കാസര്കോട്: കേരളത്തില് ഇളകാത്ത ബിജെപിയുടെ ഉരുക്കു കോട്ടയാണ് കാസര്കോട് ജില്ലയിലെ മധൂര് പഞ്ചായത്ത്. ഇത്തവണ കൂടി ഭരണം നിലനിര്ത്തിയാല് രാജ്യത്ത് ചരിത്രമാകും മധൂര് പഞ്ചായത്ത്. തുടര്ച്ചയായി 45 വര്ഷം ബിജെപി ഭരിക്കുന്ന പഞ്ചായത്ത് എന്ന ചരിത്രപരമായ നേട്ടം ഇതിനകം മധൂര് സ്വന്തമാക്കി. ഈ തെരഞ്ഞെടുപ്പു കഴിയുന്നതോടെ പഞ്ചായത്ത് രൂപീകരിച്ചത് മുതല് 50 വര്ഷം ബിജെപി ഭരണം നിലനിര്ത്തുന്ന അപൂര്വ നേട്ടത്തിനും മധൂര് അര്ഹമാകും.
രൂപീകരണം മുതല് ബിജെപിക്ക് ഒപ്പം നിന്ന പഞ്ചായത്തില് കഴിഞ്ഞ തെരഞ്ഞെടുപ്പില് 13 അംഗങ്ങളാണ് പാര്ട്ടിക്കുണ്ടായിരുന്നത്.
നാല് സീറ്റുകളില് എല്ഡിഎഫും മൂന്ന് സീറ്റുകളില് യുഡിഎഫും വിജയിച്ചു. വാര്ഡുകളുടെ എണ്ണം 20-ല് നിന്ന് 24 ആയതും ബിജെപിക്ക് ഗുണം ചെയ്യും. മധൂര്, പട്ള, ഷിരിബാഗിലു എന്നീ വില്ലേജുകള് പൂര്ണമായും കുഡലു വില്ലേജ് ഭാഗികമായും ഉള്പ്പെടുന്ന 26.04 ചതുരശ്ര കിലോമീറ്റര് വിസ്തൃതിയുള്ള ഗ്രാമപഞ്ചായത്താണ് മധൂര്. മായിപ്പാടി മുതല് ഷിരിബാഗിലു വരെ 20 വാര്ഡുകളാണ് പഞ്ചായത്തിലുണ്ടായിരുന്നത്. നിലവില് 35113 വോട്ടര്മാരാണുള്ളത്.
