കോട്ടയം: തദ്ദേശ തെരഞ്ഞെടുപ്പില് സംസ്ഥാന തലത്തില് ബിജെപി അണിനിരത്തുന്ന സ്ഥാനാര്ത്ഥികളില് ഒട്ടേറെ കൗതുകമേറിയ കാര്യങ്ങളുണ്ട്. സ്ഥാനാര്ത്ഥികളില് ഏറെപ്പേരും യുവാക്കളും വനിതകളും. ഓരോ സ്ഥാനാര്ത്ഥികളുടെയും കാഴ്ചപ്പാടുകളെക്കുറിച്ചും വിദ്യാഭ്യാസ യോഗ്യതയെക്കുറിച്ചും ജനം അന്വേഷിച്ചു. അപ്പോള് കിട്ടിയ ഉത്തരം ഏറെ അഭിമാനകരം തന്നെ. വ്യക്തമായ രാഷ്ട്രീയ ബോധവും വിദ്യാഭ്യാസ മികവും അവരിലുണ്ട്. ഡിഗ്രിയും പിജിയും ഡോക്ടറേറ്റും തുടങ്ങി നിരവധി യോഗ്യതകള്.
കൈവച്ച മേഖലകളിലെല്ലാം മികവ് തെളിയിച്ച് ഒരു എന്ഡിഎ സ്ഥാനാര്ത്ഥിയുണ്ട്, കോട്ടയം ജില്ലയിലെ മരങ്ങാട്ടുപിള്ളിയില്; മമതാ ഹരികുമാര്. മരങ്ങാട്ടുപിള്ളി ഗ്രാമപഞ്ചായത്തിലെ മൂന്നാം വാര്ഡ് (കുറിച്ചിത്താനം ഈസ്റ്റ്) സ്ഥാനാര്ത്ഥിയായ കുറിച്ചിത്താനം പാണാട്ട് മമതാ ഹരികുമാറിന്റെ വിദ്യാഭ്യാസ യോഗ്യതകളും മികവുമാണ് ഇപ്പോള് പഞ്ചായത്തിലെ ചര്ച്ചാ വിഷയം. ബിഎസ്സി മാത്തമാറ്റിക്സില് ബിരുദവും ഗാന്ധിയന് സ്റ്റഡീസില് ബിരുദാനന്തര ബിരുദവും ഫ്യൂച്ചറോളജിയില് എംഫിലുമുണ്ട് മമതയ്ക്ക്. മുംബൈ ഐഐടിയില് സുസ്ഥിര കൃഷിയില് നാല് വര്ഷത്തെ ഗവേഷണ പരിചയവുമുള്ളയാളാണ് മമത.
കൂടാതെ മഹാരാഷ്ട്രയിലെ വാര്ധ ഇന്സ്റ്റിറ്റ്യൂട്ട് ഓഫ് ഗാന്ധിയന് സ്റ്റഡീസില് നിന്ന് പിജി ഡിപ്ലോമ, കംപ്യൂട്ടര് ആപ്ലിക്കേഷനില് പിജി ഡിപ്ലോമ എന്നിവയും. വിദ്യാധിരാജാ സേവാമിഷന് സ്കൂളിലെ മുന് വൈസ് പ്രിന്സിപ്പല് കൂടിയായ മമത മരങ്ങാട്ടുപിള്ളി ഗ്രാമപഞ്ചായത്തില് എന്ഡിഎയുടെ മുഖമായിക്കഴിഞ്ഞു.
പ്രമുഖ ഗാന്ധിയനും സ്വാതന്ത്ര്യസമര കാലത്തും അടിയന്തരാവസ്ഥക്കാലത്തും ജയില്വാസമനുഭവിച്ച വ്യക്തിയുമായ രാമചന്ദ്രന് പോറ്റിയുടെ മകളാണ് മമത. കൊട്ടാരക്കര കോട്ടവട്ടം തെന്കുന്നത്ത് മഠത്തിലാണ് ജനനം. തൃപ്പൂണിത്തുറ കണ്ണാടിക്കോവിലകത്തെ സരോജാ വര്മ്മയാണ് അമ്മ. മനുഷ്യാവകാശ സംഘടനാ പ്രവര്ത്തകയും റിട്ട. ഡിഇഒയുമായിരുന്നു അവര്. പ്രശസ്ത സാഹിത്യകാരി ലളിതാംബിക അന്തര്ജനത്തിന്റെ കുടുംബാംഗമായ മമത, കലാരംഗത്തും കഴിവു തെളിയിച്ചിട്ടുണ്ട്. കഥകളി, തിരുവാതിരകളി, പിന്നല് തിരുവാതിര എന്നിവയില് സജീവ സാന്നിധ്യമാണ്. മര്ച്ചന്റ് നേവി ഉദ്യോഗസ്ഥനായ പാണാട്ട് ഇല്ലത്ത് ഹരികുമാറാണ് ഭര്ത്താവ്. രണ്ടു മക്കളുണ്ട്, ഇള, ശ്രദ്ധ.
പ്രചരണം അവസാനഘട്ടത്തിലെത്തുമ്പോള് മമതയോടുള്ള കുറിച്ചിത്താനത്തിന്റെ മമത ഏറിയിരിക്കുകയാണ്. വിജയിക്കുമെന്ന പൂര്ണവിശ്വാസമാണ് തനിക്കുള്ളതെന്നും കുറിച്ചിത്താനത്തോടുള്ള മമതയ്ക്ക് ഒരിടിവും സംഭവിക്കുകയില്ലെന്നും അവര് പറഞ്ഞു.
