘടനാപരമായ ദൗര്ബല്യങ്ങള് വിലയിരുത്തി തെറ്റുകള് തിരുത്തുന്നതിന് വലിയ കാമ്പയിന് തന്നെ സംഘടിപ്പിക്കുകയുണ്ടായി. എന്നാല് ഈ ദൗര്ബല്യങ്ങള് പലതും തുടരുന്നുവെന്നാണ് തെരഞ്ഞെടുപ്പ് ഫലങ്ങള് സൂചിപ്പിക്കുന്നത്. അവ അടിയന്തരമായി തിരുത്തി നിയമസഭാ തെരഞ്ഞെടുപ്പിനെ അഭിമുഖീകരിക്കാന് എന്ത് നടപടി സ്വീകരിക്കണം?
2010-ലെ തെരഞ്ഞെടുപ്പില് ഇതിനേക്കാള് മോശം പ്രകടനം കാഴ്ചവച്ചിട്ടും വിജയത്തിനോടടുത്ത പരാജയമേ നിയമസഭാ തെരഞ്ഞെടുപ്പില് ഉണ്ടായുള്ളൂ. ഇന്നത്തെ ദേശീയ രാഷ്ട്രീയത്തില് ഇടതുപക്ഷ നേതൃത്വത്തിലുള്ള ഒരു സംസ്ഥാന ഭരണമെങ്കിലും തുടരേണ്ടത് നാടിന്റെ ആവശ്യമാണ്. ഈ വിജയം ഉറപ്പാക്കണമെങ്കില് പരാജയത്തെ നിശിതമായി വിലയിരുത്തി ആവശ്യമായ തിരുത്തലുകള് അടിയന്തരമായി സ്വീകരിക്കേണ്ടതുണ്ടെന്ന് പാര്ട്ടി വ്യക്തമാക്കിക്കഴിഞ്ഞു. ഉയര്ത്തെഴുന്നേല്പ്പ് നിയമസഭാ തെരഞ്ഞെടുപ്പില് കേരളം സാക്ഷ്യംവഹിക്കും, ഐസക്ക് പറയുന്നു.
