തെരഞ്ഞെടുപ്പ് ദിവസം യുദ്ധദിനമാകരുത്: ഹൈക്കോടതി

Election day should not be a day of war: High Court

കൊച്ചി: 2025 ലെ തദ്ദേശ സ്വയംഭരണ സ്ഥാപനങ്ങളിലേക്കുള്ള തെരഞ്ഞെടുപ്പ് ഡിസം. 9, 11 തീയതികളില്‍ സുഗമമായി നടത്തുന്നുണ്ടെന്ന് ഉറപ്പാക്കാന്‍ പോലീസിനും സംസ്ഥാന തെരഞ്ഞെടുപ്പ് കമ്മിഷനും തത്സമയ വെബ്കാസ്റ്റിങ് ഉള്‍പ്പെടെ നിരവധി നിര്‍ദേശങ്ങള്‍ ഹൈക്കോടതി പുറപ്പെടുവിച്ചു. പോളിങ് ദിവസത്തെ ക്രമസമാധാന പ്രശ്നങ്ങളെക്കുറിച്ചുള്ള ആശങ്കകള്‍ ഉന്നയിച്ച് കണ്ണൂര്‍ ജില്ലയില്‍ നിന്നുള്ള ഒരു കൂട്ടം ഹര്‍ജികള്‍ തീര്‍പ്പാക്കിയാണ് ജസ്റ്റിസ് പി.വി. കുഞ്ഞികൃഷ്ണന്റെ ബെഞ്ച് ഈ നിര്‍ദേശങ്ങള്‍ പുറപ്പെടുവിച്ചത്. ഒരു തെരഞ്ഞെടുപ്പ് ദിവസം ‘യുദ്ധ ദിനമായിരിക്കരുത്, മറിച്ച് സമാധാന ദിനമായിരിക്കണമെന്ന്’ കോടതി നിരീക്ഷിച്ചു.

സംസ്ഥാന പോലീസ് മേധാവിയും അധികാരപരിധിയിലുള്ള ജില്ലാ പോലീസ് മേധാവികളും തത്സമയ വെബ്കാസ്റ്റിങ്ങിന് ആവശ്യമായ എല്ലാ നടപടികളും സ്വീകരിക്കണമെന്നും തെര. കമ്മിഷന്‍ ഹൈപ്പര്‍സെന്‍സിറ്റീവ്, സെന്‍സിറ്റീവ് എന്ന് തിരിച്ചറിഞ്ഞ പോളിങ് ബൂത്തുകളില്‍ കൂടുതല്‍ പോലീസ് ഉദ്യോഗസ്ഥരെ വിന്യസിക്കണമെന്നും ബെഞ്ച് നിര്‍ദേശിച്ചു. ഏതെങ്കിലും പോളിങ് ബൂത്തില്‍ വീഡിയോഗ്രഫി നടത്തുന്നതിനുള്ള അപേക്ഷകള്‍ മൂന്ന് ദിവസത്തിനുള്ളില്‍ അധികാരപരിധിയിലുള്ള ജില്ലാ തെരഞ്ഞെടുപ്പ് ഓഫീസര്‍ക്ക് സമര്‍പ്പിച്ചാല്‍, അത്തരം അപേക്ഷകള്‍ അവരുടെ സ്വന്തം ചെലവില്‍ അനുവദിക്കാവുന്നതാണ്.

സ്ഥാനാര്‍ത്ഥികളുടെയും അവരുടെ ഏജന്റുമാരുടെയും മറ്റുള്ളവരുടെയും ജീവന് പോലീസ് സംരക്ഷണം ആവശ്യപ്പെട്ടുള്ള അപേക്ഷകള്‍ മൂന്ന് ദിവസത്തിനുള്ളില്‍ അധികാരപരിധിയിലുള്ള ജില്ലാ പോലീസ് മേധാവിയുടെയോ പോലീസ് കമ്മിഷണറുടെയോ മുമ്പാകെ സമര്‍പ്പിക്കാമെന്നും കോടതി കൂട്ടിച്ചേര്‍ത്തു. അത്തരം അപേക്ഷകള്‍ ലഭിച്ചാല്‍, നിയമപ്രകാരം മതിയായ സംരക്ഷണം നല്‍കണം. എന്തെങ്കിലും ക്രമസമാധാന പ്രശ്നം ഉണ്ടായാല്‍, സംസ്ഥാന പോലീസ് മേധാവിയും ബന്ധപ്പെട്ട ജില്ലാ പോലീസ് മേധാവിയും പ്രദേശത്ത് കൂടുതല്‍ പോലീസ് സേനയെ വിന്യസിക്കുന്നുണ്ടെന്ന് ഉറപ്പാക്കണം.

അക്രമത്തിനും അസ്വസ്ഥതകള്‍ക്കും സാധ്യതയുള്ള, ഭയം പ്രകടിപ്പിക്കുന്ന നിരവധി ഹര്‍ജികള്‍ കണ്ണൂര്‍ ജില്ലയില്‍ നിന്നാണ് വന്നതെന്ന് ബെഞ്ച് കൂട്ടിച്ചേര്‍ത്തു. കണ്ണൂരിലെ ജനങ്ങള്‍ യഥാര്‍ത്ഥ ആതിഥ്യമര്യാദയ്‌ക്കും, സന്ദര്‍ശകരെ ഊഷ്മളമായി സ്വാഗതം ചെയ്യുന്നതിനും, അവരെ കുടുംബാംഗങ്ങളെപ്പോലെ പരിഗണിക്കുന്നതിനും പേരുകേട്ടവരാണെന്ന് കോടതി നിരീക്ഷിച്ചു. ഈ തെരഞ്ഞെടുപ്പില്‍ അവസരത്തിനൊത്ത് ഉയരാനും ജില്ല സ്വതന്ത്രവും നീതിയുക്തവുമായ തെരഞ്ഞെടുപ്പ് നടക്കുന്ന സ്ഥലമാണെന്ന് തെളിയിക്കാനും കോടതി കണ്ണൂരിലെ ജനങ്ങളോട് അഭ്യര്‍ത്ഥിച്ചു. കണ്ണൂര്‍ ജില്ലയുമായി ബന്ധപ്പെട്ട നെഗറ്റീവ് ലേബല്‍ നീക്കാന്‍ പൊതുജനങ്ങളും ജില്ലയിലെ മുഴുവന്‍ പോലീസ് സംവിധാനവും മുന്നോട്ട് വരണമെന്ന് കോടതി പറഞ്ഞു.