ന്യൂദല്ഹി: ബംഗാളിലെ മൂര്ഷിദാബാദില് ബാബറി മസ്ജിദ് പണിയാന് ബാങ്കില് നിയമം അനുവദിക്കുന്നതിനേക്കാള് കൂടുതല് വിദേശപ്പണം എത്തുന്നതായി പരാതി. ഇതോടെ ബാബറി മസ്ജിദ് പണിയുന്നതിന് മുന്കയ്യെടുക്കുന്ന പാര്ട്ടിയില് നിന്നും പുറത്താക്കപ്പെട്ട തൃണമൂല് എംഎല്എ ഹുമയൂണ് കബീറിനോട് സ്റ്റേറ്റ് ബാങ്ക് ഓഫ് ഇന്ത്യ (എസ് ബിഐ) വിശദീകരണം ചോദിച്ചിരിക്കുകയാണ്. ഹുമയൂണ് കബീര് പള്ളി പണിയുന്നതിനുള്ള ഫണ്ട് ശേഖരിക്കാന് ഒരുക്കിയിട്ടുള്ള എസ്ബി ഐ ബാങ്ക് ശാഖയിലെ അക്കൗണ്ടിലേക്ക് വിദേശത്ത് നിന്നും പണം അയയ്ക്കുന്ന ആളുകളുടെ വിശദമായ വിവരങ്ങള് നല്കണമെന്നാണ് എസ് ബിഐ ആവശ്യപ്പെട്ടിരിക്കുന്നത്.
വിദേശപ്പണം ഇന്ത്യയിലെ ഒരു ബാങ്ക് അക്കൗണ്ടിലേക്ക് എത്തുന്നതിന് ഇന്ത്യയിലെ കേന്ദ്രബാങ്കായ റിസര്വ്വ് ബാങ്ക് ചില പരിധികള് നിശ്ചയിച്ചിട്ടുണ്ട്. അതിനേക്കാള് കൂടുതല് തുകയാണ് ഹുമയൂണ് കബീറിന്റെ ബാങ്ക് അക്കൗണ്ടിലേക്ക് എത്തുന്നത്. വിദേശത്ത് നിന്നും തുക ഓണ്ലൈനില് അയക്കുന്നവര് ക്യു ആര് കോഡ് സ്കാന് ചെയ്താണ് പണം അയയ്ക്കുന്നത്. പക്ഷെ വിദേശത്തെ പല രാജ്യങ്ങളില് നിന്നും പരിധി കവിഞ്ഞുള്ള തുകകള് ഈ ബാങ്ക് അക്കൗണ്ടിലേക്ക് എത്തുകയാണ്.
ബാബറി മസ്ജിദ് പണിയുന്നതിനായി കഴിഞ്ഞ ദിവസം മൂര്ഷിദാബാദില് തറക്കല്ലിടുന്ന ചടങ്ങില് സംഭാവന സ്വീകരിക്കാന് പെട്ടികള് വെച്ചിരുന്നു. ഇതില് ഏകദേശം മൂന്നരക്കോടി രൂപയോളം ലഭ്യമായി. എന്തായാലും ഇപ്പോള് ബാങ്കിന് വിശദീകരണം നല്കാന് ആലോചിച്ച് വരികയാണ് ഹുമയൂണ് കബീറും കൂട്ടരും. നേരത്തെ ബാബറി മസ്ജിദ് സ്ഥാപിക്കുമെന്ന് പ്രഖ്യാപനം നടത്തിയ ഉടന് ഹുമയൂണ് കബീറിനെ തൃണമൂലില് നിന്നും മമത ബാനര്ജി സസ്പെന്റ് ചെയ്തിരുന്നു. ഇതോടെ പല രീതികളില് മൂര്ഷിദാബാദിലെ ബാബറി മസ്ജിദ് നിര്മ്മാണം വിവാദത്തിലായിരിക്കുകയാണ്.
ബാബറി മസ്ജിദ് പൊളിച്ച ഡിസംബര് ആറിനാണ് പള്ളി നിര്മ്മാണത്തിന് തറക്കല്ലിട്ടത്. ഹിന്ദുക്ഷേത്രങ്ങള് കൊള്ളയടിക്കുകയും ലക്ഷക്കണക്കിന് ഹിന്ദുക്കളെ കൊന്നൊടുക്കുകയും ചെയ്ത ബാബറിന്റെ പേരില് ഇനിയൊരു പള്ളി ഇന്ത്യയില് പണിയാന് അനുവദിക്കില്ലെന്നാണ് ബംഗാളിലെ ബിജെപി നേതാവ് ദിലീപ് ഘോഷ് പ്രഖ്യാപിച്ചിരുന്നു, എന്തായാലും ബാബറി മസ്ജിദിന്റെ പേരില് ബംഗാള് രാഷ്ട്രീയം കലങ്ങിമറിയുകയാണ്. ഇതനിടെ താന് പുതിയ പാര്ട്ടി രൂപീകരിച്ച് അസദുദ്ദീന് ഒവൈസിയുമായി ചേര്ന്ന് 2026ലെ ബംഗാള് നിയമസഭാ തെരഞ്ഞെടുപ്പില് മത്സരിക്കുമെന്ന് ഹുമയൂണ് കബീര് പ്രഖ്യാപനം നടത്തിയിരുന്നു. മാത്രമല്ല, ബംഗാളിലെ ആകെയുള്ള 294 നിയമസഭാ സീറ്റുകളില് അടുത്ത തവണ മുസ്ലിങ്ങള്ക്ക് ഭൂരിപക്ഷമുള്ള 90 സീറ്റുകള് തന്റെ പാര്ട്ടി പിടിക്കുമെന്നും ഹുമയൂണ് കബീര് പ്രഖ്യാപിച്ചിരുന്നു. മൂന്ന് തവണ ബംഗാള് ഭരിച്ച മമത ബാനര്ജിയെ നാലാമതും ബംഗാള് ഭരിയ്ക്കാന് അനുവദിക്കില്ലെന്ന് പ്രഖ്യാപിച്ചിരിക്കുകയാണ് ഹുമയൂണ് കബീര്. ഇതോടെ തൃണമൂല് കോണ്ഗ്രസ് രണ്ടായി പിളരുമെന്നും ചില അഭ്യൂഹങ്ങള് ഉയരുന്നുണ്ട്.
