വന്ദേമാതരം ചിലർക്ക് അലർജിയാണ്, രാജ്യത്തെ ഒന്നിപ്പിക്കുന്ന കാര്യങ്ങളിൽ കോൺഗ്രസ് അകന്നു നിൽക്കുന്നു;രാഹുലിനെയും പ്രിയങ്കയെയും വിമർശിച്ച് അനുരാഗ് താക്കൂർ

ന്യൂദൽഹി: വന്ദേമാതരത്തിന്റെ 150-ാം വാർഷികത്തോടനുബന്ധിച്ച് ലോക്‌സഭയിൽ നടന്ന ചരിത്രപരമായ ചർച്ചയ്‌ക്കിടെ ബിജെപി എംപി അനുരാഗ് താക്കൂർ കോൺഗ്രസ് പാർട്ടിക്കെതിരെ രൂക്ഷ വിമർശനവുമായി രംഗത്തെത്തി. പ്രധാനമന്ത്രി നരേന്ദ്ര മോദിയുടെ പ്രസംഗത്തിന് ശേഷം കോൺഗ്രസ് നേതൃത്വത്തിനെതിരെ, പ്രത്യേകിച്ച് രാഹുൽ ഗാന്ധിയെയും പ്രിയങ്ക ഗാന്ധിയെയും ലക്ഷ്യം വച്ചായിരുന്നു താക്കൂറിന്റെ വിമർശനം.

രാഹുലും പ്രിയങ്ക ഗാന്ധിയും സഭയിൽ ഇല്ലാത്തത് എന്തുകൊണ്ട് ?

രാജ്യത്തിന് ഇത്രയും പ്രധാനപ്പെട്ട ഒരു അവസരത്തിൽ രാഹുലും പ്രിയങ്ക ഗാന്ധിയും സഭയിൽ ഇല്ലാത്തത് എന്തുകൊണ്ടാണെന്ന് അനുരാഗ് താക്കൂർ ചോദിച്ചു. രാജ്യത്തെ ഒന്നിപ്പിക്കുന്ന ചിഹ്നങ്ങളിൽ നിന്ന് കോൺഗ്രസ് പാർട്ടി പലതവണ അകന്നു നിൽക്കുകയാണെന്ന് അദ്ദേഹം ആരോപിച്ചു.

വന്ദേമാതരം ചിലർക്ക് അലർജിയാണ്

വന്ദേമാതരത്തിലെ രണ്ട് വരികൾ മാത്രം നെഹ്‌റു അംഗീകരിച്ചതും ജിന്ന അതിനെ എതിർത്തതും പോലുള്ള പഴയ ചർച്ചകളും അനുരാഗ് താക്കൂർ ഉന്നയിച്ചു. ഇന്നത്തെ കോൺഗ്രസ് പോലും ആ മാനസികാവസ്ഥയിൽ നിന്ന് മുക്തമായിട്ടില്ലെന്ന് അദ്ദേഹം പറഞ്ഞു. വന്ദേമാതരം ദേശസ്‌നേഹികൾക്ക് ഊർജ്ജമാണ്, പക്ഷേ ചിലർക്ക് അത് ഒരു അലർജിയായി മാറുന്നുവെന്നും എന്ന് അനുരാഗ് താക്കൂർ കുറ്റപ്പെടുത്തി.

ഗാന്ധി സഹോദരങ്ങൾ അവരുടെ രാഷ്‌ട്രീയ പിന്തുണയ്‌ക്കായി ഇന്ത്യൻ യൂണിയൻ മുസ്ലീം ലീഗിനെ ആശ്രയിക്കുന്നുവെന്നും അദ്ദേഹം പറഞ്ഞു. “കഴിഞ്ഞ അഞ്ച് ദിവസമായി പ്രിയങ്ക ഗാന്ധി തയ്യാറെടുക്കുകയാണെന്നും വന്ദേമാതരം മുഴുവൻ വായിക്കാതെ ചൊല്ലുമെന്നും ഇടനാഴികളിൽ സംസാരമുണ്ടായിരുന്നു. അവർ വളരെയധികം ഗുരുതരമായ പാപങ്ങൾ ചെയ്തിട്ടുണ്ട്, അതിന് പ്രായശ്ചിത്തം ചെയ്യേണ്ട സമയം അതിക്രമിച്ചിരിക്കുന്നു.” -സഭയിൽ പ്രസംഗിക്കുന്നതിനുമുമ്പ് പ്രിയങ്ക ഗാന്ധിയെ ലക്ഷ്യം വച്ചുകൊണ്ട് അനുരാഗ് താക്കൂർ പറഞ്ഞു,

കോൺഗ്രസ് എന്തുകൊണ്ടാണ് വന്ദേമാതരത്തെ എതിർക്കുന്നത് ?

നെഹ്‌റുവിന്റെ നിർദ്ദേശപ്രകാരം മുറിച്ച വന്ദേമാതരത്തിന്റെ ഭാഗങ്ങളിൽ ദുർഗ്ഗാദേവിയെ സ്തുതിക്കുന്നതും ശക്തിയെ ആരാധിക്കുന്നതും ഉണ്ടായിരുന്നുവെന്ന് ബിജെപി എംപി അവകാശപ്പെട്ടു. വന്ദേമാതരം നമുക്ക് ഊർജ്ജം നൽകുന്നു, പക്ഷേ കോൺഗ്രസിലെ ചിലർക്ക് അതിനോട് അലർജിയുണ്ട്” എന്ന് അദ്ദേഹം പറഞ്ഞു. കോൺഗ്രസ് എന്തുകൊണ്ടാണ് ഇതിനെ ഇത്രയധികം എതിർക്കുന്നതെന്ന് അനുരാഗ് താക്കൂർ ചോദിച്ചു. കോൺഗ്രസിനെപ്പോലെ ചില സമാജ്‌വാദി പാർട്ടി പ്രതിനിധികളും ദേശീയഗാനത്തെ അപമാനിച്ചുവെന്ന് അദ്ദേഹം അവകാശപ്പെട്ടു. അനുരാഗ് താക്കൂറിന്റെ പ്രസ്താവനകൾ സഭയിൽ വലിയ കോലാഹലത്തിന് കാരണമായി.