ന്യൂദല്‍ഹി: തെരഞ്ഞെടുപ്പ് പരിഷ്‌കരണങ്ങളുമായി ബന്ധപ്പെട്ട് ലോക്സഭയില്‍ നടന്ന ചര്‍ച്ചയ്‌ക്ക് നല്‍കിയ മറുപടിക്ക് കേന്ദ്ര ആഭ്യന്തരമന്ത്രി അമിത് ഷായെ അഭിനന്ദിച്ച് പ്രധാനമന്ത്രി നരേന്ദ്ര മോദി. ആഭ്യന്തരമന്ത്രി അമിത് ഷായുടെ പ്രസംഗം ശ്രദ്ധേയമായെന്ന് പ്രധാനമന്ത്രി എക്സില്‍ കുറിച്ചു.
വസ്തുതകളുടെ അടിസ്ഥാനത്തില്‍ അദ്ദേഹം നമ്മുടെ തെരഞ്ഞെടുപ്പ് പ്രക്രിയയുടെ വൈവിധ്യമാര്‍ന്ന വശങ്ങള്‍, ജനാധിപത്യത്തിന്റെ ശക്തി എന്നിവ എടുത്തുകാണിക്കുകയും പ്രതിപക്ഷത്തിന്റെ നുണകള്‍ തുറന്നുകാട്ടുകയും ചെയ്‌തെന്ന് പ്രധാനമന്ത്രി വ്യക്തമാക്കി. അമിത് ഷായുടെ മറുപടി പ്രസംഗത്തിന്റെ വീഡിയോയും പ്രധാനമന്ത്രി പങ്കുവെച്ചു.
കടുത്ത പനി പോലും വകവെയ്‌ക്കാതെയാണ് അമിത് ഷാ ലോക്സഭയില്‍ മറുപടി പ്രസംഗം നടത്തിയതെന്ന വാര്‍ത്തകളും ഇന്നലെ പുറത്തുവന്നു. സംസാരിക്കാന്‍ എഴുന്നേറ്റപ്പോള്‍ അമിത് ഷായ്‌ക്ക് 102 ഡിഗ്രി പനിയുണ്ടായിരുന്നുവെന്നാണ് വാര്‍ത്ത. സെഷന് തൊട്ടുമുമ്പ് ഡോക്ടര്‍മാര്‍ അദ്ദേഹത്തെ പരിശോധിക്കുകയും പനി കുറയാന്‍ മരുന്ന് നല്‍കുകയും ചെയ്തിരുന്നു.
ഒന്നര മണിക്കൂര്‍ പ്രസംഗത്തില്‍ എസ്ഐആര്‍, വോട്ട് മോഷണം, തെരഞ്ഞെടുപ്പ് കമ്മിഷനിലെ നിയമനങ്ങള്‍ എന്നിവ സംബന്ധിച്ച് പ്രതിപക്ഷം ഉന്നയിച്ച എല്ലാ ആരോപണങ്ങള്‍ക്കും അമിത് ഷാ അക്കമിട്ട് മറുപടി നല്‍കി. ക്രമക്കേടുകള്‍ ആരോപിക്കുകയും എസ്ഐആറിനെ എതിര്‍ക്കുകയും ചെയ്യുന്ന പ്രതിപക്ഷത്തിന്റെ ഇരട്ടത്താപ്പ് തുറന്നുകാട്ടി. കോണ്‍ഗ്രസും പ്രതിപക്ഷ പാര്‍ട്ടികളും ജയിക്കുമ്പോള്‍ വോട്ടര്‍ പട്ടിക ശരി, എന്നാല്‍ ബീഹാറിലെ പോലെ പരാജയം ഏറ്റുവാങ്ങുമ്പോള്‍ വോട്ടര്‍ പട്ടികയില്‍ പ്രശ്നമുണ്ടെന്ന് പറയുന്നു, ഈ ഇരട്ടത്താപ്പ് വിലപ്പോകില്ല. നുഴഞ്ഞുക്കയറ്റക്കാരെ അനുവദിക്കാനാകില്ലെന്നും അമിത് ഷാ ആവര്‍ത്തിച്ച് വ്യക്തമാക്കിയിരുന്നു.
